1000    

26/07/2017

1920-ci ildə - İxtisaslı musiqiçi kadrlar kifayət qədər olmadığından Xalq Maarif Komissarlığı ilk mərhələdə "geniş zəhmətkeş proletar kütləsinin musiqi savadı" alması məqsədilə Bakının səkkiz fəhlə rayonunda şöbəsi olan vahid musiqi təhsili müəssisəsi - Xalq Konservatoriyası açdı. 

1934-cü ildə - Azərbaycan SSR Xalq Komissarları Soveti Hüseyn Rəhmanovun imzası ilə "Azərbaycan SSR-də təsviri incəsənət üzrə tədbirlər haqqında" qərar qəbul etdi. Bu qərara əsasan, respublika təsviri sənətinin vəziyyətini yaxşılaşdırmaq, eləcə də Azərbaycan SSR-in 15 illiyi münasibətilə rəssamların sərgisini hazırlamaq üçün 26 rəssamın Azərbaycan rayonlarına və neft mədənlərinə yaradıcılıq ezamiyyətlərı təşkil olundu. 

1938-ci ildə - Azərbaycan SSR-in yeni Konstitusiyasına uyğun olaraq respublikanın ərazi-inzibati bölgüsündə rayonlar şəbəkəsi qanunla təsdiqlənib. Bir sıra rayon və qəsəbələrin adları dəyişdirilib: Qaradonlu rayonu İmişli, Hil - Qusar, Zuvand - Lerik, Biləsuvar- Puşkin, Nərimanov - Xanlar, Vəryadüz - Yardımlı rayonları, Zubovka kəndi Əli Bayramlı şəhəri, Goranboy kəndi Qasım İsmayilov qəsəbəsi, alman icmasının yaşadığı Annino qəsəbəsi Şamxor, Yelenendorf qəsəbəsi isə Xanlar qəsəbəsi adlandırılıb.

1952-ci ildə - Azərbaycanın Milli Qəhrəmanı, Qarabağ müharibəsi iştirakçısı Asif Yusif oğlu Məhərrəmov, və ya Fred Asif (1952-1994) Ağdam şəhərində anadan olub.

1992-ci ildə - SSRİ Hərbi Dəniz Qüvvələrinin Xəzərdəki hərbi donanmasının Rusiya və Azərbaycan arasında bölüşdürülməsi başa çatıb. Ölkəmizin sərəncamına keçən hərbi gəmilərin üzərində Azərbaycanın üçrəngli bayrağı qaldırılıb. SSRİ dağıldıqdan sonra Xəzərdəki hərbi donanmanın bölüşdürülməsi üzrə danışıqlar 1992-ci ilin əvvəlində başlamışdı. Danışıqlar Xəzər hərbi donanmasının 25 faizinin və Bakı Hərbi Dənizçilik Məktəbinin Azərbaycana verilməsi ilə yekunlaşdı. Azərbaycanın Hərbi Dəniz Qüvvələrinin tarixi isə 1918-ci ilin 5 avqustundan hesablanır. Həmin gün Xəzərdə keçmiş Rusiya imperiyasına məxsus hərbi gəmilərin bazasında Xalq Cümhuriyyətinin hərbi dəniz donanması yaradılıb. 

1994-cü ildə - Gənclər, İdman və Turizm Nazirliyi yaradılmışdır.

1995-ci ildə - Azərbaycan Respublikasının “Şöhrət” ordeninə layiq görülmüş azərbaycanlı nasir, ədəbiyyatşünas, publisist, yazıçı, ssenarist, 1949-cu ildən Azərbaycan Yazıçılar Birliyinin üzvü, Azərbaycan komsomolu mükafatı laureatı (1976), filologiya elmləri namizədi (1954), Azərbaycanın xalq yazıçısı (1984), Azərbaycan Respublikası Ali Sovetinin deputatı (1986, 1990), M.F.Axundov adına ədəbi mükafat laureatı İsmayıl Qəhrəman oğlu Şıxlınski (İsmayıl Şıxlı) (1919-1995) vəfat etdi. 

2008-ci ildə - Əməkdar incəsənət xadimi, xalq rəssamı, professor, "Şöhrət" ordeni ilə təltif olunmuş Azərbaycan Rəssamlar İttifaqı İdarə Heyətinin sədri və Azərbaycan Ali Sovetinin deputatı Nadir Qəmbər oğlu Əbdürrəhmanov (1925-2008) vəfat etmişdir.

2013-cü ildə - Azərbaycan Respublikasının Xalq artisti” fəxri adına layiq görülmüş şərqin ilk opera yazan qadın bəstəkarı, 2004-cü ildə isə “Şöhrət” ordeni ilə təltif edilmiş Şəfiqə Qulam qızı Axundova (1924-2013) Bakı şəhərində vəfat etmişdir.