1030
24/06/2017 1918-ci ildə - Azərbaycan Xalq Cümhuriyyətinin ilk bayrağı qəbul edilib. Hökumətin qərarı ilə qırmızı parça üzərində ağ rəngli aypara və səkkizguşəli ulduz təsvir edilmiş bayraq Cümhuriyyətin müvəqqəti rəmzi elan edilib. Azərbaycanın indiki üçrəngli (mavi, qırmızı, yaşıl) bayrağı isə dövlət rəmzi olaraq 1918-ci ilin noyabrında qəbul edildi.
1920-ci ildə - Təbrizdə Şeyx Məhəmməd Xiyabaninin başçılığı ilə Azərbaycan Demokratik Firqəsinin fəallarından ibarət Milli Hökumət qurulub. Xiyabaninin rəhbərliyi ilə Təbriz üsyanı 1920-ci ilin aprelində qalib gəlmişdi. Milli Hökumətin qurulması ilə Cənubi Azərbaycanda faktiki olaraq müstəqil dövlət-demokratik respublika fəaliyyətə başlamışdı. Lakin Milli Hökumətin ömrü bir neçə ay oldu, həmin ilin sentyabrında Xiyabani qətlə yetirildi və üsyan yatırıldı.
1938-ci ildə - I çağırış Azərbaycan SSR Ali Sovetinə seçkilər keçirilib. 310 nəfərlik parlamentə 107 fəhlə, 88 kolxozçu və 115 ziyalı-qulluqçu seçilmişdi. Xalq deputatlarının 72-si qadınlar idi. Kommunist Partiyasının əslində bütün dövlət funksiyalarını mənimsədiyi şəraitdə Ali Sovet formal fəaliyyət göstərirdi.
1938-ci ildə - Azərbaycan Respublikasında ilk dəfə demokratik yolla keçirilən prezident seçkilərində qələbə qazanmış və 17 iyun 1993-cü ilə qədər hakimiyyətdə olmuş Əbülfəz Qədirqulu oğlu Əliyev (Elçibəy) (1938-2000) Naxçıvan Muxtar Respublikası Ordubad rayonunun Kələki kəndində anadan olmuşdur. O, 1997-ci ilin noyabr ayında “Bütöv Azərbaycan Birliyi”ni yaratmış və ona başçılığı öz üzərinə götürmüşdü, eyni zamanda Türk Xalqları Assambleyasının fəxri sədri seçilmişdi. O, Azərbaycan tarixşünaslıq və şərqşünaslığında əsaslı elmi araşdırmalar aparmış, onun 40-dan artıq sanballı elmi əsəri nəşr edilmişdir.
1939-cu ildə - Nasir, publisist Səməd İzzət oğlu Behrəngi (1939-1967) Təbriz şəhərində, zəhmətkeş ailəsində anadan olub.
1944-cü ildə - SSRİ Xalq Komissarları Soveti Təbrizdə Azərbaycan dilində orta məktəbin açılması haqqında qərar qəbul etdi. C.Ələsgərovun direktor olduğu, 36 nəfər müəllim və inzibati-təsərrüfat işçisindən ibarət bu məktəbdə dərslər noyabrın 1-də başlandı.
1945-ci ildə - Moskvada, Qızıl meydanda Azərbaycan döyüşçüləri nümayəndələrinin də iştirak etdiyi sovet ordusunun Qələbə paradı keçirildi.
1953-cü ildə - Ölümündən sonra “Azərbaycanın Milli Qəhrəmanı” fəxri adı verilmiş Xocalı Təyyarə limanı xətt daxili işlər bölməsinin rəisi, Xocalı aeroportunun komendantı, mayor Əlif Lətif oğlu Hacıyev (1953-1992) Xocalı şəhərində anadan olub.
1959-cu ildə - Sov.İKP MK-nın iyunun 24-29-da keçirilən plenumu heç bir əsas olmadan, qondarma ittihamlarla Azərbaycan SSR rəhbərliyini ciddi tənqid etdi. Azərbaycan KP MK-nın 1959-cu ilin iyulunda keçirilən XI plenumunda İmam Mustafayev vəzifəsindən azad edildi. Vəli Axundov Azərbaycan KP MK-nın birinci katibi seçildi.
1959-cu ildə - Şair, yazıçı, dramaturq, publisist, pedaqoq, ədəbiyyatşünas, tərcüməçi, 1934-cü ildən Azərbaycan Yazıçılar Birliyinin üzvü, Əməkdar incəsənət xadimi Abdulla Şaiq (əsl adı: Abdulla Axund Mustafa oğlu Talıbzadə) (1881-1959) vəfat edib.
1975-ci ildə - Azərbaycanın Milli Qəhrəmanı, Qarabağ müharibəsi şəhidi Dilqəm Heydər oğlu Nağıyev (1975-1995) Mingəçevir şəhərində anadan olmuşdur.
1992-ci ildə - Rəssam, əməkdar incəsənət xadimi Cavad Mircavadov (1923 – 1992) vəfat edib.
1993-cü ildə - Milli Məclisdə ölkədəki ağır siyasi böhran geniş müzakirə olunub. Prezident Ə.Elçibəylə danışıqlar aparmaq üçün Kələkiyə getmiş bir qrup ziyalılının nəticəsiz geri dönməsindən sonra parlament Konstitusiyanın tələbini nəzərə alaraq prezident səlahiyyətlərinin Ali Sovet sədrinə verilməsi barədə qərar qəbul edib. Parlamentin qərarı ilə Ali Sovetin sədri Heydər Əliyev prezident səlahiyyətlərini icra etməyə başlayıb.