1029    

03/07/2017

1934-cü ildə - AMEA-nın Mərkəzi Botanika bağı - Nəbatat bağı və Nəbatat İnstitutu üçün Dağüstü parkdan (indiki "Şəhidlər xiyabanı"ndan) başlamış "Qurd qapısı"na gedən yol arasında 80-100 hektar sahə ayrılması və sahənin su ilə təchiz edilməsi barədə qərar qəbul edilir. Abşeron yarımadasının cənub-şərq hissəsində, dəniz səviyyəsindən 105-135 metr hündürlükdə salınan Bakı Nəbatat bağı Bakının cənub-şərq sisteminin yaşıl zonasına daxil olaraq, eyni zamanda onun yaşıl mədəni mərkəzlərindən biri hesab olunur. Bakı Nəbatat bağının elmi əhəmiyyəti kserofit floranın bütün məcmusu ilə nümayiş etdirilməsinin təkcə Sovetlər məkanında deyil, eləcə də Avropada analoqunun olmaması ilə müəyyən edilir. Bu Bakı şəhərinin coğrafi cəhətdən Asiya və Avropa florasının qovşağında yerləşməsi ilə izah olunur.

1940-cı ildə - Azərbaycanın görkəmli pianoçusu, əməkdar və xalq artisti, professor Zöhrab Əfrasiyab oğlu Adıgözəlzadə (1940-2012) Bakı şəhərində anadan olub.

1963-cü ildə - Kinorejissor, ssenari müəllifi, Azərbaycan Dövlət Film Fondunun direktoru, “Mədəniyyət” kanalının baş direktoru (2011-2013), Azərbaycan Respublikası Kinematoqrafçılar İttifaqının icraçı katibi (2012), İctimai Televiziyanın baş direktoru (2013-cü ildən), Azərbaycan Respublikasının Əməkdar İncəsənət Xadimi, Azərbaycan Dövlət Mədəniyyət və İncəsənət Universitetinin professoru Cəmil Elşad oğlu Quliyev Bakı şəhərində anadan olub. 

1990-cı ildə - Xalq şairi, Azərbaycan Yazıçılar İttifaqının üzvü,olan, Azərbaycan EA Nizami adına Dil və Ədəbiyyat İnstitutunda müdir müavini, "Ədəbiyyat qəzeti"nin redaktoru, Uşaqgəncnəşrdə redaktor işləyən Osman Sarıvəlli (Osman Abdulla oğlu Qurbanov) (1905 - 1990) Bakıda vəfat etmişdir. 

1992-ci ildə - Ağdərədə gedən qanlı döyüşlərin birində Azərbaycanın Milli Qəhrəmanı Koroğlu İsmayıl oğlu Rəhimov (1953-1992) qəhrəmancasına həlak olmuşdur. Bakının küçələrindən birinə Koroğlu Rəhimovun adı verilmişdir. 2010-cu ildə Mədəniyyət və Turizm Nazirliyinin “Salnamə” kinostudiyasında istehsal olunan “Qarabağ  qəhrəmanları”  silsiləsindən 4-cü sənədli film Azərbaycanın Milli Qəhrəmanı Koroğlu Rəhimova həsr olunmuşdur. 10 dəqiqəlik sənədli ekran əsəri Koroğlu Rəhimovun keçdiyi şücaətli döyüş yolunu əks etdirən xroniki kadrlar üzərində qurulmuşdur.

1993-cü ildə - Milli Məclis Ermənistanın Azərbaycana qarşı işğalçılıq müharibəsinin genişlənməsi ilə əlaqədar beynəlxalq təşkilatlara, dünya dövlətlərinə ünvanlanan bəyanat qəbul edib. Bəyanatda dünya birliyinə Ermənistanın hərbi təcavüzünü dayandırmaq üçün təsirli tədbirlər görmək çağırışı yer almışdı.

1994-cü ildə - Erməni terrorizmi Azərbaycana qarşı növbəti cinayətini həyata keçirib. Bakı metrosunun "28 May" və "Gənclik" stansiyaları arasında qatarda törədilən partlayış nəticəsində 13 nəfər həlak olub, 42 nəfər yaralanıb. Bundan bir qədər öncə (19 mart 1994) Bakı metrosunun "20 Yanvar" stansiyasında baş verən partlayış nəticəsində 14 nəfər həlak olmuşdu. İstintaq nəticəsində, separatçı “Sadval” təşkilatının üzvləri həbs olunmuş, istintaq zamanı məlum olmuşdur ki, “Sadval” separatçı təşkilatının həmin fəalları 1992-ci ildən etibarən dəfələrlə Ermənistan Respublikasında olmuşlar. Bu ölkənin Milli Təhlükəsizlik Baş İdarəsi  təşkilatın  formalaşmasında, maliyyələşməsində və silahlanmasında yaxından iştirak etmiş və orada onlara xüsusi təlim keçilmişdir. 

1997-ci ildə - Moskvada Rusiya Federasiyası və Azərbaycan arasında dostluq, əməkdaşlıq və qarşılıqlı təhlükəsizlik haqqında müqavilə imzalandı.

2008-ci ildə - Bakıda Azərbaycan və Rusiya prezidentləri İlham Əliyev və Dmitri Medvedevin görüşündə iki ölkə arasında tərəfdaşlığı möhkəmləndirmək barədə Birgə bəyannamə imzalanıb. Medvedev Rusiya Federasiyasının prezidenti seçildikdən sonra Cənubi Qafqaza ilk səfərini Azərbaycana etmişdi.