1196    

21/07/2017

AMEA-nın Nizami Gəncəvi adına Ədəbiyyat İnstitutunun şöbə müdiri, professor Bədirxan Əhmədlinin "Azərbaycan mühacirət ədəbiyyatı: təşəkkülü, problemləri, şəxsiyyətləri" monoqrafiyası çapdan çıxıb.

Əsər Azərbaycanın istiqlalı və müstəqilliyi uğrunda mühacirətdə son dərəcə ağır şərtlər altında zəngin irs qoyub gedən dörd istiqlalçının – Məhəmməd Əmin Rəsulzadə, Mirzə Bala Məhəmmədzadə, Əhməd Cəfəroğlu və Gültəkinin (Əmin Abid) xatirəsinə ithaf olunub.

Beş bölümdən ibarət monoqrafiyada mühacirət ədəbiyyatının araşdırılma məsələləri, mühacirət mətbuatının inkişaf yolları, eləcə də "Əli və Nino" romanının müəllif gizlinləri faktlarla araşdırılıb. Kitabda Əli bəy Hüseynzadə, Əhməd bəy Ağaoğlu, Məhəmməd Əmin Rəsulzadə, Əhməd Cəfəroğlu, Mirzə Bala Məmmədzadə, Əbdülvahab Yurdsevər, Almas İldırım, Gültəkin (Əmin Abid) kimi milli yaddaşımızda mühüm rol oynamış simaların yaradıcılığına geniş yer verilib.

Nəşr Azərbaycan mühacirət ədəbiyyatının nəzəri məsələlərini, mərhələlərini, problemlərini və şəxsiyyətlərini əks etdirən ilk monoqrafiya olmaqla ədəbiyyatşünaslığımıza dəyərli töhfədir. 

mənbə: science.gov.az