1094
29/07/2017 1599-cu ildə - Səfəvilər dövlətinin hökmdarı Şah I Abbas Herat yaxınlığında Dinməhəmməd xan Özbəkin ordusunu məğlub etdi və Mavərənnəhri öz təsiri altına aldı.
1694-cü ildə - Səfəvilər dövlətinin hökmdarı Şah Sülеyman Səfəvi (II Səfi) (1647-1694) vəfat edib.
1804-cü ildə - İrəvan yaxınlığında, Qəmərli kəndinin yanında Qacarlarla ruslar arasında növbəti döyüş baş verdi. Rus qoşunları tutduqları mövqeləri qoruyub saxlaya bilsələr də azuqənin çatışmazlığı, qoşunların azlığı, habelə Qacar qoşunlarının kiçik rus dəstəsi yerləşmiş Gəncəyə tərəf irəliləməsinə görə sentyabrın 4-də İrəvandan geri çəkildilər.
1919-cu ildə - İyulun 29-30-da Azərbaycan Xalq Cümhuriyyətinin Baş Naziri N.F.Usubbəyov və hərbi nazir S.S.Mehmandarov Gəncə general-qubernatoru X.A.Rəfibəyovun və hərbçi dəstənin müşayiəti ilə Qarabağda olarkən ən hörmətli və əziz qonaq kimi qarşılanmışdılar. Baş Nazir N.F.Usubbəyov 29 iyulda Xankəndində qarnizon qoşunlarının paradını qəbul etdikdən sonra, 30 iyulda səhər Şuşaya təşrif gətirmişdilər.
1921-ci ildə - Azərbaycan Mərkəzi İcraiyyə Komitəsi respublika zəhmətkeşlərinə müraciət etdi. N.Nərimanov (sədr), M.Hacıyev, S.M.Əfəndiyev, D.Bünyadzadə, H. Sultanov və başqalarından ibarət heyətdə "Aclara kömək" Komitəsi yaradıldı.
1924-cü ildə - Aktyor, rejissor, Azərbaycan SSR Əməkdar incəsənət xadimi, Azərbaycan Dövlət Mədəniyyət və İncəsənət Universitetinin "Aktyor sənəti" fakültəsinin dekanı, professor Əşrəf Hacı oğlu Quliyev (1924 - 1994) Bakıda anadan olub.
1939-cu ildə - Azərbaycan Respublikasının əməkdar artisti, rəssam, aktyor, müğənni Əli Həsən oğlu Haqverdiyev (1939-1992) Bakı şəhərində Azərbaycanın görkəmli rəssamları Həsən Haqverdiyev və Güllü Mustafayevanın ailəsində dünyaya göz açıb.
1961-ci ildə - Azərbaycanın Milli Qəhrəmanı Sadıq Dayandur oğlu Hüseynov (1961-1992) Ağcabədi rayonunun Xocavənd kəndində doğulmuşdur.
1989-cu ildə - Azərbaycandan Ermənistana gedən dəmir yolu xətti Ermənistan ərazisində qatarlara edilən hücumlar nəticəsində bağlanıb. Azərbaycanın Naxçıvan Muxtar Respublikasının Ermənistan tərəfindən blokadaya alınması başlanıb.
1993-cü ildə - BMT-nin Təhlükəsizlik Şurası Ermənistan-Azərbaycan münaqişəsinin genişlənməsi və Ağdamın işğalı ilə bağlı 853 saylı qətnamə qəbul edib. Qətnamədə erməni silahlı qüvvələrinin Ağdam rayonundan və Azərbaycanın işğal olunmuş bütün ərazilərindən çıxarılması tələb olunurdu. Lakin sənəddə Ermənistanın adı təcavüzkar kimi hallanmırdı. Bundan öncəki 822 saylı və sonrakı 874, 884 saylı qətnamələr də təxminən eyni məzmunda qəbul olunmuşdur.
1999-cu ildə - "Dövlət gənclər siyasəti haqqında" Proqram qəbul edildi.
2002-ci ildə - Milli Məclisin növbədənkənar sessiyasında prezident Heydər Əliyevin təklif etdiyi Azərbaycan Konstitusiyasına dəyişikliklər layihəsi bəyənilib. Konstitusiyaya dəyişikliklərlə bağlı referendum 2002-ci il avqustun 24-də keçirildi. Əsas Qanuna dəyişikliklər insan hüquqlarının və azadlıqlarının qorunmasının əlavə təminatları, seçki sistemi, dövlət hakimiyyəti orqanlarının fəaliyyətinin tənzimlənməsi, məhkəmə hakimiyyətinin rolunun artmasını və s. nəzərdə tuturdu.