1045    

03/09/2017

1804-cü ildə - İrəvan xanlığının Qəmərli kəndi (indiki Ermənistanda Artşat qəsəbəsi) yaxınlığında çar Rusiyası və Qacar qoşunları arasında döyüş olub. Ruslar məğlub olaraq geri çəkiliblər. Bu, Rusiya-Qacar müharibəsində (1804-1813) rus qoşunlarının ikinci məğlubiyyəti idi. Bundan öncə ruslar Üçmüədzin döyüşündə (27 iyul) məğlub olmuşdular. Bununla belə, rus qoşunları 1805-ci ilin əvvəlində, bu dəfə Şəki və Qarabağ xanlıqlarına hücum edərək hər iki xanlığı ələ keçiriblər.

1918-ci ildə - Daşnak-eser-menşevik "Sentrokaspi" hökumətinin çağırışı ilə Bakıya gəlmiş ingilis hərbi kontingenti şəhəri tərk etməyə başlayıb. General Denstervilin başçılıq etdiyi ingilis desantı avqustun əvvəlində Ənzəlidən (İran) Bakıya gəlmişdi. İngilislər "Sentrokaspi diktaturası"nın Bakıda real hakimiyyətə malik olmadığını və Azərbaycan-Osmanlı qüvvələrinin hücumu qarşısında duruş gətirə bilməyəcəklərini qətiləşdirdikdən sonra geri döndülər. İngilislərin son dəstəsi Qafqaz İslam Ordusunun Bakıya hücumu (15 sentyabr) öncəsi şəhəri tərk etdi.

1991-ci ildə - Naxçıvan Ali Məclisinin sentyabrın 3-də başlanan fövqəladə sessiyasında təşkilati məsələyə baxılıb. Deputatların yekdil qərarı ilə xalq deputatı Heydər Əliyev Naxçıvan Ali Məclisinin sədri seçilib. Heydər Əliyevin muxtar respublikaya rəhbərliyə başlaması blokada vəziyyətində olan, Ermənistan tərəfdən aramsız hücumlara məruz qalan Naxçıvanın xilası üçün tarixi şans idi. H.Əliyev 1993-cü ilin iyununadək muxtar respublikaya rəhbərlik etdi.  

1992-ci ildə - Azərbaycanın Milli Qəhrəmanı, Qarabağ müharibəsi iştirakçısı Fəxrəddin Vəliyəddin oğlu Nəcəfov (1967-1992) Ağdərənin Çıldıran kəndi uğrunda gedən döyüşlərdə qəhrəmancasına şəhid olmuşdur.

2003-cü ildə - Yazıçı, ədəbiyyatşünas, ictimai xadim, filologiya elmləri doktoru, professor, 1946-cı ildən Azərbaycan Yazıçılar Birliyinin üzvü Əzizə Məmməd qızı Cəfərzadə (1921-2003) Bakıda vəfat etmişdir. O, 2001-ci ildə "Azərbaycan Anası" və "Xalq Yazıçısı" kimi yüksək adlara layiq görülmüşdür.