952    

20/08/2017

1783-cü ildə - Çar Rusiyasının Qafqaz korpusuna başçılıq edən general Potyomkin Azərbaycan xanlarına müraciət edərək onları Rusiya imperiyası himayəsinə keçmək barədə Georgiyevsk müqaviləsinə qoşulmağa çağırıb. Bundan bir qədər əvvəl (4 avqust) Kartli və Kaxetiya çarı II İrakli Georgiyevsk traktatını imzalayaraq Rusiyanın himayəçiliyini qəbul etmişdi. Potyomkinin müraciətinə Azərbaycan xanlarından heç biri müsbət cavab vermədi.

1837-ci ildə - Qubada Hacı Məhəmməd üsyan bayrağını qaldırdı. Çar müstəmləkəçiləri ilə silahlı üsyana başlamaq çağırışını o, oğlunun Xuluq kəndində keçirilən və üç yuxarı mahaldan 200-ə yaxın adamın, o cümlədən kəndxudaların iştirak etdikləri toyunda irəli sürdü. Kəndxudalar Hacı Məhəmmədə tərəfdar çıxdılar və kəndlərə çaparlar göndərərək, kəndliləri silahlı mübarizəyə çağırdılar. Hadisələr çoz sürətlə inkişaf edirdi. Artıq bir neçə gündən sonra, Barmaq mahalı istisna olmaqla, bütün əyalət kəndli üsyanı alovlarına bürünmüşdü. 

1901-ci ildə - Məşhur xanəndə, xalq artisti Xan Şuşinski (İsfəndiyar Aslan oğlu Cavanşir) (1901-1979) Şuşa şəhərində anadan olub.

1912-ci ildə - Görkəmli dirijor və bəstəkar, SSRİ Xalq Artisti, SSRİ Dövlət Mükafatı laureatı, 2-dəfə Stalin mükafatı və 2-dəfə Lenin ordeni laureatı, Beynəlxalq Nehru mükafatı laureatı Niyazi Zülfüqar oğlu Tağızadə-Hacıbəyov (1912-1984) Tiflisdə anadan olmuşdur.

1918-ci ildə - Azərbaycanın məşhur fiziki, akademik, Azərbaycan Dövlət mükafatı laureatı, Azərbaycan Elmlər Akademiyasının həqiqi üzvü, 1970-1983-cü illərdə Azərbaycan Elmlər Akademiyasının prezidenti olmuş Həsən Məmmədbağır oğlu Abdullayev (1918-1993) Culfa rayonunun Yaycı kəndində dünyaya göz açıb.

1966-cı ildə - Azərbaycanın Milli Qəhrəmanı Fazil Umud oğlu Mehdiyev (1966-1991) Laçın rayonunun Ələçi kəndində doğulmuşdur.  

1992-ci ildə - Azərbaycan ərazisindən sovet (Rusiya) qoşunlarının çıxarılması başlanıb. Bu proses Naxçıvandan başlamış, Naxçıvan Ali Məclisinin sədri Heydər Əliyevin təşəbbüsü ilə muxtar respublikadakı 75-ci motoatıcı diviziyasının çıxarılması barədə qərar qəbul edilmişdi. Razılaşmaya əsasən, diviziyanın əmlakı Azərbaycan Ordusunun Naxçıvandakı hissələrinə verildi. Azərbaycandan Rusiya qoşunlarının çıxarılması 1993-cü ilin mayında başa çatdı.

1997-ci ildə - Azərbaycan hökuməti ilə ABŞ-ın "R.V.İnvestment" şirkəti arasında ölkənin bir neçə rayonunda qızıl yataqlarının işlənməsinə dair müqavilə imzalanıb. Müqavilə Azərbaycanın Ordubad, Gədəbəy, eləcə də Kəlbəcər rayonu ərazisindəki qızıl, gümüş və mis yataqlarının işlənməsini nəzərdə tuturdu. Amerika şirkətinin günahı üzündən saziş həyata keçirilmədi. Müqavilə üzrə yataqların işlənməsinə (Gədəbəy rayonu) 2009-cu ilin mayında başlanıldı.