997
05/08/2017 1723-cü ildə - Rusiya çarı I Poytr Xəzər dənizini və Azərbaycanı ələ keçirmək planlarını reallaşdırmağa başlayıb. Rusiya ekspedisiyasının Xəzər yürüşü zamanı Azərbaycanın sahil əraziləri, o cümlədən Bakı işğal olunub. Lakin Rusiya qoşunları az sayda olduğundan burada çox duruş gətirə bilməyərək geri qayıtdılar. Bu yürüşdən sonra I Poytr Azərbaycan torpaqlarının (bütövlükdə Cənubi Qafqazın) ələ keçirilməsi ilə bağlı "Vəsiyyətnamə"sini elan etdi.
1832-ci ildə - Azərbaycanın görkəmli şairəsi Xurşidbanu Natəvan (1832-1897) Şuşada anadan olub. Sonuncu Qarabağ xanı Mehdiqulu xanın qızı, İbrahimxəlil xanın nəvəsi olan və xalq arasında "Xan qızı" deyə çağırılan Natəvan istedadlı şairə olmaqla yanaşı, xeyriyyəçiliyi ilə də tanınıb, imkansızlara əl tutub, Şuşaya su kəməri çəkdirib.
1919-cu ildə - Versal konfransında Azərbaycanın, Gürcüstanın və Dağlı Respublikası nümayəndələrinin birgə iclasında xarici dövlətlərə oriyentasiya məsələsi müzakirə edildi. Müzakirələrin gedişində bir sıra təkliflər irəli sürüldü. Əvvəlcə göstərildi ki, Azərbaycan və Gürcüstan nümayəndələri Millətlər Cəmiyyətinə müraciət etsin, mandatı qəbul edən ölkə Millətlər Cəmiyyəti tərəfindən müəyyən edilsin. Öz ölkəsinin İngiltərədən başqa heç bir oriyentasiyası olmadığını söyləyən M.H.Hacınski sonra təklif etdi ki, Azərbaycanın mandatını götürmək İngiltərədən xahiş edilsin. Gürcüstan nümayəndələri də bu təklifi dəstəklədilər. Lakin iclasda qeyd edildi ki, bu müraciət digər dövlətləri incik salmayan bir formada olmalıdır. Ona görə də tərəflər əvvəl İngiltərə tərəfinin fikrini öyrənmək, sonra isə Millətlər Cəmiyyətinə müraciət etmək qənaətinə gəldilər.
1920-ci ildə - Azərbaycan Xarici İşlər Komissarlığının Qacar İranına verdiyi notada Qacar İranın Azərbaycana edilən daimi hücumlarının qarşısını almasını tələb edilirdi.
1923-cü ildə - Qarabağın Dağlıq hissəsində muxtar vilayət yaradılması ilə əlaqədar Azərbaycan MİK qərara aldı: Qarabağın qalan hissəsində Ağdam, Cəbrayıl və Kürdüstan qəzaları yaradılsın. Eyni zamanda hər bir qəzanın mərkəzi və ərazi tərkibi müəyyənləşdirildi.
1926-cı ildə - Xalq şairi, Azərbaycan Demokrat Firqəsi Mərkəzi Komitəsində təlimatçı, ADF-nin Bakı şəhər komitəsinin birinci katibi, Cənubi Azərbaycan Yazıçılar Cəmiyyətinin sədri vəzifəsində işləmiş Söhrab Əbülfəz oğlu Tahir (1926-2016) Cənubi Azərbaycanın Astara şəhərində sənətkar ailəsində anadan olmuşdur.
1956-cı ildə - Azərbaycan Milli Qəhrəmanı Zakir Nüsrət oğlu Məcidov (1956-1992) ekipaji ilə birgə üç dəfə uçuş edərək, ermənilərin döyüş əhəmiyyətli Kasapet yüksəkliyindəki mövqelərini darmadağın etmiş, növbəti, dördüncü dəfə uçuş əmrini də böyük hünər, igidlik göstərərək yerinə yetirmişdir. Bir-birinin ardınca ona tuşlanan raket zərbələri vertolyotu ciddi zədələmiş, Mİ-24 vertolyotunun cəsur heyət üzvləri və baş komandir Zakir Məcidov qəhrəmancasına şəhid olmuşdur.
1978-ci ildə - Sovet dövründə Azərbaycanda milli hərəkatçı, memar, rəssam Nofəl Şərif oğlu Tahirzadə (1955-1978) Saranskda bir göldə çimərkən müəmmalı şəkildə boğularaq həlak olub.
1982-ci ildə - Yazıçı, publisist və Türkiyənin dövlət və siyasi xadimi Səməd bəy Əhməd bəy oğlu Ağaoğlu (1909-1982) dünyasını dəyişmişdir.
1992-ci ildə - Azərbaycanın Milli Qəhrəmanı Bəylər Tapdıq oğlu Ağayev (1969-1992) Xanlıq kəndi uğrunda düşmənin xeyli canlı qüvvəsini və hərbi texnikasını məhv edərək qəhrəmanlıqla şəhid olmuşdur.
1992-ci ildə - Azərbaycanın Milli Qəhrəmanı, Qarabağ müharibəsi iştirakçısı Məzahir İzzət oğlu Rüstəmov (1960-1992) şəhid olub.
1993-cü ildə - Ermənistan silahlı qüvvələrinin Füzuli rayonu istiqamətində geniş hücumu başlanıb. Erməni qoşunlarının hissələri Məngələnata yüksəkliyini ələ keçirərək Füzuli şəhərinə yaxınlaşıblar. Azərbaycan Milli Ordusunun hissələri hücumu, çətinliklə də olsa dəf edərək erməni qüvvələrini strateji əhəmiyyətli yüksəkliklərdən vurub çıxarıblar. Lakin iki həftə sonra erməni qüvvələrinin yeni hücümü Füzuli şəhəri və rayonun böyük hissəsinin işğalı ilə nəticələndi.