991
21/08/2017 1919-cu ildə - Azərbaycan Dövlət Universitetinin təsis edilməsi haqqında qanun layihəsinin ilkin müzakirəsi göstərdi ki, parlamentin əksəriyyəti Azərbaycanın elm və maarif ocağının açılmasına prinsipcə razıdır. Bununla belə ali qanunverici orqana təqdim edilmiş qanun layihəsinin opponentləri də var idi. Qanun layihəsinin tərəfdarları M.Ə.Rəsulzadə, F.X.Xoyski, N.Yusifbəyli, M.Hacınski, A.Əfəndizadə, S.A.Vonsoviç, S.M.Qənizadə, Ə.H.Qarayev, S.Ağamalıoğlu, R.Kaplanov və b. universitetin tezliklə açılmasının əhəmiyyətindən danışaraq göstərdilər ki, o, xalqın maariflənməsinə, Azərbaycanda elmin inkişafına, ictimai həyatın müxtəlif sahələri üçün ixtisaslı kadrlar hazırlanmasına təkan verəcək. Qanun layihəsinin əleyhdarları - Q.Qarabəyov, Y.Əhmədov, M.Əfəndizadə və b. universitetdə tədrisin türk dilində deyil, rus dilində aparılması barədə iradlarını türk müəllimlərin çatışmaması ilə əlaqələndirir, öz mövqelərini yaxın gələcəkdə universitetin təşkili üçün lazımi maliyyə vəsaiti tapılmayacağı ilə izah edirdilər. Bakı Universitetinin yaradılmasının tərəfdarı M.Ə.Rəsulzadə parlamentdə müzakirə olunan məsələ ətrafında vəziyyəti xarakterizə edərək qeyd etmişdi: "Burada universitetin açılması məsələsində iki fikir mövcuddur. Məsələyə müxalif olan münasibət onunla əsaslandırılır ki, bizdə kifayət qədər elmi kadrlar və mütəxəssislər yoxdur. Amma universitetin təsis edilməsi dövlətin əsas vəzifələrindən biri olmalıdır, buna görə də bütün maneələr aradan qaldırılmalıdır. Əlbəttə, yaxşı olardı ki, açılacaq elm ocağı türk dilində olaydı, lakin bu hələlik mümkün deyildir. Lakin, bu, başqa dildə də olsa, universitetin fəaliyyət göstərməsinə mane olmamalıdır. ...Universitetdə türk dili keçiləcək, tələbələrin özləri də Bakıda, öz doğma xalqı içərisində özlərini rahat hiss edəcəklər".
1930-cu ildə - Görkəmli ədəbiyyatşünas alim, akademik Bəkir Əhməd oğlu Nəbiyev (1930-2012) Ağdaş rayonunun Üçqovaq kəndində ziyalı ailəsində anadan olub. Azərbaycan elminin inkişafındakı xidmətlərinə görə, "Şöhrət" və "İstiqlal" ordenləri ilə təltif olunub.
1991-ci ildə - Erməni təxribatçı dəstələrinin Dağlıq Qarabağın azərbaycanlı əhalisinə qarşı terror hücumları davam edib. Hadrut rayonunun Şadaxt kəndi yaxınlığında sərnişin avtobusunun partladılması nəticəsində 2 nəfər həlak olub, 10 nəfər ağır yaralanıb.
1992-ci ildə - Naxçıvan Ali Məclisinin sədri Heydər Əliyevin Tehrana səfəri gedişində İran İslam Respublikasından Naxçıvana elektrik enerjisi verilməsi, kommunikasiyaların çəkilməsi və ərzaq yardımı göstərilməsi barədə sazişlər imzalanıb. Səfər Milli Məclisin və Azərbaycan hökumətinin Naxçıvana yardım göstərilməsi barədə qəbul etdiyi qərarlar çərçivəsində həyata keçirilmişdi.
1997-ci ildə - Azərbaycan Respublikası ilə Serbiya və Çernoqoriya İttifaqı (2006-cı ildən Serbiya və Çernoqoriya respublikalarına ayrılıb) arasında diplomatik münasibətlər qurulub.
2002-ci ildə - Görkəmli boyakar, qrafik və teatr rəssamı, professor, SSRİ xalq rəssamı, SSRİ Rəssamlıq Akademiyasının akademiki, Cəvahirləl Nehru adına beynəlxalq mükafatın sahibi, Azərbaycan SSR dövlət mükafatı laureatı Mikayıl Hüseyn oğlu Abdullayev (1921-2002) Bakı şəhərində vəfat etmiş, Fəxri Xiyabanda dəfn edilmişdir. O, 1955-ci ildə Azərbaycan SSR-in Əməkdar İncəsənət xadimi, 1963-cü ildə Azərbaycan SSRİ Xalq rəssamı olmuşdur.
2012-ci ildə - Astrofizika üzrə Azərbaycanda ilk fizika-riyaziyyat elmləri doktoru, Azərbaycan Milli Elmlər Akademiyasının müxbir üzvü, Beynəlxalq Astronomiya İttifaqının və Avropa Astronomiya Cəmiyyətinin üzvü, əməkdar müəllim, professor Rəhim Əyyub oğlu Hüseynov (1924 – 2012) vəfat edib.