1172
25/01/2017 1823-cü ildə - Məşhur milyonçu və xeyriyyəçi Hacı Zeynalabdin Tağıyev Bakıda başmaqçı ailəsində anadan olub.
1899-cu ildə - Azərbaycanın ilk hüquq professoru, ictimai xadim Mustafa ağa Məmməd ağa oğlu Vəkilov (1899-1943) anadan olub. 1919-cu ildə Xalq Cümhuriyyəti hökumətinin göndərişilə Sorbonna (Paris) Universitetinə daxil olub, təhsilini bitirdikdən sonra Azərbaycana qayıdıb, hüquq sahəsi üzrə kadrların hazırlanmasında fəal rol oynayıb. Stalin repressiyalarının qurbanı olub.
1919-cu ildə - Azərbaycan Cümhuriyyətinin Parlamentinin iclasında xüsusi bəyanatla çıxış edən M.Ə.Rəsulzadə Ermənistan hökumətinin Naxçıvan və digər qəzaların azərbaycanlı əhalisinə düşmən münasibət bəsləməsinə qarşı çıxaraq qəti tədbirlər görməyə çağırdı.
1922-ci ildə - Naxçıvan SSR-in Birinci Sovetlər qurultayı keçirildi.
1931-ci ildə - Kənd müəllimini təqiblərdən müdafiə etmək və ona normal iş şəraiti yaratmaq məqsədilə respublika hökuməti Azərbaycan SSR kənd müəllimləri üçün müvafiq şərait yaradılmasını, onların hüquqlarının qorunmasını təmin edən xüsusi qərar da qəbul etdi.
1984-cü ildə – Görkəmli teatr və kino aktyoru, xalq artisti Məmmədrza İsa oğlu Şeyxzamanov (1915-1984) Bakı şəhərində vəfat edib.
1988-ci ildə - Ermənistan SSR-də yaşayan azərbaycanlı əhalinin kütləvi deportasiyası başlanıb. Azərbaycanlı qaçqınların ilk dəstəsi respublikamıza pənah gətirib. 1988-1989-cu illədə ümumilikdə 230 minə yaxın azərbaycanlı Ermənistan ərazisindəki tarixi ata-baba yurdlarından zorla qovuldu.
1992-ci ildə - Bu gün Azərbaycan Respublikasının bəlkə də Qarabağ döyüşlərində ən mühüm mərhələlərdən biri olan DAŞALTI ƏMƏLİYYATININ ildönümünü qeyd edir. DAŞALTI kəndi Şuşadan 3-4 kilometr aralıda yerləşirdi. Kənddəki erməni qoşunları Şuşa-Laçın yolu ilə hərəkət edən nəqliyyat vasitələrini mütəmadi atəşə tuturdular. Bu, Şuşada yerləşən Azərbaycan hərbçilərinin təchizatında çətinliklər yaradırdı. Vəziyyətdən çıxmaq üçün düşmənin atəş nöqtələrini dağıtmaq, onları birdəfəlik susdurmaq qərara alındı. Əməliyyata böyük əhəmiyyət verilirdi. Buna görə də o vaxtkı müdafiə naziri, general-mayor Tacəddin Mehdiyev şəxsən özü əməliyyata rəhbərlik edirdi. Bu məqsədlə o, 1992-ci il yanvarın 19-da Şuşaya gəlmişdi. İki gün ərzində kəşfiyyat aparıldı. Müəyyən edildi ki, Daşaltı kəndində ermənilərin 50-60 nəfərlik silahlı dəstəsi var. Əməliyyatın uğurla keçirilməsi üçün 5 vzvod ayrıldı. Bundan əlavə, Müdafiə Nazirliyinin Xüsusi Kəşfiyyat İdarəsinin əməkdaşı Riad Əhmədovun rəhbərliyi altında peşəkar döyüşçülərdən ibarət 10 nəfərlik xüsusi bir qrup formalaşdırıldı. Əməliyyat 1992-ci il 25 yanvarda axşam saat 20:00-da başlanıb və yanvarın 26-da axşam saatlarında uğursuzluqla başa çatıb. Əməliyyatda yenicə yaranmış Azərbaycan Ordusunun könüllülərdən ibarət 3 bölüyü və Şuşa şəhərinin müdafiə taborunun döyüşçüləri iştirak edib. Taktiki səhvlər, qruplar arasında rabitə əlaqəsinin olmaması, əməliyyat sirrinin yayılması və bələdçilərin xəyanəti nəticəsində Nəbilər kəndi istiqamətindən Daşaltıya daxil olan Azərbaycan tağımları düşmənin pusqusuna düşərək tamamilə məhv edilib. Kəndə daxil olmuş bir neçə tağım isə xeyli itki verərək geri çəkilə bilib. Rəsmi məlumatlara görə, Daşaltı əməliyyatında Azərbaycan ordusu Şuşa rayon könüllüləri ilə bir yerdə 96 şəhid verib, bundan başqa onlarla əsgər hələ də itkin düşmüş sayılır. Döyüşdə ermənilər də bir neçə texnika və 80-ə yaxın canlı qüvvə itirib.
2001-ci ildə - Azərbaycan Avropa Şurasına tamhüquqlu üzv olub. Strasburqda, Avropa Şurasının mənzil-qərargahının qarşısında Azərbaycanın bayrağı qaldırıldı. mərasimdə Azərbaycan prezidenti Heydər Əliyev də iştirak etdi.
2002-ci ildə - Prezident Heydər Əliyevin Rusiyaya dövlət səfəri zamanı Qəbələ RLS-in statusuna dair saziş imzalanıb. Qəbələ RLS ("Daryal" Analitik-İnformasiya Mərkəzi) Azərbaycanın mülkiyyəti kimi təsdiqlənib və Rusiyaya 10 illiyə (hər il üçün 7 mln. dollar) icarəyə verilib. Səfər gedişində iki ölkə arasında 2002-2010-cu illər üzrə iqtisadi tərəfdaşlıq müqaviləsi də imzalanıb.
2005-ci ildə - Avropa Şurası Parlament Assambleyasında Qarabağ münaqişəsi üzrə məruzəçi Devid Atkinsonun (Britaniya) hazırladığı məruzə üzrə qətnamə qəbul olunub. "ATƏT-in Minsk Konfransının məşğul olduğu Dağlıq Qarabağ bölgəsi üzərində münaqişə" adlı 1416 (2005) saylı qətnamədə Ermənistanın Azərbaycan torpaqlarını işğal altında saxladığı qeyd olunub. Qətnamədə Ermənistana BMT Təhlükəsizlik Şurasının qətnamələrini (1993) yerinə yetirmək və silahlı qüvvələri işğal olunmuş ərazilərdən çıxarmaq çağırışı yer alıb.