1090    

12/08/2017

1805-ci ildə - Rusiya ilə Qacarlar arasındakı müharibənin (1804-1813) gedişində rus qoşunları Bakı xanlığının strateji məntəqələrini ələ keçirərək şəhəri mühasirəyə alıblar. Lakin general Pavel Sisianovun başçılıq etdiyi qoşunlar müvəffəqiyyət qazanmayaraq geri çəkiliblər. 1806-cı ilin əvvəlində artıq Şirvan xanlığını da işğal etmiş general Sisianovun qoşunları yenidən Bakıya yaxınlaşdı. Şəhəri təslim etmək haqqında Bakı xanı Hüseynqulu xanla danışıqlar zamanı Sisianov öldürüldü. Rus qoşunları 1806-cı ilin oktyabrında Bakını aldılar.

1921-ci ildə - Tərcüməçi, ssenarist, 1951-ci ildən Azərbaycan Yazıçılar Birliyinin üzvü, Azərbaycan SSR Əməkdar mədəniyyət işçisi, yazıçı Ələviyyə Hənifə qızı Babayeva (1921-2014) Bakıda anadan olmuşdur.

1926-cı ildə - Xalq şairi Qabil Allahverdi oğlu İmamverdiyev (1926-2007) anadan olmuşdur. Azərbaycanın ali dövlət mükafatları - "Şöhrət" və "İstiqlal" ordenləri ilə təltif olunub.

1942-ci ildə - Tarixçi, jurnalist və publisist Şəmistan Nəzərli anadan olub. Azərbaycanın hərb tarixi, tanınmış azərbaycanlı generalların həyatına dair kitabların müəllifidir.

1943-cü ildə - Azərbaycan Yazıçılar Birliyinin üzvü, Əməkdar incəsənət xadimi İntiqam Böyükağa oğlu Qasımov (Qasımzadə) Şuşada anadan olub. 

1944-cü ildə - "İranın SSRİ ilə Mədəni Əlaqələr Cəmiyyəti"nin İranın 34 şəhərində açılmış şöbələri içərisində ən fəalı avqustun 12-də yaradılmış Təbriz şöbəsi idi. Təbriz şöbəsinin nüfuzunun artmasında Ə.Bağırzadənin rəhbərlik etdiyi Sovet mədəniyyət evinin böyük xidmətləri vardı. 

1958-ci ildə - Azərbaycanın Milli Qəhrəmanı  Fəxrəddin Mövsüm oğlu Cəbrayılov Qərbi Azərbaycanın Gorus şəhərində anadan olmuşdur.

1976-cı ildə - Azərbaycanın Milli Qəhrəmanı Emin Ələkbər oğlu Quliyev (1976-1995) Bakının Qaradağ rayonunun Sahil qəsəbəsində anadan olub. Bakının Qaradağ rayonunun Sahil qəsəbəsindəki 14 saylı Xüsusi İnternat məktəbi, Qaradağ rayonunda küçə və park onun adını daşıyır.

1993-cü ildə - ATƏT-in Minsk qrupunun toplantısında BMT Təhlükəsizlik Şurasının Dağlıq Qarabağ münaqişəsi ilə bağlı qəbul etdiyi 822 (Kəlbəcərin işğalı ilə bağlı) və 853 (Ağdamın işğalı) saylı qətnamələrin yerinə yetirilməsi üzrə "Təxirəsalınmaz tədbirlər qrafiki" qəbul olunub. Sənəd erməni silahlı qüvvələrinin işğal olunmuş ərazilərdən çıxmasını nəzərdə tuturdu, lakin kağız üzərində qaldı. Erməni qüvvələri isə beynəlxalq birliyin laqeydliyi fonunda işğalın coğrafiyasını daha da genişləndirdilər.   

1999-cu ildə - Bu gün tarixdə beynəlxalq gənclər günüdür. Birləşmiş Millətlər Təşkilatı  Baş  Assambleyasının 1999-cu il dekabrın 17-də qəbul etdiyi qərara əsasən elan olunan Beynəlxalq Gənclər Günü hazırda dünyanın əksər dövlətlərində qeyd edilir. Xatırladaq ki, 1998-ci il avqustun 8-12-də Lissabonda müxtəlif ölkələrin gənclərlə iş üzrə nazirlərinin iştirakı ilə keçirilən Beynəlxalq Konfransda Beynəlxalq Gənclər Gününün təsis edilməsi və bütün dünyada bayram kimi qeyd edilməsi təklif olunmuşdu və bir qədər sonra BMT Baş Assambleyası  avqustun 12-sini Beynəlxalq Gənclər Günü elan etdi.