986    

05/08/2017

1895-ci ildə - Görkəmli alim, cərrah, ictimai xadim, Azərbaycanda tibb təhsili və səhiyyənin təşkilatçısı, respublikada cərrahlıq elmi məktəbinin banilərindən biri Mustafa Ağabəy oğlu Topçubaşov (1895-1981) anadan olub. O, Azərbaycan SSR EA akademiki (1945), Bolqarıstan Xalq Respublikası EA-nın müxbir üzvü (1951), SSRİ Tibb Elmləri Akademiyasının akademiki (1960), SSRİ Dövlət mükafatı laureatı (1943), Sosialist Əməyi Qəhrəmanı (1975), Azərbaycan SSR əməkdar elm xadimi (1940), Azərbaycan SSR EA vitse-prezidenti (1951-1956 və 1969-1981), Azərb. SSR Ali Sovetinin sədri (1955-59 və 1967-71), Azərbaycan SSR Ali Sovetinin (1-10-cu çağırışdan) deputatı olub. 

1906-cı ildə - Qacar hökmdarı Müzəfərəddin şah ölkədə başlanan inqilab dağlasını səngitmək üçün Konstitusiyanın hazırlanması barədə fərman verib. Konstitusiyanın qəbulu Qacar dövlətində1905-ci ildə başlanan və əsas liderlərindən biri Səttarxan olan inqilabın əsas tələblərindən idi. Konstitusiya 1906-cı ilin dekabrında qüvvəyə mindi və Qacar dövləti konstitusiyalı monarxiyaya çevrildi.

1918-ci ildə - Rusiya imperiyasının Xəzərdəki hərbi gəmilərinin bazasında Azərbaycan Xalq Cümhuriyyətinin hərbi donanması təşkil olunub. Donanma ilk mərhələdə 6 qayıq və gəmidən ibarət olub. Sovetləşmədən sonra Qırmızı donanma adlandırılan hərbi-dəniz qüvvələri bolşevik Rusiyasının (daha sonra SSRİ-nin) Xəzər Hərbi Donanmasının tərkibinə daxil olub. SSRİ-nin dağılmasından sonra donanma Rusiya və Azərbaycan arasında bölünüb və 1992-ci ilin iyulunda Azərbaycan hərbi gəmiləri ölkəmizin bayrağı altında reydə çıxıblar. Prezident H. Əliyevin 1996-cı ildə verdiyi fərmanla 5 avqust Azərbaycanda Hərbi donanma günü kimi qeyd olunur.   

1920-ci ildə - Azərbaycan İnqilab Komitəsi respublika xalq təsərrüfatının bərpası üçün ixtisaslı işçi kadrları hazırlamaq məqsədilə texniki-peşə təhsili Komitəsi təsis etdi. 

1928-ci ildə - Coğrafiyaşünas alim, hidroloq, coğrafiya elmləri doktoru (1977), professor (1978) Ramazan Baxşəli oğlu Tarverdiyev (1928-1983) indiki Hacıqabul rayonunun Navahı kəndində anadan olmuşdur.

1937-ci ildə - Türkiyənin Bilkənd Universitetinin professoru, "Şöhrət" ordenli prezident təqaüdçüsü, Azərbaycanın xalq artisti Sərvər Soltan oğlu Qəniyev (1937-2010) Bakı şəhərində anadan olmuşdur.

1947-ci ildə - Biologiya elmləri doktoru, Professor, AMEA-nın müxbir üzvü (2001) İbrahim Vahab oğlu Əzizov Zaqatala rayonunun Qarqay kəndində anadan olub.

1958-ci ildə - Azərbaycan Respublikasının Əməkdar Rəssamı, UNESCO Rəssamlar İttifaqının üzvü, akademik Sakit Məmmədov Neftçalada anadan olmuşdur.