1040    

15/06/2017

1807-ci ildə - Baş komandanı general Qudoviç rus ordusunun başında Gümrüyə yönəldi. Burada rus və türk qoşunları arasında qanlı döyüş baş verdi. Mirzə Adıgözəl bəy bu döyüş haqqında yazırdı: "Hər iki qoşun Arpa çayında qarşılaşdı və bir-birinin qarşısında yerləşdilər. Bir qədər vaxtan sonra döyüş baş verdi. Qaş qaralana yaxın osmanlılar məğlub edildilər. Ruslar osmanlılardan qənimətlər və çoxlu top ələ keçirdilər". 

1917-ci ildə - Xalq artisti, tanınmış bəstəkar Cövdət Hacıyev (1917-1994) anadan olub. Azərbaycanda simfonik musiqinin yaradıcılarından biridir, xalq musiqisi elementlərinin də yer aldığı altı simfoniya, orkestr və xor üçün əsərlər bəstələyib.

1919-cu ildə - Azərbaycan Ermənistana nota göndərdi. Bu notada Ermənistanın etiraz və iddiaları rədd edilərək, Qarabağ məsələsində Azərbaycan Cümhuriyyətinin daxili işlərinə qarışmamaq tələb olunurdu. 

1920-ci ildə - İyun ayının 6-da başlamış Zaqatala üsyanı Qarabağdakı üsyan zamanı olduğu kimi, eyni amansızlıqla yatırıldı və əhalinin tərk-silah edilməsinə başlandı. Bütünlükdə üsyançılardan 6 mindən çox xarici və rus tüfəngi, karabini, berdankası, 8 pulemyot və böyük miqdarda tapança, müxtəlif pistolet və digər döyüş sursatı alındı. 

1920-ci ildə - Ermənistan dövləti türk-müsəlman əhaliyə qarşı soyqırımı siyasətini monoetnik dövlət yaradana qədər davam etdirmiş və soyqırımı dövlət səviyyəsində təşkil etmişdi. Ermənistan Kommunist Partiyasının nümayəndəsi Kominternin II konqresində çıxış edərkən "Ermənistan hökuməti ərazilərini müsəlmanlardan təmizləməklə, müsəlman kəndlərini oda qalamaq və qılıncdan keçirməklə öz müqəddəs arzusunu praktiki olaraq həyata keçirir" deyə bəyan etmişdi. 

1998-ci ildə - "İnsan hüquqlarının müdafiəsinə dair Dövlət Proqramı" təsdiq edildi, bu sahədə həyata keçirilən tədbirlərin səmərəliliyini artırmaq üçün Azərbaycan Milli Elmlər Akademiyasının İnsan Hüquqları İnstitutu yaradıldı, beynəlxalq qurumlarla əməkdaşlığın daha da inkişaf etdirilməsi, mütəxəssis kadrlar hazırlanması üçün əməli addımlar atıldı. Prezident İlham Əliyevin 18 iyun 2007-ci il tarixli sərəncamı ilə 18 iyun Azərbaycanda İnsan hüquqları günü kimi qeyd olunur.

2001-ci ildə - Prezident Heydər Əliyev "Dövlət dilinin işlənməsinin təkmilləşdirilməsi haqqında" fərman imzalayıb. Fərmana əsasən, 2001-ci il avqustun 1-dən etibarən ölkədə Azərbaycan dilində olan bütün çap məhsulları latın qrafikalı əlifbaya keçib, respublikanın bütün idarələrində rəsmi yazışmalar yalnız latın qrafikasında aparılmağa başlanıb. Azərbaycanda latın qrafikasına keçid barədə qərar hələ 1991-ci ilin dekabrında qəbul edilsə də, bu proses çox ləng gedirdi. Fərman bu prosesi birdəfəlik başa çatdırdı və Azərbaycan əlifbasının 62 illik "kiril dövrü" tarixə qovuşdu.   

2010-cu ildə - Azərbaycan Respublikası Silahlı Qüvvələrinin giziri, Milli Qəhrəman Mübariz Ağakərim oğlu İbrahimov (1988-2010) döyüş növbəsini yerinə yetirərkən düşmən qüvvələrinin atəşkəs rejimini pozması nəticəsində Talış-Borsunlu istiqamətində gedən şiddətli döyüş zamanı şəxsi rəşadət və şücaət nümayiş etdirmiş, düşmənin çoxlu sayda canlı qüvvəsini məhv edərək şəhid olmuşdur.