1092    

15/07/2017

1906-cı ildə - Bakı qubernatoru bütün yerli qəzetlərin redaktorlarına və mətbəələrə "Dövlət dumasının keçmiş deputatlarının müraciətini" çap etməyin qadağan olduğu barədə sərəncam göndərərək, onları inzibati qaydada ən sərt cəzalar veriləcəyi ilə hədələdi. Vıborq iclaslarının iştirakçılarına divan tutuldu. Onlar barəsində cinayət işi qaldırıldı. Deputatlar məhkəməyə verildi. Onları xalqa ünvanlanmış xüsusi müraciətlə "Rusiya əhalisini itaətsizliyə və qanun əleyhinə çıxmağa qızışdırmaq niyyətində olmaqda və bu müraciətin çoxsaylı nüsxələrini Rusiya hüdudlarında yaymaqda" təqsirləndirirdilər. 

1915-ci ildə - Tanınmış rəssam və heykəltəraş Cəlal Məhərrəm oğlu Qaryağdı (1915-2001) Şuşa şəhərində anadan olub. Azərbaycanın bir sıra mədəniyyət və ictimai xadimlərinin heykəl və büstlərinin (N.Nərimanov, M.Ə.Sabir və s.) müəllifidir.

1918-ci ildə - Xalq Cümhuriyyəti hökuməti azərbaycanlılara qarşı soyqırımı cinayətlərinin araşdırılması üçün Fövqəladə Təhqiqat Komissiyası yaradıb. Komissiya 1918-ci ilin mart qırğınları ilə yanaşı, XX əsrin əvvəlindən ermənilərin azərbaycanlılara qarşı törətdikləri digər qətliamlar haqqında çoxsaylı materiallar toplamış, Cümhuriyyət hökumətinin qərarı ilə 31 mart "Soyqırımı günü" elan edilmişdi. Azərbaycanın sovetləşməsindən sonra bu tarix gizlədildi.

1920-ci ildə - Azərbaycan İnqilab Komitəsi xalq ədliyyə komissarı B.A.Şahtaxtınskini fövqəladə səlahiyyətli nümayəndə təyin etdi və ona "RSFSR hökuməti ilə bütün məsələlər, istər siyasi, istərsə də iqtisadi məsələlər barədə danışıqlar aparmaq və sonradan təsdiq olunmaq şərti ilə, Azərbaycan SSR adından hər cür müqavilə və öhdəliklər imzalamaq üçün" mandat verdi.

1920-ci ildə - Azərbaycan Kommunist (bolşevik) Partiyasının Mərkəzi Komitəsinin bürosu mal mübadiləsi barədə müqavilə bağlamaq haqqında Gürcüstanın menşevik hökumətinin təklifıni (neftlə mübadilə etmək üçün parça, ayaqqabı, kağız və s. təklif olunurdu) müzakirə edərək, qəbul etmişdir.

1920-ci ildə - Azərbaycan Kommunist (bolşevik) Partiyası Nəriman Nərimanovun, Q.K.Orconikidzenin, Y.D.Stasovanın, Mirzə Davud Hüseynovun, Dadaş Bünyadzadənin, A.İ.Mikoyanın, XI Ordu Hərbi İnqilab Şurası nümayəndələrinin və B.V.Leqranın iştirakı ilə Ermənistanla sülh haqqında məsələni müzakirə edərək qərara aldı ki, "Qarabağ və Zəngəzur Azərbaycana birləşdirilməlidir". 

1925-ci ildə - Azərbaycanın xalq artisti, müğənni, lirik tenor, pianoçu, pedaqoq, professor Rauf İsrafil oğlu Atakişiyev (1925-1994) anadan olub. 1953-cü ildən Opera və Balet Teatrının solisti işləyib, bir çox xarici ölkələrdə çıxış edib.

1926-cı ildə - Xalq artisti, Azərbaycan teatr və kino aktrisası Sədayə İsmayıl qızı Mustafayeva (1926-2004) Şəki şəhərində anadan olmuşdur. Şəki, Ağdaş, Göyçay, Gəncə teatrlarında çalışıb, bir sıra kinofilmlərdə yaddaqalan obrazlar yaradıb.

1991-ci ildə - Azərbaycanın Milli Qəhrəmanı Nofəl Zahid oğlu Quliyev (1963-1991) şəhid olmuşdur. 

1992-ci ildə - Azərbaycan Respublikasının milli valyutasının - manatın dövriyyəyə buraxılması barədə prezident fərmanı verilib. Fərmana əsasən, Azərbaycan manatı avqustun 15-də dövriyyəyə buraxıldı.