952    

30/05/2017

1568-ci ildə - Klassik Azərbaycan poeziyasının görkəmli nümayəndəsi, şair Qövsi Təbrizi (1568-1640) Təbriz şəhərində, sənətkar ailəsində dünyaya göz açmışdır. Füzuli ədəbi məktəbinin davamçısı kimi Azərbaycan şeirinin inkişafında mühüm rol oynayıb. Divanının iki qədim nüsxəsi London və Tbilisi muzeylərində saxlanılır.

1898-ci ildə - Azərbaycanın əməkdar artisti, xanəndə, muğam bilicisi, təsnif və xalq mahnılarının təfsirçisi və təbliğatçısı Zülfü Səməd oğlu Adıgözəlov (1898-1963) Şuşanın Qaradolaq kəndində anadan olmuşdur.

1906-cı ildə - Cənubi Qafqazın türk-müsəlman əhalisi arasında Rusiya imperiyasının I Dövlət Dumasına seçkilər keçirilib. İlk dəfə olaraq imperiyanın müsəlman əhalisi seçki prosesinə cəlb edilib. Bakı, Gəncə, İrəvan, Tiflis quberniyalarını əhatə edən seçkidə Dumaya beş azərbaycanlı deputat (Əlimərdan bəy Topçubaşov, İsmayıl xan Ziyadxanov, Əbdürrəhim bəy Haqverdiyev, Məmmədtağı Əliyev və Əsədulla bəy Muradxanov) seçilmişdi.

1912-ci ildə - Azərbaycanın neft-qaz sənayesi sahəsində tanınmış alimi, professor Sabit Atababa oğlu Orucov (1912-1981) anadan olmuşdur. Sibirdə və Orta Asiyada yeni qaz yataqlarının kəşfi və istismarına rəhbərlik edib, SSRİ-nin qaz sənayesi naziri (1972-1981) olub.

1919-cu ildə - Azərbaycan Xalq Cümhuriyyəti höküməti sosial və istehsalat münaqişələrinin həllinə cavabdeh olacaq Arbitraj orqanının yaradılması haqqında qərar qəbul etdi. 

1922-ci ildə - Xalq artisti Sara Bəbiş qızı Qədimova (1922-2005) Bakıda anadan olub. Uzun illər Azərbaycan Dövlət Filarmoniyasının, Opera və Balet Teatrının solisti olub, Azərbaycan müsiqisinin xaricdə təbliğinə böyük töhfə verib.

1929-cu ildə - Azərbaycan Respublikasının Əməkdar incəsənət xadimi, Xalq Artisti, Şöhrət ordeni ilə təltif olunmuş görkəmli bəstəkar Oqtay Qədir oğlu Zülfüqarov anadan olmuşdur.

2001-ci ildə - MDB dövlət başçılarının Minsk sammitində Azərbaycan, Ermənistan və Rusiya prezidentləri Heydər Əliyev, Robert Koçaryan və Vladimir Putin arasında keçirilən görüşdə Qarabağ problemi müzakirə olunub.

2002-ci ildə - Dilçi alim, filologiya elmləri doktoru, əməkdar elm xadimi, pedaqoq Samət Qürbət oğlu Əlizadə (1938-2002) vəfat etmişdir.

2006-cı ildə - Azərbaycan və Yaponiya arasında "Müşfiq yarımstansiyasının yenidən qurulması layihəsi"nə dair Nota mübadiləsi edilmişdir.