1199    

13/07/2017

1830-cu ildə - Rusiya çarı I Nikolay Azərbaycandan Sibirə və başqa yerlərə sürgün edilmiş şəxslərin bağışlanılması, onların müsadirə edilmiş torpaqlarının özlərinə qaytarılması haqqında qanun imzalayıb.

1889-cu ildə - Görkəmli maarif xadimi, pedaqoq, şair Xosrov Mirzə Əli oğlu Axundzadə (1889-1960) Şuşada anadan olub. Xosrov Axundzadə Qarabağın tanınmış pedaqoqlarından olub. Şuşa Mədəni Maarif Texnikumunun, digər təhsil ocaqlarının qurulmasında fəal iştirak edib.

1920-ci ildə - Azərbaycan Kommunist (b)Partiyasının MK bürosu siyasi, hərbi və iqtisadi xarakterli bir sıra məsələləri aydınlaşdırmaq üçün Azərbaycan SSR-in nümayəndəsi kimi Moskvaya - RSFSR Xalq Komisrları Sovetinə gedəcək B.A.Şahtaxtınskinin məruzəsi haqqında məsələni müzakirə etdi.

1926-cı ildə - Azərbaycanlı yazıçı və dramaturq Nəcəf bəy Fətəli bəy oğlu Vəzirov (1854-1926) Şamaxıda – Çuxuryurdda ürək çatışmamazlığından vəfat etmişdir.

1936-cı ildə - Azərbaycan kinooperatoru, kinorejissor, ssenari müəllifi, kino rəssamı, Azərbaycanın əməkdar incəsənət xadimi Rasim İsmayılov (1936-2004) Bakıda anadan olub.

1975-ci ildə - Azərbaycanın Milli Qəhrəmanı, Qarabağ müharibəsinin fəal iştirakçısı Arif Maasif oğlu Qədiməliyev (1975-1995) Ağstafa rayonunun Dağ Kəsəmən kəndində anadan olmuşdur.

1989-cu ildə - Dağlıq Qarabağ Muxtar Vilayətində azərbaycanlılar yaşayan kəndlərin, Naxçıvan MSSR-in blokadaya alınması, Ermənistandan Azərbaycanın sərhəd məntəqələrinin atəşə tutulması vəziyyəti daha da gərginləşdirirdi.

1992-ci ildə – Azərbaycan Respublikası ilə Oman dövləti arasında diplomatik münasibətlər qurulub. Oman dövləti Azərbaycanın müstəqilliyini 1991-ci il dekabrın 30-da tanıyıb.

1996-cı ildə - Azərbaycan Respublikasının Prezidenti Heydər Əliyev Avropa Şurası baş katibinin adına məktub göndərərək Azərbaycanın Avropa Şurasına tamhüquqlu üzv qəbul olunmaq və digər üzv dövlətlər kimi İnsan Hüquqlarının və Əsas Azadlıqlarının Müdafiəsi haqqında Avropa Konvensiyasına qoşulmaq arzusunda olduğunu bildirib.

2006-cı ildə -  Türkiyənin Aralıq dənizi sahilindəki Ceyhan (Adana vilayəti) limanında Bakı-Tbilisi-Ceyhan neft kəmərinin təntənəli açılışı keçirilib. Təntənəli mərasimdə Azərbaycan, Türkiyə və Gürcüstanın prezidentləri İlham Əliyev, Əhməd Necdət Sezər və Mixail Saakaşvili, layihədə təmsil olunan neft şirkətlərinin rəhbərləri, ümumilikdə 30-dək ölkənin nümayəndə heyəti iştirak etmişdi. 1999-cu ilin 18 noyabrında BTC-yə dair “İstanbul bəyannaməsi»nin imzalanması ilə başlanan çətin yol uğurla başa çatmışdı. Kəmərin uzunluğu 1768 km (443 km Azərbaycan, 249 km Gürcüstan, 1076 km Türkiyə ərazisində), gündəlik nəqletmə gücü 1 mln. barreldir. Neft kəməri 2008-ci ildən ixrac gücü ilə işləyir.