1051    

27/07/2017

1804-cü ildə - Rusiya ilə Qacarlar arasındakı müharibənin gedişində (1804-1813) ilk döyüş-Üçmüədzin döyüşü olub. İrəvan xanlığı ərazisində, Üçmüədzin kəndi yaxınlığında baş verən döyüşdə rus qoşunları məğlub olublar. Bunun ardınca, Qəmərli kəndi yaxınlığında ikinci döyüşdə də məğlub olan ruslar geri çəkiliblər. 

1826-cı ildə - Gəncədə Rusiya müstəmləkəçiliyi əleyhinə güclü üsyan baş verib. Bu, Gəncə xanlığının 1804-cü ildə Rusiya tərəfindən işğalından sonra çar üsul-idarəsinə qarşı ilk kütləvi çıxış idi. Üsyan rus qoşunları tərəfindən amansızlıqla yatırılıb.

1919-cu ildə - Müxtəlif idarələrdə neft məhsulları ilə bağlı sui-istifadə və cinayətləri təhqiq etmək üçün təsis olunmuş xüsusi təftiş-istintaq komissiyasına qəbul edilən yeni qanunla bütün hökumət müəssisələri, vəzifəli şəxslər və ictimai təşkilatlardan istənilən zəruri məlumatları almaq; hər bir şəxsin çağırılan zaman gəlməsini təmin etmək; hər bir şəxsə qarşı cinayət təhqiqatı qaldırmaq; poçt-teleqraf yazışmasına baxış və onları zəbt etmək; istintaq müddəti vəzifədən kənar etmək hüquqları verilirdi. 

1934-cü ildə - Musiqişünas, Bakı Musiqi Akademiyasının professoru, Azərbaycan Respublikası MTN-nin ixtisaslaşdırılmış orta musiqi məktəbinin direktoru, AR-nın əməkdar müəllimi Məmmədova Nahidə-Leyla Səid qızı (1934-2016) Bakı şəhərində anadan olmuşdur.

1937-ci ildə - Azərbaycan Dövlət Bankının ilk müdiri, iqtisadçı, etnoqraf, siyasi repressiya qurbanı Məhəmmədhəsən bəy Vəliyev-Baharlı (1896-1937) repressiyanın qurbanı olaraq güllələnmişdir.

1991-ci ildə - Azərbaycan musiqiçisi, pianoçu, əməkdar incəsənət xadimi (1977). Sənətşünaslıq elmləri namizədi (1966) Gülarə Əziz qızı Əliyeva (1933-1991) Bakı şəhərində vəfat edib. 

1997-ci ildə - Prezident Heydər Əliyev ABŞ-a ilk rəsmi səfərə gedib. Avqustun 6-dək davam edən səfər gedişində Azərbaycan prezidenti əvvəlcə Nyu-Yorkda BMT-nin baş katibi Koffi Annan, NATO-nun baş katibi Xavyer Solana ilə, ABŞ-ın biznes dairələri ilə görüşlər keçirmişdi. Avqustun 1-də Ağ evdə ABŞ prezidenti Bill Klintonla danışıqlardan sonra iki ölkə arasında münasibətlərin strateji tərəfdaşlıq səviyyəsinə yüksəldiyini elan edən Birgə bəyannamə imzalanıb. Bundan əlavə, Azərbaycanın ABŞ-ın "Shevron", "Exxon", "Mobil" və "Amoco" şirkətləri ilə neft müqavilələri də Ağ evdə imzalanıb.

2002-ci ildə - Prezident Heydər Əliyev Azərbaycan Ali Hərbi Təyyarəçilik Məktəbinin məzunlarının ilk buraxılışında iştirak edib. Ali Təyyarəçilik Məktəbi 1998-ci ildə Türkiyə Silahlı Qüvvələrinin köməyi ilə yaradılmışdı.