1029    

18/07/2017

1826-cı ildə - Qacar qoşunları Araz çayını keçərək Rusiyanın nəzarətində olan Şimali Azərbaycan torpaqlarına daxil oldu. Bu da Rusiya ilə növbəti müharibənin (1826-1828) başlanmasına səbəb oldu. İlk günlərdə rusların hərbi qərargahı yerləşən Şuşa qalasını mühasirəyə alan İran (Qacarlar) taxt-tacının şahzadəsi Abbas Mirzənin qoşunları sonradan geri çəkilməyə başladılar. Qacarlar 1804-1813-cü illər müharibəsinin əvəzini çıxmağa çalışsa da, yenə məğlub oldu. Türkmənçay müqaviləsinə əsasən (10 fevral 1828), Qacarlar öz nəzarətindəki İrəvan və Naxçıvan xanlıqlarını da Rusiyaya verməyə məcbur oldu.

1915-ci ildə - Tanınmış opera müğənnisi, xalq artisti Ağababa Balağa oğlu Bünyadzadə (1915-1974) anadan olmuşdur.

1919-cu ildə - Azərbaycan Xalq Cümhuriyyəti Parlamentinin qəbul etdiyi qanuna əsasən, Qazax, Nuxa, Şuşa, Qııba, Zaqatala, Salyan, Gəncə və Bakıda (sonuncu iki şəhərdə kişilər və qadınlar üçün) bir-birindən ayrı olan ikiaylıq pedaqoji kurslar açıldı və onlara dövlət xəzinəsindən 2390 min manat vəsait ayrıldı. Kursların hər birində ən azı 50 müəllim hazırlanmışdı. Xaricdən, əsasən Türkiyədən müəllimlər dəvət olunurdu. Texniki təhsilin təşkili üçün də tədbirlər görülürdü. Gəncə stansiyasında dəmir yol və teleqraf xidməti işçiləri hazırlayan kurslar açılmışdı. Salyanda açılacaq hidrotexniki təhsil müəssisəsinin layihəsi işlənib hazırlanmışdı. 

1920-ci ildə - Xalq Cümhuriyyətinin qurucularından biri, 1918-1920-ci illərdə Azərbaycan parlamentinin sədr müavini olmuş Həsən bəy Ağayev Tiflisdə erməni terrorçuları tərəfindən qətlə yetirilib. Cümhuriyyətin süqutundan sonra onun bir sıra xadimləri hələ rus işğalına məruz qalmamış Gürcüstana mühacirət etmiş və orada erməni terroru onları hədəf almışdı. Bir qədər əvvəl Xalq Cümhuriyyətinin baş naziri F.Xoyski də Tiflisdə qətlə yetirilmişdi.

1921-ci ildə - Azərbaycan MİK-in  Rəyasət Heyəti N.N.Nərimanovun Tiflisə səfəri haqqında məruzəsini dinlədi. O, Azərbaycan MİK-ə təklif etdi ki, əhaliyə geniş məlumat versinlər: "Dağlıq Qarabağ Sovet Konstitusiyası çərçivəsində başda icraiyyə komitəsi olmaqla, daxili özünüidarə hüququ verilməklə Sovet Azərbaycanının ayrılmaz hissəsi olaraq qalır". 

1930-cu ildə - Azərbaycan Xalq Komissarları Soveti "Azərbaycan SSR ali və ali texniki məktəblərinin yenidən qurulması, rayonlaşdırılması və onların  müvafiq  təsərrüfat  orqanları və xalq komissarlıqlarının sərəncamına verilməsi haqqında" qərar qəbul etdi. 

1940-cı ildə - Rusiya dövlət atom gəmiqayırması mərkəzinin baş direktoru (1993-2004) və prezidenti (2004-2010), "Sevmaş" maşınqayırma zavodunun direktoru (1988-2004), Rusiya qəhrəmanı (1995), Rusiya Federasiyası Dövlət mükafatının ikiqat laureatı (2000, 2006) Davud Hüseyn oğlu Paşayev (1940-2010) Moskva vilayətinin Ostaşovo kəndində anadan olmuşdur.

1990-cı ildə - Azərbaycan Respublikası Mavriki ilə diplomatik əlaqələr qurmuşdur. 

2007-ci ildə - Ermənistanın Dağlıq Qarabağda qurduğu marionet rejimdə növbəti siyasi şou - "prezident seçkisi" keçirilib. Qarabağ separatçılarının lideri vəzifəsində Akradi Qukasyanı Bako Saakyan əvəz edib. Azərbaycan bu seçkini qeyri-qanuni elan edib. Beynəlxalq təşkilatlar separatçıların "seçkisi"ni tanımadıqlarını bəyan ediblər.