1119
11/06/2017 1886-cı ildə (bəzi mənbələrdə 1896) - Tiflisdə rus gimnaziyasında təhsil almış, Bakıdakı rus-tatar qız məktəblərində dərs demiş, 1956-cı ilədək Bakı məktəblərində müəllim işləmiş Qəribsoltan Həsən bəy qızı Məlikova (1886/1896 - 1967) Göyçay qəzasının Zərdab kəndində (indiki Zərdab şəhərində), maarifpərvər ziyalı, Azərbaycan mətbuatının banisi Həsən bəy Məlikov-Zərdabinin ailəsində anadan olmuşdur.
1913-cü ildə - İki çağırışda Azərbaycan SSR Ali Sovetinin deputatı olmuş, 1943-cü ildə “Azərbaycan Respublikasının Əməkdar artisti”, 1960-cı ildə “Xalq artisti”, 1965-ci ildə “SSRİ Xalq artisti” fəxri adlarına layiq görülmüş Hökümə Abbasəli qızı Qurbanova (1913-1988) Bakıda, ziyalı ailəsində anadan olmuşdur.
1919-cu ildə - Azərbaycan Xalq Cümhuriyyətinin baş naziri Nəsib bəy Usubbəylinin sədrliyi ilə Dövlət Müdafiə Komitəsi yaradılıb. Həmin dövrdə ölkənin müxtəlif bölgələrində baş qaldıran qiyamlar (Muğan-Lənkəran bölgəsində bolşeviklər tərəfindən təşviq edilən rusların (molokanların) qiyamı, Qarabağ, Naxçıvan və Zəngəzurda ermənilərin Azərbaycan Xalq Cümhuriyyəti əleyhinə silahlı çıxışları) hökuməti bu addıma məcbur etmişdi.
1919-cu ildə - İngilislər Petrovskdan cənubda yeni demarkasiya xətti ilə müəyyənləşdirilən sərhədləri qeydə aldılar. Bu, onların Denikinin bütün Dağıstanı işğal etməsi faktı ilə prinsipcə razı olduqlarını göstərirdi. Nəticədə Könüllülər Ordusu Azərbaycan sərhədlərinə daha da yaxınlaşmış olurdu. Eyni zamanda Böyük Britaniya su nəqliyyatının rəisi polkovnik Braunun sərəncamına uyğun olaraq, Xəzər dənizinin Petrovsk, Bakı və Krasnovodsk limanları ingilislərin idarəsi altında qalırdı.
1947-ci ildə - İran kommunist partiyasının təsisçilərindən biri, Azərbaycan Demokrat Firqəsinin sədri, Azərbaycan Milli Hökumətinin sədri (1945-1946) Seyid Cəfər Pişəvəri (1892-1947) Gəncə şəhərindən qayıdarkən Yevlax yaxınlığında Pişəvəri müəmmalı şəkildə maşın qəzasına düşmüş və həlak olmuşdur. Pişəvərinin məzarı Bakı şəhərində Fəxri Xiyabandadır.
1952-ci ildə - Azərbaycanın Milli Qəhrəmanı İsrafil Şahverdi oğlu Şahverdiyev (1952-1995) Laçın rayonunun Unannovu kəndində anadan olmuşdur.
1975-ci ildə - Azərbaycan SSR dövlət xadimi, Gəncə vilayəti İcrayyə Komitəsinin sədri (1952-1953), Azərbaycan SSR Nazirlər Sovetinin Sədri (1954-1958), Azərbaycan SSR Ali Soveti Rəyasət Heyətinin üzvü, Azərbaycan SSR Yüngül Sənaye Naziri (1965-1975) hazırki Gənclər və idman naziri Azad Rəhimovun babası Sadıq Hacıyarəli oğlu Rəhimov (1914-1975) Bakıda vəfat etdi.
1990-cı ildə - Azərbaycan SSR Ali Soveti Ermənistanla sərhəd boyu (975 km) fövqəladə vəziyyət elan etdi. Sərhədlər mühəndis qurğuları ilə möhkəmləndirildi, onu müdafiə etmək üçün Xüsusi Təyinatlı Milis Dəstələri yaradıldı.
1991-ci ildə - Azərbaycan hökuməti Ermənistandan qovulmuş azərbaycanlı əhalinin bir qisminin Xanlar (Göygöl) rayonunun Çaykənd və Qarabulaq kəndlərində yerləşdirilməsi barədə gecikmiş qərar qəbul edib. Ermənistandan deportasiya edilmiş azərbaycanlı əhali hələ 1988-ci ildə Dağlıq Qarabağda və ermənilər yaşayan digər ərazilərdə yerləşmək istəsə də, o vaxtkı respublika rəhbərliyi buna imkan verməmişdi.
1993-cü ildə - Azərbaycanla Belarus Respublikası arasında diplomatik münasibətlər qurulub.
1993-cü ildə - Ağdam rayonunun Cinli, Mərzili kəndləri Ermənistan ordusu tərəfindən işğal olunmuşdur.
1994-cü ildə - Rusiyanın müdafiə naziri Pavel Qraçov Dağlıq Qarabağda və Ermənistan-Azərbaycan cəbhə xətti boyunca rus sülhməramlı qoşunlarının yerləşdirilməsi imkanlarını müzakirə etmək üçün Bakıya səfərə gəlib. Azərbaycan rəhbərliyi Rusiya tərəfin bu təklifini rədd etdi.
2002-ci ildə - Prezident Heydər Əliyev "Azərbaycan Respublikası Prezidentinin fərdi təqaüdünün təsis edilməsi haqqında" Fərman verdi. Xalq qarşısında mühüm xidmətləri olmuş şəxslərə yüksək Prezident təqaüdü verilməyə başlandı.
2004-cü ildə - Akademik, 1980-ci ildə AEA müxbir üzvü, 2001-ci ildə AMEA-nın həqiqi üzvü və 2003-cü ildə isə Beynəlxalq EA-nın Azərbaycan Bölməsinin həqiqi üzvü, 1957-ci il yanvarın 1-dən 1978-ci il yanvarın 17-dək «Azərbaycanın qədim dövrü tarixi» şöbəsinin müdiri, 1978-ci ildən 2004-cü il iyunun 11-dək Tarix İnstitutunun direktoru, 1981–1984-cü illərdə AEA-nın İctimai Elmlər Bölməsinin akademik-katibi İqrar Həbib oğlu Əliyev (1924-2004) vəfat edib.
2015-ci ildə - 1976-1991-ci illərdə Azərbaycan EA-nın Şərqşünaslıq İnstitutunda fəaliyyət göstərmiş, Cənubi Azərbaycan tarixi şöbəsinin yaradıcısı və rəhbəri olmuş, bu sahədə elmlər namizədləri yetişdirmiş, Milli azadlıq hərəkatında, Müsavat Partiyasının bərpasında yaxından iştirak etmiş, “Güney Azərbaycan tarixi”nin 3 cildini hazırlamış tarix elmləri doktoru, professor Şövkət Əzizağa qızı Tağıyeva (1926-2015) vəfat etdi.