1141    

20/01/2017

1029-cu ildə - Səlcuqlu sultanı Alp Arslan (1029-1072) anadan olmuşdur. O, 1063-1072-ci illərdə Səlcuqlu imperiyasının ikinci sultanı olub.  

1977-ci ildə - Tanınmış şair, publisist Cabbarov Zeynal Əliabbas oğlu (1920-1977) vəfat edib.

1990-cı ildə - Azərbaycan torpağına qorxulu bəla üz verdi. Yanvarın 19-dan 20-nə keçən gecə hər hansı bir müharibə elan edilmədən sovet qoşunları qəflətən tanklardan, digər zirehli texnikalardan, vertolyotlardan və başqa müasir hərbi texnikalardan istifadə etməklə Azərbaycana və onun paytaxtı Bakıya qarşı əsl hərbi əməliyyatlara başladılar. 

1990-cı ildə - 20 yanvar 1990-cı ildə radio ilə çıxışında Azərbaycan SSR-nin Ali Sovetinin Rəyasət heyətinin sədri Elmira Qafarova respublikanın suverenliyinin kobud surətdə pozulmasına və SSRİ Ali Sovetinin Rəyasət heyəti tərəfindən Azərbaycanın paytaxtı-Bakı şəhərində fövqəladə vəziyyət elan edilməsinə qəti etirazını bildirmişdi. O, Azərbaycan SSR rəhbərliyi və hakimiyyət orqanları tərəfindən Bakıda hər hansı bir fövqəladə vəziyyətlə bağlı qərarın qəbul edilmədiyini və SSRİ Ali Sovetinin Rəyasət heyətində məlum qərarın tətbiqi ilə bağlı qərarına razılıq vermədiklərini bəyan etdi. Belə olan halda Bakıda fövqəladə vəziyyətin tətbiq edilməsi aktı SSRİ Konstitusiyasının, Azərbaycan SSR-nin suveren hüquqlarının kobud şəkildə pozulması deməkdir. Bu səbəbdən də Bakıda komendant saatının və fövqəladə vəziyyətin icrası zamanı ciddi qanun pozuntularına yol verilməsindən söhbət belə gedə bilməz. Fövqəladə vəziyyət və komendant saatı haqqında elan onun icrasından sonra bəyan edilmişdir. Əhalini xəbərdar etmək üçün əvvəlcədən kiçicik bir imkan belə yaradılmamışdır. Bütün bunlar faciəvi nəticələrə gətirib çıxartmışdı. Bu gün biz bilirik ki, hətta bir neçə nəfər öz evində güllələnərək öldürülmüşdü. 20 yanvar Azərbaycan KP-nın Bürosunun iclası keçirilmiş və Respublikadakı mürəkkəb vəziyyət məsələsinə baxılmışdı. Partiya komitələrinin diqqətinə gərginliyin daha da artmaması və respublikada vəziyyətin normallaşdırılması üçün ölçü götürmək tələbi çatdırılmışdı. Baş vermiş hadisənin səbəblərinin dərin və hərtərəfli şəkildə təhlil edilməsi barədə qərar qəbul edilmiş, Azərbaycan KP-nın Bürosu 20 yanvar hadisəsi ilə bağlı baş sağlığı verərək respublikada 3 günlük matəm elan etmişdi. 

1990-cı ildə - Azərbaycan SSR-nın DTK-i tərəfindən Naxçıvan şəhərində sərhəd zonasında giriş və hərəkət qaydalarını pozan fransız müxbirlər - Janen Daniel Klod, Dyudubl Dominik, Bantyura Stefan, Peynar Mişel saxlanıldı. Müəyyən edildiyi kimi jurnalistlər muxtar respublikanın ərazisinə Ermənistan SSR-nin Ararat rayonundan keçmişdilər. Əcnəbilərin üzərində Ermənistanda qeyri-rəsmi birliklərin liderlərinin ünvan və telefonları, İrəvan və Xankəndində fəaliyyət göstərən, müxtəlif növ təşkilat fəalları, erməni icmalarının Fransadakı rəhbərləri ilə əlaqələrinə dair şahidlik edən sənədlər, erməni “boyevikləri”nin fəaliyyətinə dair fotolentlər, o cümlədən də sovetlərin hərbi texnikasının miqdarı və növləri ilə bağlı qeydlər aşkar edilmişdi. Fransız jurnalistlərinin qanunsuz fəaliyyəti sənədləşdirildi. Həmin əcnəbi jurnalistlər respublikadan xaric edildi. 

1998-ci ildə - Tanınmış jurnalist, Bakı Dövlət Universitetinin professoru Tofiq Tağı oğlu Rüstəmov (1936-1998) vəfat edib. 

1998-ci ildə - Prezident Heydər Əliyev “Azərbaycan Respublikası ilə Avropa Şurası arasında əməkdaşlığın dərinləşdirilməsi və Azərbaycan Respublikasının Avropada mənafelərinin müdafiə edilməsi sahəsində tədbirlər haqqında” sərəncam imzalayıb.

2003-cü ildə - Məşhur futbol hakimi Eldar Əzimzadə (1934-2003) vəfat edib.

2006-cı ildə - Görkəmli ədəbiyyatşünas, akademik, əməkdar elm xadimi, dövlət mükafatı laureatı Kamal Talıbzadə Abdulla Şaiq oğlu (1923-2006) vəfat edib.

2010-cu ildə - Bakıda 20 Yanvar abidə-kompleksinin açılışı olmuşdur.