"27 İYUN" TARIXIMIZDƏ
Ana səhifə > Xəbərlər > "27 İyun" tariximizdə
932    
25/06/2017

1918-ci ildə - Azərbaycan və türk (Osmanlı) hərbi qüvvələrindən ibarət Qafqaz İslam Ordusu Göyçay yaxınlığındakı döyüşdə "Bakı Soveti"nin qoşunlarını məğlub edib. Bu zəfərdən sonra Qafqaz İslam Ordusunun hissələri daşnak-bolşevik qoşunlarının hücumlarını dayandıraraq əks-hücuma keçməyə başlayıblar.

1918-ci ildə -  Azərbaycan Xalq Cümhuriyyətinin hökuməti "Dövlət dili haqqında" qərar qəbul edib. Azərbaycan (türk) dili Cümhuriyyət ərazisində dövlət dili elan olunub.

1919-cu ildə - Yaxınlaşan "bolşevik təhlükəsinin" bütün ciddiliyini başa düşən F.X.Xoyski özünün həmkarı Y. P. Gegeçkoriyə hələ 1919-cu il iyunun 27-də Gürcüstanla Azərbaycan arasında general Denikinə qarşı yönəlmiş birgə müdafiə taktikasının şərtlərini reallaşdırmaq üçün zəruri tədbirlər görməyi təklif etdi. Lakin Azərbaycanla hərbi əlaqələrin belə konkretləşdirilməsi artıq o dövrdə Gürcüstan hökumətinin mənafeyinə uyğun gəlmirdi. Həmin dövrdə Gürcüstan nümayəndəsi Uraqadze Moskvada öz hökuməti adından Çiçerinlə Gürcüstanın Sovet Rusiyası tərəfindən tanınması barədə danışıqlar aparırdı.

1921-ci ildə - Azərbaycan K(b)P MK Ermənistanın Dağlıq Qarabağa iddiasını rədd edib. MK-nın qərarında Dağlıq Qarabağın Azərbaycanın tərkib hissəsi olduğu vurğulanırdı. Bu, ermənilərin Qarabağ iddialarına Azərbaycanın bolşevik rəhbərliyinin ilk cavabı idi.

1921-ci ildə - Azərbaycan Xalq Komissarları Soveti xüsusi dekretlə istehlak kooperasiyasını özünü idarə edən müstəqil ictimai təşkilat elan etdi. Fəhlə kooperativləri haqqında əsasnamə təsdiq olundu. Onlar bilavasitə sənayedə, nəqliyyatda və başqa müəssisələrdə fəaliyyət göstərir, kooperativ üzvlərinin ümumi yığıncağında seçilən idarə heyətləri tərəfindən idarə olunurdular.

1924-cü ildə - Görkəmli teatr və kino aktyoru, Xalq artisti Məlik Yusif oğlu Dadaşov (1924-1996) Bakı şəhərində anadan olmuşdur. 

1940-cı ildə - Xalq rəssamı Əzim Əzimzadə tövsiyəsilə Azərbaycan Dövlət Rəssamlıq Texnikumunun yetirmələrindən bir çoxu Moskva, Leninqrad, Kiyev, Tbilisi ali məktəblərində oxumağa göndərildi. Onların sırasında sonralar Azərbaycanın tanınmış rəssamları olan Tağı Tağıyev, Kazım Kazımzadə, Həsən Haqverdiyev, Kamil Xanlarov, Mürsəl Nəcəfov və b. var idi.

1956-cı ildə - Azərbaycanın Milli Qəhrəmanı Yavər Yaqub oğlu Əliyev (1956-1992) Bakı şəhərində anadan olmuşdur.

1973-cü ildə - Azərbaycanın Milli Qəhrəmanı Ruslan Həmid oğlu Muradov (1973-1992) Mingəçevir şəhərində doğulmuşdur.

1991-ci ildə -Ali Sovet Azərbaycanın "Suveren Dövlətlər İttifaqı haqqında" müqavilədə iştirak etməsi barədə qərar qəbul edib. Yeni ittifaq müqaviləsinin imzalanması Moskvadakı "Avqust qiyamı" nəticəsində baş tutmadı.

1991-ci ildə - Erməni silahlı birləşmələri Dağlıq Qarabağın Martuni (indiki Xocavənd) rayonunun azərbaycanlılar yaşayan Qaradağlı kəndinə hücum edərək 6 sakini qətlə yetiriblər. Bu, Qarabağ münaqişəsi başlayandan sonra ermənilərin azərbaycanlı yaşayış məntəqəsinə ilk böyük hücumu idi.

1992-ci ildə - Azərbaycanın Milli Qəhrəmanı Səxavət Ələmdar oğlu Məhərrəmov (1973-1992) Ağdərənin Möhrədağ kəndi uğrunda qanlı döyüşlər də iştirak etmiş, onlarla erməni yaraqlısı məhv edildikdən sonra bölmə ilə geri dönərkən meşədə mühasirəyə düşmüş və şəhid olmuşdur.

1993-cü ildə - Ermənistan silahlı qüvvələri Dağlıq Qarabağın şimalında Ağdərə (Mardakert) rayon mərkəzini ələ keçiriblər. Ağdərə 1992-ci ilin yayında Azərbaycan ordu hissələrinin nəzarətinə keçmişdi. Ağdərə şəhəri ilə yanaşı, rayonun bir neçə kəndini ələ keçirən ermənilər Ağdam şəhərinin bir neçə kilometrliyinə gəlib çıxıblar.