1186    

25/01/2017

1863-cü ildə - Maarifçi, azərbaycanlı filoloq, yazıçı və tənqidçi Firudin bəy Əhməd bəy oğlu Köçərli (1863-1920) anadan olub. Zaqafqaziya Müəllimlər Seminariyasının (Qori, Gürcüstan) Azərbaycan bölməsində dərs deyib, 1906-cı ildə Azərbaycan bölməsinin Qazaxa köçürülməsinə nail olub və ömrünün sonunadək ona rəhbərlik edib. Xalq Cümhuriyyəti Milli Şurasının üzvü olub. 1920-ci ildə Gəncədə sovet höküməti əleyhinə qalxan üsyanlar vaxtı bolşevik ermənilər tərəfindən güllələnib. 

1933-cü ildə - Azərbaycan Respublikasının Xalq artisti, Azərbaycan Bəstəkarlar İttifaqı İdarə Heyətinin üzvü, Ü.Hacıbəyli adına Bakı Musiqi Akademiyasının professoru, təcrübəli pedaqoq, Prezident təqaüdçüsü, "Şöhrət" və "Şərəf" ordenli bəstəkar Musa Abdulla oğlu Mirzəyev (1933-2016) anadan olub.   

1936-cı ildə - Azərbaycan SSR Xalq Komissarlar Soveti yanvarın 26-da rəssam Əzim Əzimzadənin iş şəraitini yaxşılaşdırmaq üçün emalatxana tikilməsi barədə xüsusi qərar qəbul etdi. Qocaman xalq rəssamı Ə.Əzimzadə müxtəlif janrlarda qrafik əsərlər, satirik rəsmlər, boyaqlı akvarellər, səhnə geyimi eskizləri çəkmişdi.

1973-cü ildə - Texnika elmləri doktoru, professor, Azərbaycan Milli Elmlər Akademiyasının həqiqi üzvü Səftər Mehdi oğlu Quliyev (1908-1973) Bakıda vəfat etdi. 

1990-cı ildə - Yanvarın 25-26-da Neftçala və Lənkəran şəhərlərində Bakıya qoşunların daxil olmasına etiraz edən daha 8 nəfər hərbçilər tərəfindən qətlə yetirildi.

1993-cü ildə - Fərrux yüksəkliyi ətrafındakı döyüş cəlb edilən qüvvələrin miqyasına görə Qarabağ müharibəsində ən böyük döyüşlərdən biri oldu. Düşmənə əsas zərbələr Yeddixırman-Fərrux və Xromot-Fərrux istiqamətində vurulmalı idi. Döyüşlərdə Azərbaycan silahlı qüvvələri məğlub oldular, ağır itkilər verib geri çəkildilər.  

1995-ci ildə - Azərbaycan Respublikası Xorvatiya ilə diplomatik əlaqələr qurdu. Qeyd edək ki, Xorvatiya Respublikası Azərbaycan Respublikasının müstəqilliyini 28 dekabr 1991-ci ildə tanımışdır. 

2002-ci ildə - ABŞ prezidenti Corc Buş 907-ci düzəlişin fəaliyyətini dayandırdı. Xatırladaq ki, düzəliş 1992-ci ildə qəbul edilmişdir və Azərbaycana qarşı iqtisadi sanksiya tətbiqini nəzərdə tuturdu. Səbəb olaraq Azərbaycanın Ermənistanı və "Dağlıq Qarabağ"ı blokadaya alması göstərilirdi.