1065
18/07/2017 1908-ci ildə - Səttərxanın başçılıq etdiyi inqilab (Məşrutə-Konstitusiya inqilabı) Təbrizdə qələbə çalıb. Səttərxanın fədailər dəstəsi şəhəri "ağ bayraqlar"dan təmizləyib, Təbriz inqilabın (1905-1911) mərkəzinə çevrilib. 1909-cu ildə Cənubi Azərbaycanda demokratik hakimiyyət orqanları qurulmağa başlandı. 1910-cu ilin martında Səttərxanın fədailəri Tehrana yürüşə başladılar, lakin İran monarxiyasının çar Rusiyasını köməyə çağırması ilə inqilab süqut etdi. Təbrizə daxil olan Rusiya qoşunları inqilabçılara divan tutdular.
1921-ci ildə - Azərbaycanın dövlət xadimi, siyasətçi, Azərbaycan Demokratik Respublikasında Daxili İşlər naziri (1918), Azərbaycan Demokratik Respublikasının Ticarət və Sənaye naziri müavini, Qarabağ xanlığının əsasını qoymuş Pənahəli xanın nəticəsi, Azad xanın oğlu Behbud xan Cavanşir (1877-1921) İstanbulda erməni terrorçusu Misak Torlokyan tərəfindən qətlə yetirilib.
1927-ci ildə - Azərbaycanın Əməkdar incəsənət xadimi, Respublikanın Xalq rəssamı, SSRİ Rəssamlıq Akademiyasının müxbir üzvü, professor, SSRİ Dövlət Mükafatı laureatı, heykəltəraş Tokay Həbib oğlu Məmmədov Bakıda anadan olub. Bakıda Üzeyir Hacıbəyovun, Nəsiminin, Füzulinin heykəllərinin müəllifidir. Azərbaycan Dövlət Rəssamlıq Akademiyasının müəllimi kimi gənc heykəltəraşların yetişməsinə öz töhfəsini verib.
1937-ci ildə - Dövlət xadimi, iqtisad elmləri doktoru, professor, Azərbaycan Respublikası Milli Məclisinin I və II çağırış deputatı Səttar İsmayıl oğlu Səfərov (1937 - 2011) Qərbi Azərbaycanın Vedi rayonunun Şirazlı kəndində anadan olmuşdur.
1988-ci ildə - SSRİ Ali Sovetinin Rəyasət Heyətinin Dağlıq Qarabağ münaqişəsinə həsr olunmuş geniş iclası keçirilib. M.Qorbaçovun sədrlik etdiyi iclasda Azərbaycan və Ermənistanın siyasi rəhbərliyi, hər iki respublikanın SSRİ Ali Sovetindəki deputatları iştirak ediblər. Gərgin mübahisələrlə keçən iclasda "Dağlıq Qarabağ barəsində məsələyə dair" SSRİ Ali Sovetinin Rəyasət Heyətinin qərarı qəbul olunub. Sənəddə Ermənistan SSR Ali Sovetinin Dağlıq Qarabağı ilhaq etmək barədə qərarının yolverilməz olduğu və onun ləğv edilməsinin zəruriliyi vurğulansa da, İrəvan bu çağırışı saya salmadı.