1042    

14/05/2017

1893-cü ildə - Ədəbiyyatşünas, şair, türkoloq, dilşünas, mətnşünas, Azərbaycan Yazıçılar Birliyinin üzvü, filologiya elmləri doktoru, professor Bəkir Vahab oğlu Çobanzadə (1893-1938) Krımda, Tavrida vilayəti Simferopol qəzasının Qarasubazar şəhərində anadan olmuşdur. 

1899-cu ildə - Azərbaycan Respublikasının əməkdar artisti, xalq artisti, teatr və kino aktyoru Rza Rüstəm oğlu Əfqanlı (Cəfərzadə) (1899-1973) Azərbaycanın Güneyinin Sərab şəhərində doğulmuşdur. 

1912-ci ildə - Mayın 7-də Nuxanın ipək emalı müəssisələri fəhlələrinin elan etdiyi, mayın 12-də ümumi xarakter alan tətildə 6 min nəfər iştirak edirdi. Mayın 15-dək davam edən və fəhlələrlə sahibkarlar arasında saziş imzalanması ilə başa çatan bu çıxış o dövrdə Rusiya ipəkçilik sənayesində ən iri tətil idi.

1920-ci ildə - Azərbaycan Xalq Maarif Komissarlığı respublikada vicdan azadlığının elan edilməsi, dinin dövlətdən və məktəbdən ayrılması barədə dekret verib.

1922-ci ildə - SSRİ-nin xalq artisti, bəstəkar Rauf Soltan oğlu Hacıyev (1922-1995) anadan olub. Populyar mahnıların, operettaların müəllifidir. 60-cı illərdə Azərbaycanın mədəniyyət naziri işləyib.

1982-ci ildə - Azərbaycan Respublikasının əməkdar incəsənət xadimi, görkəmli rejissor Niyaz Səttar oğlu Şərifov (1914-1982) vəfat etmişdir.  

1992-ci ildə - Azərbaycanda növbəti "konstitusion" çevriliş baş verib. Ali Sovetin A.Mütəllibovu prezident postunda bərpa etmək barədə qərarına (14 may) etiraz olaraq "Konstitusiyanın müdafiəsinə" qalxan Xalq Cəbhəsi ölkədə hakimiyyəti ələ alıb. A.Mütəllibov Moskvaya qaçıb.

1992-ci ildə - MDB ölkələrinin Daşkənddə keçirilən sammitində "Avropada adi silahlı qüvvələr haqqında" müqavilə (1990) üzrə keçmiş SSRİ-nin hərbi arsenalının bölüşdürülməsinə dair protokol imzalanıb. Sənəddə MDB ölkələrinin silah kvotaları müəyyənləşib. Gürcüstan və Ermənistandan əhali və ərazisinə görə böyük olmasına rəğmən Azərbaycana qonşuları ilə eyni miqdarda silah ayrılıb. Bu, Azərbaycandakı hakimiyyətsizliyin acı nəticəsi idi.

2000-ci ildə - AŞPA-nın Siyasi Komitəsinin Dublində keçirilmiş iclasında Azərbaycan üzrə məruzəçi Jak Bomelin (Fransa) hesabatı dinlənilib və ölkəmizin Avropa Şurasına tamhüquqlu üzv qəbul edilməsi ilə bağlı ilkin müsbət rəy verilib.

2005-ci ildə - Avropa Şurasının Varşavada keçirilən sammiti çərçivəsində Azərbaycan və Ermənistan prezidentləri İlham Əliyev və Robert Koçaryan arasında Qarabağ nizamlanmasına dair növbəti görüş olub.