"20 İYUL" TARIXIMIZDƏ
Ana səhifə > Xəbərlər > "20 İyul" tariximizdə
889    
20/07/2017

1918-ci ildə - Xalq Cümhuriyyəti və türk (Osmanlı) qüvvələrinin Nuru paşanın komandanlığı altındakı birgə Qafqaz İslam Ordusu daşnak-bolşevik "Bakı Kommunası" qoşunlarına daha bir zərbə endirərək Şamaxı şəhərini azad ediblər. Bu arada türk qoşunları cənubdan (indiki Neftçala rayonu ərazisi) Bakı istiqamətinə irəliləməyə başlamışdı.

1936-cı ildə - Tarixçi-arxeoloq, Azərbaycanşünaslar Birliyinin, Pakistan və Mərkəzi Asiya Elmi Assosiasiyasının üzvü, Azərbaycan Beynəlxalq Diaspora mərkəzinin elmi rəhbəri, “Miras” mədəni irsin öyrənilməsinə kömək ictimai birliyinin üzvü, AMEA-nın müxbir üzvü Vəli Hüseyn oğlu Əliyev Şəki şəhərində anadan olmuşdur.

1948-ci ildə - Azərbaycan kinematoqrafiyasının inkişafındakı xidmətlərinə görə Xalq artisti fəxri adına layiq görülmüş Ramiz Hacıağa oğlu Əzizbəyli Bakı şəhərində anadan olmuşdur. Ramiz Əzizbəyli Kinematoqrafçılar İttifaqının və Professional Kinorejissorlar Gildiyasının üzvü olaraq milli kinematoqrafıyanın ictimai həyatında fəal iştirak edən, ADMİU-nun dosenti kimi gənc kadrların hazırlanmasına, formalaşmasına öz töhfəsini verən, həmkarları və dostları arasında nüfuza, hörmətə malik sənətçidir.

1958-ci ildə - Azərbaycanın “Əməkdar elm xadimi” fəxri adına, “Lenin ordeni”, “Qırmızı Əmək Bayrağı” ordeni, “Qırmızı Ulduz” ordeni və metallarla təltif edilmiş tibb elmləri doktoru, akademik, Azərbaycan SSR EA-nın həqiqi üzvü Mir Əsədulla Mir Ələsgər oğlu Mirqasımov (1883-1958) Bakı şəhərində vəfat etmişdir. Azərbaycan EA-nın və Tibb Universitetinin təşkilatçılarından olmuşdur. İlk azərbaycanlı alim-cərrahdır. 

1990-cı ildə - Heydər Əliyev təyyarə ilə Moskvadan Bakıya qayıtdı.

1991-ci ildə - Azərbaycanın Milli Qəhrəmanı Vüqar Tofiq oğlu Hüseynov (1969-1991) Goranboy rayonunun Buzluq kəndi uğrunda gedən döyüşdə vuruşmuş və qəhrəmancasına həlak olmuşdur.

1995-ci ildə - “Neft sənayesi əlaçısı” döş nişanı, bir sıra medallarla təltif olunmuş, 1971-ci ildə ona “Azərbaycan Respublikasının Əməkdar mühəndisi” fəxri adı verilmiş Arif Şərif oğlu Şıxlinski (1929-1995) Qazax rayonunun İkinci Şıxlı kəndində vəfat etmişdir.

2001-ci ildə - Prezident Heydər Əliyev Milli Mətbuat, Teleradio və İnternet Şurasının yaradılması barədə fərman imzalayıb. Fərmana əsasən, yeni təsisat ölkədə kütləvi informasiya fəaliyyətinə ictimai nəzarəti təmin etməli idi. Sonradan beynəlxalq ekspertlərlə (o cümlədən Avropa Şurası) aparılan məsləhətləşmələrdən sonra dövlət tərəfindən yalnız Teleradio Şurasının yaradılması qərara alındı. Mətbuat Şurası isə 2003-cü ildə qeyri-hökumət qurumu kimi təsis edildi. 

2005-ci ildə - Azərbaycan Respublikasının Əməkdar incəsənət xadimi, bəstəkar Ədilə Hacıağa qızı Hüseynzadə (1916-2005) vəfat etmişdir.