1036    

04/08/2017

1783-cü ildə - Kartli və Kaxetiya çarlıqlarının çar Rusiyasının himayəsinə keçməsi barədə Georgiyevsk traktatı imzalanıb. Sənədə əsasən, gürcü çarlıqlarının tərkibindəki Azərbaycan torpaqları (Borçalı, Şəmsəddil və s.) da Rusiyanın nəzarətinə keçdi. Gürcü çarı II İrakli ilə Rusiyanın Qafqaz korpusunun rəhbəri general Potyomkin tərəfindən imzalanan anlaşmaya görə, Rusiya Kartli və Kaxetiya çarlıqlarını Osmanlı və Qacarların hücumlarından qorumaq barədə öhdəlik götürmüşdü. Georgiyevsk anlaşması 1801-ci ildə Kartli və Kaxetiya çarlıqlarının Rusiya tərəfindən işğalı üçün əsas oldu.

1915-ci ildə - Görkəmli Azərbaycan-sovet teatr və kino aktyoru, Azərbaycan SSR xalq artisti Məmmədrza Şeyxzamanov (1916-1984) Gəncədə doğulub.

1918-ci ildə - General Denstervilin komandanlıq ediyi ingilis hərbi dəstəsi Bakıya gəlib. Bakıdakı "Sentrokaspi" hökuməti Qafqaz İslam Ordusunun şəhərə hücumunun qarşısını almaq üçün İrandakı ingilis qoşunlarını köməyə çağırmışdı. Ənzəli limanından yola çıxan ingilis desantının əsas hissəsi avqustun 9-17-də Bakıya gəldi.

1919-cu ildə - İngilis komandanlığı Azərbaycan və Gürcüstan sərhədləri boyunca üçüncü demarkasiya xəttini müəyyən etdi. Nəticədə Dağıstan tamamilə Könüllülər Ordusunun nəzarəti altında qaldı. Bu zaman Cənubi Qafqaz respublikalarına təkid edilirdi ki, ağqvardiyaçı qoşunlara qarşı hər hansı hücum hərəkətindən çəkinsinlər və general Denikinə kömək göstərsinlər. Britaniya komandanlığının bu addımı onun həm Denikin ordusunun arxadan təhlükəsizliyini təmin etmək, həm də Cənubi Qafqazda sülhü və sabitliyi saxlamaq niyyətində olmasından xəbər verirdi. 

1919-cu ildə - Avqust ayının əvvəllərində artıq formalaşdırılmış Lənkəran dəstəsi avqustun 4-də Azərbaycan Xalq Cümhuriyyətinin hərbi nazirinin imzaladığı müvafiq əmrlə Ümumi Qərargahın rəisi general-mayor Həbib bəy Səlimovun komandanlığına həvalə olundu və ona göstəriş verildi ki, dəstənin tərkibinə daxil olan hissələrlə Hacıqabul, Salyan, Pokrovsk, Prişib və Lənkəran marşrutu ilə Lənkəran qəzasına doğru irəliləməli, orada qayda-qanunu və sakitliyi bərqərar etməlidir. Qeyd edək ki, yürüşə səbəb ağqvardiyaçı rus zabitlərinin rəhbərliyi altında olan qüvvələrin Lənkəranda AXC hökümətinə qarşı qiyam qaldırması idi.   

1922-ci ildə - Osmanlı İmperiyası tarixində əhəmiyyətli rol oynamış türk hərbçisi və siyasi xadim Ənvər Paşa (1881-1922) Tacikistanda bolşeviklərə qarşı mübarizədə həlak oldu.  

1926-cı ildə - Kino bəstəkarı, musiqi redaktoru Nazim Ağalar oğlu Əliverdibəyov (1926-1986) Bakıda anadan olmuşdur. 

1943-cü ildə - Azərbaycan Respublikasının Əməkdar artisti, xalq artisti, Prezident təqaüdçüsü Ramiz Ağarza oğlu Məlikov Bakıda doğulmuşdur.

1944-cü ildə - Əmək veteranı, sənətşünaslıq doktoru, Azərbaycan Rəssamlar İttifaqının üzvü, AMEA Terminologiya Komitəsinin üzvü Kübra Muxtar qızı Əliyeva Ağdam rayonunda anadan olmuşdur.  

1992-ci ildə - Azərbaycanla Portuqaliya (ölkəmizin müstəqilliyini 1992-ci il yanvarın 7-də tanıyıb) arasında diplomatik münasibətlər qurulub.

2001-ci ildə - Nasir, ssenarist, kino redaktoru. Azərbaycan Yazıçılar Birliyinin üzvü, Kinematoqrafçılar Birliyinin üzvü, Azərbaycan SSR dövlət mükafatı laureatı, Əməkdar Mədəniyyət İşçisi Əhmədağa Əkbər oğlu Qurbanov (1926-2001) Bakıda vəfat etmişdir.

2003-cü ildə - Milli Məclisin növbədənkənar sessiyasında ARDNŞ-in 1-ci vitse-prezidenti, millət vəkili İlham Əliyevin baş nazir vəzifəsinə təyinatına razılıq verilib. Qərar səsvermədə iştirak edən 101 deputatın yekdil səsi ilə qəbul edilib. Həmin gün dövlət başçısı Heydər Əliyev Konstitusiyanın 109-cu maddəsinə əsasən, İ.Əliyevin baş nazir təyin olunması barədə fərman imzalayıb. Prezidentin digər fərmanı ilə A.Rasizədə baş nazir vəzifəsindən azad olunaraq baş nazirin 1-ci müavini təyin edilib.  

2015-ci ildə - Görkəmli aktrisası, əməkdar artist Tanilla Aysayevna Əhmərova (1950-2015) uzun sürən xəstəlikdən sonra Bakıda vəfat etmişdir.[