1038    

27/08/2017

1918-ci ildə - Azərbaycan Xalq Cümhuriyyəti Nazirlər Şurası xalq maarifinin, orta məktəblərin milliləşdirilməsi haqqında qərar qəbul edib. Hökumət həmçinin ölkənin bütün məktəblərində türk dilinin icbari qaydada tədris olunması barədə qərar qəbul edib.

1919-ci ildə - Azərbaycan Xalq Cümhuriyyətinin parlamenti Azərbaycan Dövlət Bankının yaradılması barədə qanun qəbul edib. Bank sisteminin mərkəzləşdirilməsi barədə müzakirələr 1918-ci ildən getsə də, hökumət və parlament daxilində fikir ayrılıqları onun reallaşmasına imkan verməmişdi. Dövlət Bankı həmin ilin oktyabrında fəaliyyətə başladı.

1935-ci ildə - Nasir Əlibala Qüdrət oğlu Hacızadə (1935-2009) Biləsuvar rayonunun Ağalikənd kəndində anadan olmuşdur. Onun “İtkin gəlin” romanı əsasında yazdığı ssenarisinə 12 seriyalı bədii televiziya filmi çəkilmişdir. 1962-ci ildən Yazıçılar Birliyinin üzvü olub. 1964-cü ildə filologiya elmləri namizədi adını almışdı. 

1948-ci ildə - Görkəmli musiqişünas alim, sənətşünaslıq doktoru, professor Elxan Əlisəttar oğlu Babayev (1948-2003) Bakıda anadan olmuşdur. Musiqişünasların  B.Asafyev adına beynəlxalq müsabiqəsi laureatı (1991), “Bakılı” Beynəlxalq Cəmiyyətinin “Humay-98” mükafatı laureatı E.Babayev 4 monoqrafiyanın, məqalələr toplusunun, 6 elmi-metodik nəşrin, tədris proqramlarının, 100-dən artıq elmi və elmi-publisistik məqalələrin, onlarla televiziya və radio verilişlərinin müəllifidir.

1983-cü ildə - Azərbaycan SSR Xalq Artisti Rübabə Xəlil qızı Muradova (1933-1983) Bakıda vəfat etmişdir. 

1992-ci ildə - Ermənistan Silahlı Qüvvələrinin yaratdığı diversiya qrupu Goranboy rayonunun Ballıqaya kəndinin ərazisində məskunlaşan Laçın rayonundan olan məcburi köçkünlərə qarşı soyqırım törədib. Məskunlaşdıqdan üç gün sonra 28 avqust 1992-ci il tarixdə səhər saat 5 radələrində Ermənistan Silahlı Qüvvələrinin yaratdığı diversiya qrupunun 10-12 nəfər üzvü alaçıqları xüsusi amansızlıqla, iri çaplı silahlardan və qumbaraatanlardan atəşə tutdu. Atəş nəticəsində dinc sakinlərdən 24 nəfər şəhid oldu. Şəhid olanlar əksəriyyət etibarilə Laçın rayonunun Nağdalı kəndinin sakinləri idi.   

1992-ci ildə - Bakı şəhər Səbayel rayonunun 50 saylı məktəbinin adını daşıdığı Cəbrayıl Fəyaz oğlu Əsgərov (1965-1992) Ağdərə rayonunun Mehmanə kəndi uğrunda gedən döyüşlər zamanı qəhrəmancasına həlak olub və Şəhidlər xiyabanında dəfn olunub.

1995-ci ildə - ATƏT-in fəaliyyətdə olan sədrinin Dağlıq Qarabağ münaqişəsi üzrə şəxsi nümayəndəsi postu təsis olunub. Şəxsi nümayəndənin mandatına münaqişə zonasında atəşkəs rejiminə nəzarət, qoşunların təmas xəttində monitorinqlərin keçirilməsi daxildir.

2000-ci ildə - Prezident Heydər Əliyev yeni yaradılan Apellyasiya Məhkəməsinin üvlərinin təyinatı ilə bağlı fərman imzalayıb. Fərmana əsasən, aşağı instansiya məhkəmələri ilə Ali Məhkəmə arasında 2-ci pillə rolunu oynayan Apellyasiya Məhkəməsinin 38 hakimi təyin edilib.

2007-ci ildə - Bakıda M.Muxtarov küçəsi 185 ünvanında inşa edilən 16 mərtəbəli binanın çökməsi nəticəsində 27 nəfər həlak olub. Qəza tikintinin mühəndislik və texniki təhlükəsizlik normalarına uyğun aparılmaması nəticəsində baş verib.