1031    

27/05/2017

1918-ci ildə - Zaqafqaziya Seyminin süqutundan sonra qurumun Azərbaycan deputatları Tiflisdə fövqəladə iclas keçirərək Azərbaycanın müvəqqəti Milli Şurasını yaradıblar. Azərbaycanın ilk parlamenti kimi fəaliyyətə başlayan 44 nəfərlik Milli Şuranın sədri Məhəmmədəmin Rəsulzadə ("Müsavat"), müavini Əhməd bəy Ağayev, İcraiyyə Komitəsinin (hökumətin) sədri isə Fətəli xan Xoyski (bitərəf) seçilib.

1920-ci ildə - Mətbuatda dərc edilmiş Azərbaycan İnqilab Komitəsinin "Neft sənayesinin milliləşdirilməsi haqqında dekreti" əsasında neft sənayesi milliləşdirildi. 

1920-ci ildə - N.Nərimanov qanunsuz repressiyaya məruz qalmış vətəndaşları hər vəchlə azad etməyə çalışırdı. 1920-ci il mayın 27-də onun imzası ilə "Kifayət qədər əsas olmadan tutulub saxlananların hamısını" həbsdən buraxmaq üçün xüsusi komissiya yaradılması haqqında dekret dərc olunmuşdu. 1920-ci il iyulun 12-də isə N.Nərimanov həbs yerlərində olan fəhlə, kəndli və əsgərlərin geniş şəkildə amnistiyası haqqında dekret verdi. Dekret sovet hakimiyyətinə qarşı sui-qəsdlərdə iştirak etməyə görə mühakimə olunanlara şamil edilmirdi. Avqustun 12-də N.Nərimanovun imzaladığı əmr idarə müdiriyyətinin icazəsi olmadan qulluqçuların xidməti hərəkətlərinə görə Fövqəladə Komissiya orqanları tərəfindən həbs olunmasını qadağan edirdi.

1934-cü ildə - SSRİ Xalq Komissiarları Soveti və Ümumittifaq Kommunist (bolşevik)Partiyasının Mərkəzi Komitəsi azmaaşlı işçilərin əmək haqqının yüksəldilməsi haqqında qərar qəbul etdi. Burada 125 manata qədər olan maaşların artırılmasının vacibliyi qeyd olunmuşdu. Bu qərara müvafiq olaraq, Azərbaycan Dövlət Plan Komitəsi respublikada 217,6 min nəfərin əmək haqqının artırılması üçün hər ay iki milyon manatdan artıq vəsait ayırmışdı. Orta hesabla hər bir işçinin əmək haqqı 9 manat 43 qəpik, o cümlədən maarif və səhiyyədə 9-12 manat artmış, orta və aşağı səhiyyə işçilərinə verilən əlavə isə 8-14 manat olmuşdu. 

1983-cü ildə - Coğrafiyaşünas alim, “1941-1945-ci illər Böyük Vətən Müharibəsində  fədakar  əməyə görə”, 1975-ci ildə “Böyük Vətən Müharibəsində Qələbənin 30 illiyi” və 1980-ci ildə “Sosializm yarışının qalibi” medalları ilə təltif edilmiş, 1977-ci ildə coğrafiya elmləri doktoru elmi dərəcəsi almış, 1978-ci ildən professor olan Ramazan Baxşəli oğlu Tarverdiyev (1928-1983) Bakıda vəfat etmişdir. 

1992-ci ildə - Azərbaycan parlamenti "Azərbaycan Respublikasının Dövlət himni haqqında" qanun qəbul edib. Qanuna əsasən, 1919-cu ildə bəstəkar Üzeyir Hacıbəyov və şair Əhməd Cavad tərəfindən yazılmış "Azərbaycan marşı" Dövlət himni kimi təsdiq edilib. Azərbaycanın himninin hazırlanması haqqında qərar hələ 1920-ci ilin yanvarında Xalq Cümhuriyyətinin hökuməti tərəfindən qəbul edilsə də, 1920-ci il 28 aprel işğalı onun icrasına imkan verməmişdi.

1992-ci ildə - BMT Təhlükəsizlik Şurasının tapşırığı ilə təşkilatın nümayəndə heyəti Naxçıvana gəlib və Ermənistan silahlı qüvvələrinin bölgəyə hücumlarından sonrakı vəziyyətlə tanış olub.

2002-ci ildə - Prezident Heydər Əliyevin imzaladığı əfv fərmanına əsasən, 73 məhbus azadlığa çıxıb. Onların böyük əksəriyyəti (65 nəfər) Azərbaycanın müstəqilliyinə, dövlətçiliyinə və ərazi bütövlüyünə qarşı törədilmiş cinayətlərdə təqsirli bilinən şəxslər idi.

2008-ci ildə - "Gülüstan" sarayında Azərbaycan Xalq Cümhuriyyətinin 90 illik yubileyinə həsr olunmuş təntənəli mərasim keçirilib. Prezident İlham Əliyev mərasimdə nitq söyləyib.