993    

22/08/2017

1819-cu ildə - Azərbaycanda ilk alman koloniyası - Helenendorf (indiki Göygöl) qəsəbəsinin əsası qoyulub. Almanların Qafqaza köçü 1817-ci ildə Rusiya çarının razılığı ilə başlanmışdı. Helenendorfun əsası Vürtemberq krallığından gələn icma tərəfindən qoyulub. Sonra bölgədə daha bir neçə alman qəsəbəsi salınıb. 1938-ci ildə qəsəbə Xanlar adlandırılıb, 1941-ci ildə isə Stalinin əmri ilə almanlar Qazaxıstana sürgün edilib. 2008-ci ildə Milli Məclis Xanların Göygöl adlandırılması barədə qərar qəbul edib.

1862-ci ildə - Tarixçi-etnoqraf, pedaqoq, maaarifçi. Zаqаfqаziyа (Qоri) Müəllimlər Sеminаriyasının məzunu Teymur Məmməd bəy oğlu Bayraməlibəyov (1862 - 1937) Lənkəran qəzasının Yeddioymaq kəndində anadan olmuşdur.

1905-ci ildə - Azərbaycanda baş verən tətillərə görə çar höküməti mühasirə vəziyyəti elan etdi. Çar hökumət orqanları tətilçilərə qarşı qoşun yeritdi, repressiyalar və şəhərdə polis terroru artmağa başladı. Eyni zamanda hökumət neft sənayeçiləri və fəhlələr arasında qarşılıqlı münasibətləri nizama salmağa cəhd göstərirdi. Yaranmış vəziyyətlə əlaqədar sentyabrın 30-da Peterburqda müşavirə çağırıldı. Burada müsəlman fəhlələrinin mənafeyini Əlimərdan bəy Topçubaşov müdafiə etdi. Əhməd bəy Ağayev fəhlə məsələsinin qanunvericilik yolu ilə nizama salınması zərurətindən danışdı.

1949-cu ildə - "Bizim Cəbiş müəllim" filmindəki Makedon rolu ilə tanınan aktyor Aqil Ağacanov Bakının Sabunçu rayonunun Pirşağı kəndində dünyaya göz açmışdır. 

1962-ci ildə -"20 Yanvar" şəhidi İlqar İsa oğlu Kərimov (1962-1990) Goranboy rayonunun Ağamalıoğlu kəndində anadan olub.

1975-ci ildə - Azərbaycanın Milli Qəhrəmanı Elnur Eyvaz oğlu Nuriyev (1975-1994) Zəngilan rayonunun Cahangirbəyli kəndində dünyaya göz açmışdır.

1986-cı ildə - İctimai-siyasi xadimi, akademik, həkim, 1959-1969-cu illərdə Azərbaycan Kommunist Partiyası Mərkəzi Komitəsinin birinci katibi olmuş Vəli Yusif oğlu Axundov (1916-1986) Bakı şəhərində vəfat etmiş və Fəxri Xiyabanda dəfn olunmuşdur. O, 1949-1952-ci illərdə Azərbaycan SSR Səhiyyə nazirinin müavini, 1952-1953-cü illərdə isə Bakı Vilayəti Səhiyyə şöbəsinin müdiri, 1953-1954-cü  illərdə Azərbaycan KP MK-da İnzibati, ticarət-maliyyə və plan orqanları şöbəsi müdirinin müavini, 1954-1958-ci illərdə isə Azərbaycan SSR Səhiyyə naziri, 1958-1959-cu illərdə Azərbaycan SSR Nazirlər Sovetinin sədri olmuşdur. 1969-1972-ci illərdə V.Axundov Azərbaycan SSR Elmlər Akademiyasının vitse-prezidenti olmuş və akademiyanın səhiyyə sahəsinə rəhbərlik etmişdir. V.Axundov 1972-1986-cı illərdə Q.M.Musabəyov adına Virusologiya, Mikrobiologiya və Gigiyena İnstitutunun direktoru olmuşdur.

1993-cü ildə - Azərbaycan Respublikasının Əməkdar artisti, Xalq artisti, Aktrisa Rəmziyyə Osman qızı Veysəlova (1914-1993) Gəncə şəhərində vəfat etmiş və Bağbanlardakı Fəxri Xiyabanda dəfn edilmişdir.

1999-cu ildə - Cenevrədə Azərbaycan və Ermənistan prezidentləri arasında Qarabağ nizamlanmasına dair növbəti görüş keçirilib.

2000-ci ildə - Azərbaycanın sabiq prezidenti, Azərbaycan Xalq Cəbhəsinin sədri Əbülfəz Elçibəy (1938-2000) Türkiyədə, Gülhanə Hərbi Tibb Akademiyasında (Ankara) vəfat edib. Prezident Heydər Əliyev Elçibəyin vəfatı ilə bağlı televiziya ilə çıxış edərək başsağlığı vermiş, dövlət tərəfindən rəsmi dəfn komissiyası təşkil edilmişdi. Prezidentin sərəncamı ilə Elçibəy Bakıda, Fəxri Xiyabanda dəfn olundu.   

2014-cü ildə - Şərqşünas alim, filologiya elmləri doktoru, professor, tanınmış diplomat, Azərbaycanın Səudiyyə Ərəbistanı və İordaniyadakı keçmiş səfiri, İslam Əməkdaşlıq Birliyindəki nümayəndəsi Elman Həmid oğlu Araslı (1934-2014) vəfat etmişdir.