1127    

27/07/2017

1723-cü ildə - I Pyotrun göndərdiyi rus qoşunları Bakını işğal edib. Bakı hakimi Məhəmmədhüseyn bəy sürgünə göndərilib. Bu, Rusiya imperiyasının Azərbaycan üzərinə birinci işğalçılıq yürüşü idi. 1735-ci ildə ruslar Səfəvi dövləti ilə müqaviləyə görə, Azərbaycan torpaqlarını tərk etdilər. Rusiya imperiyasının Azərbaycan üzərinə ikinci və həlledici yürüşü XIX əsrin əvvəlində başlandı.

1897-ci ildə - Azərbaycan Xalq Cümhuriyyəti Parlamentinin xüsusi qərarına əsasən, dövlət hesabına ali təhsil almaq üçün xaricə göndərilmiş tələbələrdən biri Abbas Mirzə Əhməd oğlu Əliyev (1897-1972) Şamaxı şəhərində anadan olub. 

1920-ci ildə - Qızıl ordunun süvari polku Naxçıvana daxil oldu. Naxçıvan bolşeviklər tərəfindən işğal edildi. Naxçıvan Sovet Sosialist Respublikası elan edildi. Azərbaycan K(b)P MK Siyasi Bürosu Naxçıvandakı vəziyyəti müzakirə edərək, Azərbaycan İnqilab Komitəsinə tapşırdı ki, Naxçıvan məsələsini prinsipial şəkildə aydınlaşdırsın. Ermənistan ilə Azərbaycan arasında sərhədləri müəyyənləşdirsin və Naxçıvan diyarında sovet hakimiyyəti qurulmasına kömək göstərilməsi haqqında XI Qızıl ordunun Hərbi inqilab şurası ilə danışıqlar aparsın". 

1931-ci ildə - Məşhur Azərbaycan neftçisi, geoloq Fərman Qurban oğlu Salmanov (1931-2007) Şəmkirdə anadan olub. 1960-1980-ci illərdə Qərbi Sibirdə 100-dən çox neft-qaz yatağının kəşfində iştirak edib, SSRİ Elmlər Akademiyasının müxbir üzvü olub.

1935-ci ildə - Görkəmli bəstəkar, Azərbaycanın xalq artisti Vasif Zülfüqar oğlu Adıgözəlov (1935-2006) Bakıda məşhur muğam ustası Zülfüqar Adıgözəlovun ailəsində anadan olub.

1937-ci ildə - Azərbaycan bəstəkarı, dirijor, pedaqoq, folklorşünas, ictimai xadim. Azərbaycan musiqisində Avropa stilində ilk operanın müəllifi ("Nərgiz", 1935), Azərbaycanın əməkdar incəsənət xadimi (1936) Müslüm Əbdülmüslüm oğlu Maqomayev (1885-1937) Nalçikdə xəstəlikdən vəfat edib.  

1947-ci ildə - Filologiya üzrə elmlər doktoru, dosent, AMEA-nın müxbir üzvü Adil Nəsib oğlu Bağırov (1947-2016) Naxçıvan Muxtar Respublikasının Şahbuz rayonunun Nursu kəndində anadan olub.

1973-cü ildə - Azərbaycanın Milli Qəhrəmanı Roman Yasəf oğlu Yusifov (1973-1995) Dəvəçi rayonunda anadan olmuşdur. 

1990-cı ildə - Azərbaycanda demokratik qüvvələrin ilk ümumrespublika forumu keçirilib. Parlament seçkiləri (sentyabr 1990) ərəfəsində bir araya gələn 20-dən çox ictimai təşkilatın iştirakı ilə "Demokratik blok" yaradılıb.

1993-cü ildə - Şair, tənqidçi, ədəbiyyatşünas, tərcüməçi, 1950-ci ildən Azərbaycan Yazıçılar İttifaqının üzvü, Azərbaycan Dövlət mükafatı laureatı (1984), filologiya elmləri doktoru (1985), Azərbaycan Milli Yaradıcılıq Akademiyasının müxbir üzvü (1991) Qasım Xansuvar oğlu Qasımzadə (1923-1993) Bakıda vəfat etmişdir.

2001-ci ildə - Türkmənistan Azərbaycanın "Əsrin müqaviləsi" çərçivəsində istismar etdiyi "Azəri" və "Çıraq" yataqlarının, həmçinin "Kəpəz" neft-qaz strukturlarının ona məxsus olması barədə Azərbaycana nota göndərib. Bakı buna cavab olaraq ilk iki yatağın istisnasız olaraq Azərbaycana məxsus olduğunu, "Kəpəz" strukturu ilə bağlı isə konstruktiv danışıqlara hazır olduğunu bildirib.