960
28/06/2017 1458-ci ildə - Xorasan hakimi Babur Mirzənin 1457-ci ildə ölümündən sonra taxt-tac çəkişmələrindən istifadə edən Cahanşah Həqiqi indiki İranın şərqinə doğru hərəkət etdi. O, Xəzər sahili ilə irəlilədi, Mazandaran və Astrabadı zəbt etdi. Qaraqoyunlu padşahı Məşhədi və Nişapuru keçərək Teymurilərin paytaxtı olan Herat şəhərinə daxil oldu. 1458-ci il iyunun 28-də Cahanşah Teymuri hökmdarı Şahruxun taxtında əyləşdi. Xarici dövlətlərin elçiləri Herata gəlib onu salamlayır, ənam və hədiyyələrini təqdim edirdilər. Lakin həmin ildə Cahanşah Heratı tərk etməli oldu.
1842-ci ildə - Görkəmli Azərbaycan maarifçisi, alim, publisist və pedaqoq Həsən bəy Zərdabi (1842-1907) anadan olub. 1875-ci ildə "Əkinçi" qəzetinin nəşrinə başlamaqla Azərbaycanda milli mətbuatın əsasını qoyub.
1863-cü ildə - Bolşeviklər tərəfindən güllələndiyi ehtimal edilən general-adyutant Hüseyn xan Kəlbəli xan oğlu Naxçıvanski (1863-1919) Naxçıvanda anadan olmuşdur. Xidmətlərinə görə dördüncü və üçüncü dərəcəli müqəddəs Georgi ordenləri ilə, Müqəddəs Vladimir, ikinci dərəcəli Müqəddəs Aleksandr, Müqəddəs Anna, İgidliyə görə, İranın almazla bəzədilmiş 2-ci və 4-cü dərəcəli Şire-Xurşid, zabitlərə məxsus Rumın ulduzu, Avstriyanın Dəmir xaç, Bolqarıstanın Döyüş xidmətlərinə görə ordenləri, dördüncü dərəcəli, bantlı, üstü yazılı qızıl silahla təltif olunmuşdur.
1914-cü ildə - Azərbaycan Respublikasının Əməkdar artisti, Xalq artisti, Aktrisa, “Şərəf nişanı” ordeni və medallarla təltif olunmuş Azərbaycan səhnəsinin Cülyettası Barat Həbib qızı Şəkinskaya (1914-1999) Şuşada, bəyzadə ailəsində anadan olmuşdur.
1919-cu ildə - 1919-cu ilin yayında və payızında Azərbaycan Xalq Cümhuriyyətində ordu hissələrinin formalaşdırılması böyük sürətlə davam etdirilirdi. Bu dövr qoşun hissələrinin yaradılmasında ən məhsuldar dövr sayıla bilər. İngiltərə hərbi qüvvələri Azərbaycan ərazisini tərk etdikdən sonra Hərbi Nazirliyin rəhbər orqanları 1919-cu il iyunun 28-i, iyulun əvvəllərində yenidən Bakıya köçürüldü.
1920-ci ildə - 1920-ci il mart ayının 1-dən fəaliyyətə başlayan Azərbaycan ordusu qərargahında Qaytabaşı növbətçi generalın idarəsinə rəhbərlik etmiş, qısa müddət Azərbaycan ordusu qərargahının rəisi vəzifəsini icra edən Əbdülhəmid bəy Şərif bəy oğlu Qaytabaşı (1888-1920) bolşeviklər tərəfindən repressiyaya məruz qalmış və güllələnmişdir.
1925-ci ildə - Tanınmış Azərbaycan müğənnisi, Azərbaycan SSR Xalq Artisti Gülağa Allahverdi oğlu Məmmədov (1925-1994) Lənkəranın Kiçik Bazar adlanan məhəlləsində anadan olub.
1926-cı ildə - Tanınmış dövlət xadimi, daxili xidmət general-leytenantı Arif Nəzər oğlu Heydərov (1926-1978) Ağdaş rayonunda anadan olmuşdur. Azərbaycan SSR-in daxili işlər naziri olub.
1952-ci ildə - Azərbaycanın Milli Qəhrəmanı, Qarabağ müharibəsi şəhidi Ənvər Səyyad oğlu Fərəcov (1952-1991) Goranboy rayonunun Sarov kəndində anadan olmuşdur.
1960-cı ildə - Heykəltəraş Valid Nizami oğlu Məmmədov (1960-2010) Bakıda məşhur diktor Nizami Məmmədovun ailəsində anadan olmuşdur.
1974-cü ildə - Azərbaycanın Milli Qəhrəmanı Zaur Rəşid oğlu Sarıyev (1974-1995) Şəmkir rayonunun Qaralar kəndində anadan olmuşdur.
1992-ci ildə - Azərbaycanın Milli Qəhrəmanı, Qarabağ müharibəsi iştirakçısı Rasim Səxavət oğlu İbrahimov (1962-1992) Füzuli rayonunun Tuğ kəndi uğrunda gedən döyüşdə şəhid olub.
1995-ci ildə - Azərbaycan Respublikası Makedoniya Respublikası ilə diplomatik əlaqələr qurmuşdur.
1996-cı ildə - Avropa Şurası Parlament Assambleyasının (AŞPA) Bürosu Azərbaycana "xüsusi dəvət edilmiş qonaq" statusunun verilməsi barədə qərar qəbul edib. Azərbaycan parlamenti Avropa Şurasında "xüsusi dəvət edilmiş qonaq" statusu almaq üçün quruma 1992-ci ilin yanvarında müraciət etmişdi.
2000-ci ildə - AŞPA-nın yay sessiyasında Azərbaycanın Avropa Şurasına üzvlüyü barədə tövsiyə qərarı qəbul edilib. AŞPA Siyasi Komitəsinin Azərbaycan üzrə məruzəçi Jak Bomelin (Fransa) hesabatı üzrə keçirilmiş səsvermədə 120 nəfər lehinə, 1 nəfər əleyhinə, 5 nəfər bitərəf olmaqla Azərbaycanın Avropa Şurasının tamhüquqlu üzvlüyünə qəbul edilməsinə dair müsbət rəy verilib.