1038    

10/08/2017

1473-cü ildə - Həsən padşah Bayandurinin başçılıq etdiyi Ağqoyunlu qoşunları ilə Osmanlı sultanı II Mehmet Fatehin qoşunları arasında Otluqbeli (Tərcan) döyüşü baş verib. Döyüş Osmanlı ordusunun qələbəsi ilə nəticələnib. Bununla Osmanlı qoşunları bir qədər əvvəl (1 avqust 1473) Malatya döyüşündə aldıqları məğlubiyyətin əvəzini çıxıblar. Bu döyüş Ağqoyunlu-Osmanlı müharibəsinin (1472-1473) taleyini ikincinin xeyrinə həll edib. Həsən padşah Bayanduri müharibədə Avropa dövlətlərindən yardım vədi alsa da, bu, gerçəkləşmədi. Əslində Avropa dairələri iki güclü türk dövlətinin savaş meydanında bir-birini zəif salmasında maraqlı idilər.

1897-ci ildə - Cərrah, tibb elmləri doktoru, professor (1939), Azərbaycan SSR əməkdar həkimi və əməkdar elm xadimi (1942) Hüseyn Kərim oğlu Əliyev (1897-1972) Kəlbəcərin Qoturlu kəndində anadan olub.

1918-ci ildə - Azərbaycan Xalq Cümhuriyyətinin hökuməti ölkədə ümumi hərbi səfərbərlik haqqında qərar qəbul edib. Qərar ölkə üzrə 18-45 yaşı arasında hərbi mükəlləfiyyətli bütün vətəndaşları əhatə edirdi. Qərara əsasən, qısa müddətdə 5 minədək şəxs ordu sıralarına səfərbər oldu. Bu arada Azərbaycan-türk (Osmanlı) birləşmiş qüvvələri Bakının azad olunması üçün həlledici hücuma hazırlaşırdı.

1937-ci ildə - Xalq Komissarları Sovetinin 5021 saylı iclasının qərarı ilə Azərbaycan Kommunist (b) Mərkəzi Komitəsindən xahiş edildi ki, Əməkdar incəsənət xadimi Müslüm Maqomayevin (1885-1937) adını əbədiləşdirmək məqsədilə Azərbaycan Dövlət Filarmoniyasına bəstəkarın adı verilsin. 

1955-ci ildə - Azərbaycanın Milli Qəhrəmanı, Qarabağ müharibəsi şəhidi Əli Hüseyn oğlu Məmmədov (1955-1992) Naxçıvan şəhərində dünyaya göz açmışdır.

1958-ci ildə - Azərbaycan Xalq Cümhuriyyətinin, Dağlılar Respublikasının maarif naziri, maarifçi Nurməmməd bəy Ədilxan oğlu Şahsuvarov (1883-1958) Bakıda vəfat etmişdir.

1973-cü ildə - Şair, dramaturq, əməkdar incəsənət xadimi Zeynal Rza oğlu Xəlilov (1914-1973) Bakıda vəfat etmişdir. 

1992-ci ildə - Ankarada Türkiyə və Azərbaycan xarici işlər nazirləri tərəfindən konsulluq sahəsində əməkdaşlıq haqqında saziş imzalanıb. Saziş Türkiyənin Naxçıvanda, Azərbaycanın isə İstanbulda baş konsulluğunun açılmasını nəzərdə tuturdu.