1026    

14/08/2017

1895-ci ildə - Azərbaycanın ilk arxeoloq-etnoqraf alimlərindən biri, Əməkdar elm xadimi, Qırmızı Əmək Bayrağı ordenli, istedadlı tədqiqatçı İshaq Məmmədrza oğlu Cəfərzadə (1895-1982) Gəncədə dünyaya göz açmışdı.

1923-cü ildə - Akademik Kamal Abdulla Şaiq oğlu Talıbzadə (1923-2006) Bakı şəhərində anadan olmuşdur. 1982-cü ildə isə ona “Əməkdar elm xadimi” fəxri adı verilmişdir. O, 1993-cü ildə AMEA-nın Fəxri fərmanı, 1998-ci ildə “Şöhrət” ordeni və Azərbaycan Jurnalistlər İttifaqı tərəfindən verilmiş “Qızıl qələm” mükafatı ilə təltif edilmişdir. “Azərbaycan ədəbi tənqidinin tarixi” adlı əsərinə görə Kamal Talıbzadəyə 1986-cı ildə Azərbaycan SSR Dövlət mükafatı təqdim edilmişdir.

1930-cu ildə - SSRİ hökuməti ölkədə icbari ibtidai təhsil haqqında qərar qəbul edib. SSRİ Xalq Komissarları Sovetinin qərarına əsasən, 1930-1931-ci tədris ilindən etibarən 8-10 yaşında olan bütün uşaqlar məcburi qaydada ibtidai təhsilə (1-3-cü siniflər) cəlb edilməli idilər. Qərarda həmçinin şəhər və qəsəbələrdə 7-illik icbari (natamam orta) təhsil sisteminə keçid nəzərdə tutulmuşdu. Qərarın icrası Azərbaycanda da savadsızlığın ləğvi sahəsində mühüm mərhələ oldu.

1937-ci ildə - Geologiya-mineralogiya elmləri doktoru, akademik, AMEA-nın həqiqi üzvü Arif Cəfər oğlu İsmayılzadə Bakı şəhərində anadan olub. 

1941-ci ildə - Avqustun 14-dək Azərbaycan SSR-də Xalq qoşunu dəstələrinə 186704 nəfər (onların 30563 nəfəri qadın idi) yazılmışdı. Bu dəstələr istehsalat-ərazi prinsipi üzrə təşkil edilirdi. Onların fəaliyyətinə rəhbərlik üçün Mərkəzi qərargah yaradılmışdı. Bakı şəhərinin 18 rayonunda Xalq qoşunu dəstələrinə 61780 nəfər yazılmış və 20 rota təşkil olunmuşdu.19 Bakı ətrafında müdafiə zonası yaradılmasında Xalq qoşunu dəstələrinin 12000 döyüşçüsü fəal iştirak etmişdi.

1948-ci ildə - Yazıçı Qəşəm İsa oğlu İsabəyli Azərbaycanın Kürdəmir rayonunun Xəlsə kəndində ziyalı ailəsində anadan olmuşdur. 1967-ci ildən dövri mətbuatda çıxış edir. Rus, ukrayna, şotland, moldova, tacik, litva və latviya ədəbiyyatından (rus dili vasitəsilə) tərcümələri vardır. Əsərləri rus, ingilis, ukrayna, belarus və qırğız dillərinə tərcümə olunmuşdur. Q.İsabəylinin “Əkil-Bəkil” poeması 1989-cu ildə “İlin ən yaxşı uşaq kitabı” I Respublika müsabiqəsinin qalibi olmuşdur. Müsabiqədən əldə edilmiş mükafat müəllif tərəfindən şəhidlərin xatirəsinə abidə ucaldılması məqsədilə xeyriyyə fonduna köçürülmüşdür.

1953-cü ildə - Teatr və kino aktyoru Əjdər Qüdrət oğlu Həmidov Şabran rayonunun (keçmiş Dəvəçi rayonun) Aygünlü kəndində anadan olmuşdur. Əjdər Həmidov 2002-ci ildə Azərbaycan Respublikasının Əməkdar Artisti fəxri adına layiq görülmüşdür. 30 aprel 2014-cü ildə, 6 may 2015-ci ildə, 6 may 2016-cı ildə və 1 may 2017-ci ildə Prezident Mükafatına layiq görülmüşdür.

1957-ci ildə - Görkəmli xanəndə, muğam ustadı Alim Qasımov Qobustan rayonunun Nabur kəndində anadan olub. O, 1999-cu ildə Beynəlxalq IMC UNESCO Musiqi Mükafatını alıb. 2009-cu ildə Alim Qasımov ABŞ-ın Corctaun Universiteti və mərkəzi İordaniyada yerləşən Strateji Araşdırmalar Mərkəzinin keçirdiyi müsabiqədə dünyanın ən nüfuzlu 500 müsəlmanı arasında 4 azərbaycanlıdan biri olub.

1989-cu ildə - Bakıda Xalq Cəbhəsinin təşkilatçılığı ilə Ermənistanın Azərbaycana qarşı ərazi iddialarına, azərbaycanlıların Ermənistandakı tarixi torpaqlarından etnik təmizlənməsinə etiraz olaraq yeni mitinqlər və kütləvi tətillər başlanıb. Tətil dalğası təxminən iki ay davam etdi. Respublikanın kommunist rəhbərliyinə ünvanlanan tələblərdən biri də Azərbaycanın suverenliyi haqqında qanunun qəbul edilməsi barədə idi. Həmin qanun 1989-cu il sentyabrın 23-də qəbul olundu.

2002-ci ildə - Naxçıvanda, Azərbaycan-Ermənistan sərhədinin Sədərək rayonu ərazisində prezidentlər Heydər Əliyev və Robert Koçaryan arasında təkbətək görüş keçirilib. Bu, Azərbaycan və Ermənistan prezidentləri arasında 1999-cu ildə başlanan təkbətək görüşlərin sayca 21-cisi idi. Dörd saat davam edən görüşdən sonra açıqlama verən prezidentlər danışıqlardan ümumən razılıq ifadə etsələr də, ortada heç bir nəticənin olmadığını bildirdilər.