1068    

06/09/2017

1914-cu ildə - Tanınmış ədəbiyyatşünas və teatrşünas, ictimai xadim, Azərbaycan MEA-nın müxbir üzvü, sənətşünaslıq doktoru Cəfər Haşım oğlu Cəfərov (1914-1973) Bakıda anadan olmuşdur. Alim 1972-ci ildə “Azərbaycan Respublikasının Əməkdar incəsənət xadimi” fəxri adı ilə təltif olunmuşdu. 

1939-cu ildə - Şair, tərcüməçi, ssenarist Mənsur Fəxri oğlu Vəkilov (Mənsur Fəxri) (1939-2008) Bakıda anadan olmuşdur. O, 1968-ci ildən Azərbaycan Yazıçılar Birliyinin üzvü, 2003-cü ildən Əməkdar incəsənət xadimi idi. 1981-ci ildə Azərbaycan Ali Soveti Rəyasət Heyətinin Fərmanı, 1986-ci ildə isə “Şərəf nişanı” ordeni və A.S.Puşkin medalı ilə təltif edilmişdi.

1946-cı ildə - Bəstəkar-musiqişünas, professor, akademik Yusif Məmmədəliyev adına mükafatın laureatı Gülnaz Abutalıb qızı Abdullazadə Bakı şəhərində anadan olmuşdur. Azərbaycan və dünya musiqisinin fəlsəfi problemlərinə və Azərbaycan bəstəkarlarının yaradıcılığına dair bir sıra əsərlərin müəllifidir. Azərbaycan musiqişünaslığında ilk dəfə olaraq muğamların fəlsəfi mahiyyətini araşdırmışdır.

1952-ci ildə - Azərbaycanın Milli Qəhrəmanı, Qarabağ müharibəsi şəhidi Məhərrəm Mirəziz oğlu Seyidov (1952-1990) Şərur rayonunun Alışar kəndində anadan olmuşdur.

1969-cu ildə - Ömrünün 38 ilini Opera Teatrına (indiki Azərbaycan Dövlət Akademik Opera və Balet Teatrı) teatra həsr edən rejissor, Azərbaycan SSR Əməkdar incəsənət xadimi, xalq artisti Soltan Baba oğlu Dadaşov (Zaki) (1906-1969) Bakı şəhərində vəfat etmişdir. 

1991-ci ildə - Erməni təxribatçı dəstələri Dağlıq Qarabağın azərbaycanlı əhalisinə qarşı növbəti terror aktları həyata keçiriblər. Hadrut (Xocavənd) rayonunun Tuğ kəndinə silahlı basqın nəticəsində kəndin 2 sakini öldürülüb. Xankəndi yaxınlığında sərnişin avtobusunun atəşə tutulması nəticəsində isə 3 azərbaycanlı öldürülüb, 4 nəfər yaralanıb.

1992-ci ildə - Azərbaycan Respublikası Yaponiya ilə diplomatik əlaqələr qurmuşdur.

1998-ci il sentyabrın 7-8-də - Bakıda "Böyük İpək Yolu" Beynəlxalq konfransı keçirildi. Dünyanın 32 ölkəsinin və beynəlxalq təşkilatının təmsil olunduğu bu konfransda "Bakı Bəyannaməsi" qəbul edildi, Yeni İpək Yolunun tranzit ölkələr üçün son dərəcə faydalı olacağı bildirildi, Böyük İpək Yolunun mənzil qərargahı yaradıldı və onun Bakıda yerləşməsi qərara alındı. 

2000-ci ildə - Nyu-Yorkda BMT-nin "Minilliyin sammiti"ndə iştirak edən prezident Heydər Əliyev Baş Assambleyanın təntənəli iclasında çıxış edib. Beynəlxalq birliyin Ermənistanın təcavüzünə seyrçi qaldığını vurğulayan Azərbaycan rəhbəri bu faktın işğalçılığı təşviq etdiyini bildirib. Həmin gün BMT-nin binasında GÖUAM dövlət başçılarının - Gürcüstan (E.Şevardnadze), Özbəkistan (İ.Kərimov), Ukrayna (L.Kuçma), Azərbaycan (H.Əliyev) və Moldova (P.Luçinski) prezidentlərinin sammiti keçirilib.

2006-cı ildə - BMT Baş Assambleyasının 60-cı sessiyasında Ermənistanın Azərbaycana qarşı işğalçılıq müharibəsinin fəsadlarından bəhs edən yeni sənəd qəbul olunub. "Azərbaycanın işğal olunmuş ərazilərindəki vəziyyət haqqında" adlı qətnamədə ermənilərin işğal edilmiş torpaqlarda yanğınlar törətməsinə diqqət çəkilirdi. Qətnamədə münaqişə zonasında monitorinqin həyata keçirilməsi əksini tapsa da, bu, gerşəkləşmədi.