1026    

28/08/2017

1920-ci ildə - Azərbaycanın Müvəqqəti İnqilab Komitəsi ölkədə taxıl ticarətinin inhisara alınması haqqında dekret verib. Bununla yanaşı, hökumət ölkədə ərzaq böhranını aradan qaldırmaq üçün "ərzaq sapalağı" sisteminin tətbiqi barədə dekret vermişdi. "Ərzaq sapalağı"na əsasən, kəndlilər tədarük etdikləri məhsulun artıq hissəsini hökumətin müəyyən etdiyi qiymətə (bazar qiymətindən ucuz) dövlətə satmalı idilər.

1930-cu ildə -  Azərbaycan Xalq Komissarları Şurası ümumi ibtidai təhsilin tətbiq edilməsi haqqında qərar qəbul etdi. 

1957-ci ildə - Şair, tərcüməçi, 1939-cu ildən Azərbaycan Yazıçılar Birliyinin üzvü Böyükağa Məmməd oğlu Qasımov (1916-1957) 41 yaşında vəfat etmişdir.

1960-cı ildə - Azərbaycanın Milli Qəhrəmanı, jurnalist, Qarabağ müharibəsi şəhidi Çingiz Fuad oğlu Mustafayev (1960-1992) hərbçi ailəsində anadan olub.

1991-ci ildə - Azərbaycan Respublikası Ali Sovetinin növbədənkənar sessiyası işə başlayıb. Müxalifətin və parlamentdəki demokratik qüvvələrin tələbi ilə sessiyanın gündəliyinə Azərbaycanın dövlət müstəqilliyinin elan olunması, Milli Ordunun yaradılması barədə məsələlər salındı. 

1993-cü ildə - Milli Məclisin qərarı ilə prezident Əbülfəz Elçibəyə etimad haqqında referendum keçirildi. Referendumun nəticəsinə görə iştirak edənlərin 97,5 faizi prezidentə etimadsızlıq göstərirdi. 

1997-ci ildə - Rusiya ilə Ermənistan arasında da "Dostluq, əməkdaşlıq, qarşılıqlı yardım haqqında" yeni müqavilə bağlandı. Bu sənəddə hərbi vəziyyət yaranarkən Rusiyanın rəsmi surətdə Ermənistan tərəfində çıxış edəcəyi bəyan olunurdu. Azərbaycanda narazılıq yaratdığını görən Rusiyanın yüksək vəzifəli şəxsləri, habelə Xarici İşlər Nazirliyi xüsusi nota ilə bu sənədin Azərbaycan Respublikasına qarşı çevrilmədiyini bildirdilər.