958    

06/07/2017

1916-cı ildə - Riyazi-fizika tənlikləri üzrə görkəmli mütəxəssis, diferensial tənliklər və funksional analiz kimi sahələrdə çalışmış riyaziyyatçı-alim, akademik, Azərbaycan SSR Əməkdar elm xadimi” fəxri adına layiq görülmüş Məcid Lətif oğlu Rəsulov (1916-1993) Şəki şəhərində anadan olmuşdur. 

1927-ci ildə - Hərbi xadim, tank qoşunları general-mayoru Valeh Əyyub oğlu Bərşadlı (1927-1998) Qubadlı rayonunun Eyvazlı kəndində dünyaya gəlmişdir. Zirehli Tank Qoşunları Hərbi Akademiyasını, SSRİ Silahlı Qüvvələri Baş Qərargahının Hərbi Akademiyasını bitirib, Sovet Ordusunda komandir vəzifələrində çalışıb. 1991-ci ilin sentyabrında Azərbaycan Respublikasının növbəti müstəqillik dövründə ilk müdafiə naziri təyin edilib, lakin üç ay sonra istefa verib. C.Naxçıvanski adına Hərbi Məktəbin rəisi işləyib.

1992-ci ildə - Ermənilər Zəngilanın rayon mərkəzini atəşə tutmuş, bütün yayı Zəngilanın kəndləri və rayon mərkəzi düşmən atəşinə məruz qalmışdı. 

1993-cü ildə - İqtisadi Əməkdaşlıq Təşkilatı (ECO) dövlət başçılarının İstanbulda keçirilən zirvə toplantısında Ermənistanın Azərbaycana hərbi təcavüzünü pisləyən bəyanat qəbul olunub. Sammit iştirakçıları Ermənistanı işğalçılıq müharibəsini dayandırmağa çağırıblar. Azərbaycan rəhbəri Heydər Əliyev ölkədəki ağır vəziyyətlə əlaqədar sammitdə iştirak etmirdi. ECO təşkilatına 10 müsəlman ölkəsi - Türkiyə, İran, Pakistan, Əfqanıstan, Mərkəzi Asiyanın beş respublikası və Azərbaycan - daxildir. 

1994-cü ildə - Azərbaycan Yazıçılar İttifaqının üzvü, Əməkdar İncəsənət Xadimi, yazıçı Məmmədhüseyn Rüstəm oğlu Əliyev(1925-1994) vəfat etdi. 

2004-cü ildə - Şair, jurnalist, Azərbaycan Yazıçılar Birliyinin üzvü Akif Səməd (Məmmədov Akif Səməd oğlu) (1959-2004) Bakıda vəfat etdi.