999    

08/06/2017

1604-cü ildə - Növbəti Səfəvi-Osmanlı müharibəsi (1603-1612) gedişində Şah I Abbasın qoşunları İrəvan qalasını ələ keçiriblər. Şərif paşa başda olmaqla Osmanlı qarnizonu təslim oldu. Şah Abbas Şərif paşanın xahişini nəzərə alaraq onu Məşhədə, İmam Rza türbəsinə mütəvəlli təyin etdi. Mehmet paşanın rəhbərliyi altında əsir alınan 500 nəfərlik dəstəyə Qarsa getməyə icazə verildi. Çuxursəd vilayətinin hakimi vəzifəsinə Əmirgünə xan Qacar təyin edildi. İrəvan bu vilayətin mərkəzi idi.  

1919-cu ildə - Bakı şəhərinin Balaxanı, Zabrat, Ramana neft-mədən rayonları fəhlələrinin böyük mitinqi oldu və onlar hökumətdən Bakının və Azərbaycan sərhədlərinin müdafiə olunması üzrə təcili tədbirlər görülməsini tələb etdilər. Fəhlələrin qəbul etdikləri qətnamədə deyilirdi: "...Bakı limanından Denikinə mərmilər göndərilir və buna Zaqafqaziyada, o cümlədən də Bakıda ikiüzlü siyasət yeridən həyasız ingilis komandanlığı kömək edir". 

1993-cü ildə - Gəncə hadisələri ilə bağlı ölkədə böhran dərinləşib. Surət Hüseynovun tabeçiliyindəki silahlı birləşmələr Gəncəbasar bölgəsində yerli hakimiyyət strukturlarını devirərək Bakıya doğru hərəkət etməyə başlayıblar. Bu arada respublika rəhbərliyi vəziyyətdən çıxış yolu axtarmaq üçün Naxçıvan Ali Məclisinin sədri Heydər Əliyevi Bakıya dəvət edib.

2002-ci ildə - Prezident Heydər Əliyev Sankt-Peterburqda rusiyalı həmkarı Vladimir Putinlə birlikdə dahi şair Nizami Gəncəvinin abidəsinin açılışında iştirak edib. Prezidentlər Xəzərin sektoral bölgüsü və Qarabağ məsələsini müzakirə ediblər. Xəzərlə bağlı sazişin sentyabrda imzalanması qərara alınıb.