1106    

11/07/2017

1724-cü ildə - Osmanlı imperiyası ilə Rusiya arasında İstanbul müqaviləsi bağlanıb. Sənəddə Rusiya ilə Səfəvi dövləti arasında 1723-cü il Peterburq müqaviləsinin şərtləri təsdiq edilib. Həmin müqaviləyə əsasən, Səfəvilər Dərbənddən Ənzəliyədək Xəzəryanı bölgələri Rusiyaya güzəştə getmişdi (halbuki bu müqavilə Səfəvilər dövləti tərəfindən təsdiqlənməmişdi). İstanbul müqaviləsi ilə Osmanlı dövləti də bu bölgünü qəbul edib. Müqaviləyə görə, Rusiya Şimali Azərbaycanın Osmanlının nəzarətinə verilməsinə razılaşıb, Şirvan Osmanlının himayəsində müstəqil xanlıq statusu alıb.

1898-ci ildə - Mühəndis, Frayberq Dağ-Mədən akademiyasının məzunu Cavad bəy Cümşüd bəy oğlu Almuradov Yelizavetpol quberniyasının Cəbrayıl qəzasının Qaryagin dairəsinin Qorqan kəndində anadan olmuşdu.

1911-ci ildə - Görkəmli şair Mirzə Ələkbər Sabir (Ələkbər Zeynalabdin oğlu Tahirzadə) (1862-1911) vəfat edir. Şairin cənazəsi Şamaxıda "Yeddi günbəz qəbiristanı"nda dəfn olunur.

1920-ci ildə - Azərbaycan Kommunist (bolşevik) Partiyasının Mərkəzi Komitəsi Gürcüstan və Ermənistanla münasibətlər haqqında məsələni müzakirə edərək, onlarla danışıqları davam etdirməyi, lakin Gürcüstana neft verməməyi, Ermənistanla danışıqlarda isə RSFSR və Azərbaycan SSR missiyalarını birləşdirməyi qərara aldı. Elə həmin vaxt Türkiyə qoşunlarının hələ də qaldığı Naxçıvan haqqında məsələ müzakirə olundu. Hər cür münaqişənin qarşısını almaq üçün və Türkiyə qoşunlarının qalması haqqında məsələni nizamlamaq məqsədilə Türkiyə ilə danışıqlar aparmaq üçün nümayəndə heyətinin tərkibi təsdiq edildi.

1953-cü ildə - Azərbaycan Kommunist Partiyasının Mərkəzi Komitəsi və Bakı şəhər Komitəsinin birgə plenumunda Mircəfər Bağırovun Azərbaycan KP MK-nın 1-ci katibi vəzifəsindən azad olunması barədə qərar qəbul olunub. Bağırov 1956-cı ilin aprelində SSRİ Ali Məhkəməsinin Hərbi Kollegiyası tərəfindən ölüm cəzasına məhkum edilib, həmin ilin mayında güllələnib.

1972-ci ildə - Azərbaycan Silahlı Qüvvələrinin polkovnik-leytenantı, I Qarabağ müharibəsinin qazisi, 2016-cı ildə Aprel döyüşləri zamanı qəhrəmancasına şəhid olmuş və ölümündən sonra "İgidliyə görə" medalı ilə təltif edilmiş Raquf İbrahim oğlu Orucov (1972-2016) Ağdam rayonunun Cinli kəndində anadan olub.

1987-ci ildə - Azərbaycan Silahlı Qüvvələrinin kiçik giziri, 2016-cı ildə Aprel döyüşləri zamanı şəhid olan və ölümündən sonra "Hərbi xidmətdə fərqlənməyə görə" III dərəcəli medalı ilə təltif edilən Seymur Qulamhüseyn oğlu Baxışov (1987-2016) Sumqayıt şəhərində ailəsində anadan olub.

1992-ci ildə - Azərbaycanın Milli Qəhrəmanı, Qarabağ müharibəsi iştirakçısı Baxşeyiş Xanəhməd oğlu Paşayev (1936-1992) Xocalının Xanabad kəndi istiqamətində gedən döyüşdə şəhid olub. 

1993-cü ildə - Azərbaycan rəhbərliyinin tələbi ilə regiona gələn ATƏM-in Minsk qrupunun sədri Mario Raffaelli (İtaliya) erməni silahlı qüvvələrinin hücumlarına məruz qalan Ağdam rayonunda vəziyyətlə tanış olub. Sonra Xankəndi və Yerevana gedən ATƏM rəsmisi ermənilərin girovluqdan azad etdikləri azərbaycanlılarla Bakıya qayıdıb və Ermənistanın işğalının qarşısını almağa söz verib. Raffaellinin səfərinin "yekunu" olaraq iyulun 23-də Ağdam işğal olundu.