1045    

03/08/2017

1920-ci ildə - Quba qəzasının Dəvəçi və Quba dairələrində Həmdulla Əfəndinin və Mayılın başçılığı altında sovetləşmə əleyhinə kəndli çıxışları başlanıb. Bu üsyanın yatırılmasından sonra Azərbaycanda bolşevik işğalına qarşı kütləvi çıxışlar nisbətən səngidi. Bundan sonra respublikada güclü antisovet çıxışları 20-ci illərin sonu-30-cu illərin əvvəlində kütləvi kolxozlaşma zamanı özünü göstərdi.

1941-ci ildə - Böyük Vətən müharibəsində Sovet Ordusu tərkibində azərbaycanlılardan ibarət qoşun birləşməsi - 402-ci diviziya təşkil olunub.

1941-ci ildə - SSRİ və Böyük Britaniya qoşunlarının kontingenti Hitler Almaniyası qüvvələrinin cənub cinahından (Türkiyə və İran üzərindən) Sovet İttifaqına mümkün hücumunu önləmək üçün İran (Cənubi Azərbaycan) ərazisinə yeridilməyə başlamışdı. Sovet qoşunları Cənubi Azərbaycanda 1945-ci ilədək qaldı.

1943-cü ildə -  II Dünya Müharibəsinin gedişində baş verən "rels müharibəsi"nin həyata keçirilməsində 73853 nəfər Belorusiya partizanı, o cümlədən də Azərbaycandan olan bir çox döyüşçülər - Q.A.Abbasov,  R.P.Babayev,  İ.N.Qocayev,  M.M.İsayev,  E.Q.İsmayılov, M.B.Hənifəyev, Q.Q.Məmmədov, S.B.Mamin, N.M.Monaxov iştirak etmişdir. Onlar Belorusiya Mərkəzi Partizan Qərargahının rəisi P.K.Ponomarenkodan şəxsən təşəkkür almış, SSRİ-nin müxtəlif orden və medalları ilə təltif edilmişlər.

1944-cü ildə - Sovet İttifaqı Qəhrəmanı Qəzənfər Qulam oğlu Əkbərov (1917-1944) Belarusun Volojin şəhəri ətrafında gedən döyüşlərdə misilsiz qəhrəmanlıq göstərmişdir. Onun başçılığı altında üç nəfər topçu almanların beş ağır tankına qarşı qeyri-bərabər döyüşə girmişdilər. Bir neçə saat davam etmiş döyüşdə düşmənin 4 tankı, 60-dan artıq əsgər və zabiti məhv edilmişdi. Bu döyüşdə Q. Q. Əkbərov qəhrəmanlıqla həlak olsa da, düşmənin hücumunu dayandırmağa və beləliklə də öz döyüş yoldaşlarının mühasirəyə düşməsinin qarşısını almağa nail olmuşdu.

1987-ci ildə - Yazıçı, Azərbaycan SSR Yazıçılar İttifaqının üzvü Məmməd Çələbiyev (1923-1987) Şəki şəhərində vəfat etmişdir.

1993-cü ildə - Bakıda ilk beynəlxalq peyk rabitə sisteminin açılışı olub. Amerika Birləşmiş Ştatlarının "IDB" şirkətinin quraşdırdığı kompleks Azərbaycanı beynəlxalq telekommunikasiya sisteminə qoşub. Açılış mərasimində Ali Sovetin sədri, prezident səlahiyyətlərini həyata keçirən Heydər Əliyev iştirak edib.

1999-cu ildə - Azərbaycanla Myanma (Birma) dövləti arasında diplomatik münasibətlərin qurulması haqqında protokol imzalanıb.   

2010-cu ildə -  AMEA-nın həqiqi üzvü, “Şöhrət” və “İstiqlal” ordenləri ilə təltif edilmiş, akademik Fuad Feyzulla oğlu Qasımzadə (1929-2010) Bakı şəhərində ağır xəstəlikdən sonra vəfat etmiş, II Fəxri Xiyabanda dəfn edilmişdir. Əsas tədqiqat sahəsi Azərbaycan fəlsəfə ictimai fikri, sosial fəlsəfə, ontologiya və idrak nəzəriyyəsi, estetika olmuşdur.