986    

01/07/2017

1804-cü ildə - XIX əsrdə Ruslarla Qacarlar arasında ilk döyüş İrəvan xanlığının ərazisində, Eçmiədzin divarları yanında baş verdi. 12 topu olan 3600 nəfərlik piyada, süvari eskadronu və 2 kazak yüzlüyündən ibarət rus qoşunu 20 minlik İran qoşunu ilə qarşılaşdı. Rus qoşunları gürcü süvari dəstələrinin köməyi ilə üstünlük qazandılar.

1892-ci ildə - Görkəmli yazıçı Tağı Şahbazi (1892-1937) anadan olub. Povest və hekayələrində dini fanatizm, qadın azadlığı, mənəviyyat problemlərini təsvir edib. Stalin repressiyasının qurbanı olub.

1918-ci ildə - Azərbaycan Xalq Cümhuriyyəti Nazirlər Şurasının sədri və daxili işlər naziri Fətəli xan Xoyski ölkədə ilk polis bölümünün yaradılması barədə əmr verib. Bununla Azərbaycan polis orqanlarının əsası qoyulub. Prezident Heydər Əliyevin 1998-ci il 24 may tarixli fərmanı ilə hər il iyulun 2-si Azərbaycanda Polis günü kimi qeyd olunur.

1920-ci ildə - Tiflisdə RSFSR-in səlahiyyətli nümayəndəsinin iştirakı ilə sovet Azərbaycanı və Ermənistan arasında yaxın vaxtlarda Qazax şəhərində hər iki tərəfin nümayəndələrinin sülh konfransını çağırmaq haqqında saziş imzalandı. 

1921-ci ildə - Azərbaycanda pedaqoji kadrlar hazırlayan ilk ali məktəb - Azərbaycan Kişi Pedaqoji İnstitutu adı ilə təsis edilib. Sonralar V.İ.Lenin adına Azərbaycan Dövlət Pedaqoji İnstitutu adlanıb, hazırda Azərbaycan Pedaqoji Universiteti adı ilə fəaliyyət göstərir.

1940-cı ildə - Azərbaycan kolxozçuları xarici siyasi dustaqlara kömək etmək məqsədi ilə Beynəlxalq İnqilabçılara Kömək Təşkilatının təşkilat bürosunu yaratdılar. 

1962-ci ildə - Azərbaycanın Milli Qəhrəmanı, Şuşa özünümüdafiə batalyonunun komandiri, Qarabağ müharibəsi döyüşçüsü Ramiz Bulud oğlu Qəmbərov (1962-1992) Şuşa şəhərində anadan olmuşdur.

1971-ci ildə - Azərbaycanın Milli Qəhrəmanı Kərim Məhəmməd oğlu Kərimov (1971-1992) Şərur rayonunun Qarahəsənli kəndində anadan olmuşdur.

1992-ci ildə - Azərbaycanın Milli Qəhrəmanı, Qarabağ müharibəsi iştirakçısı Şikar Davud oğlu Aslanov (1970-1992) Xocavənd rayonunda gedən döyüşlərdə əməliyyat zamanı şəhid olur. 

1997-ci ildə - Prezident Heydər Əliyev Rusiya Federasiyasına rəsmi səfərə gedib. Səfər gedişində iki ölkə arasında "Dostluq, əməkdaşlıq və qarşılıqlı təhlükəsizlik haqqında" müqavilə, ikitərəfli münasibətlərin müxtəlif sahələri üzrə hökumətlərarası sazişlər imzalanıb. Bu arada Rusiyanın Ermənistana 1 milyard dollarlıq gizli silah verməsi faktının üzə çıxması şimal qonşumuzun Azərbaycanla dostluğa necə "sadiq olduğunu" göstərdi.