935    

08/09/2017

1578-ci ildə - Səfəvi dövləti ilə Osmanlı imperatorluğu arasında çoxillik müharibələrin ikinci mərhələsi başlanıb. Azərbaycanın şimal-qərbində Qanıx (Alazan) çayı sahilində (indiki Zaqatala-Balakən ərazisi) baş verən döyüşdə Səfəvi qoşunları qalib gəlib. Lakin müharibənin sonrakı döyüşlərində Osmanlılar ard-arda qələbəlar qazandılar və 1590-cı ildə bağlanan İstanbul sülh sazişi ilə iki türk dövlətinin qanlı müharibələrinin növbəti mərhələsinə yekun vuruldu. 

1909-cu ildə - İlk Azərbaycan kino aktrisalardan biri, Azərbaycan Milli Elmlər Akademiyasının akademiki, dövlət mükafatı laureatı, Əməkdar elm xadimi, texnika elmləri doktoru, professor İzzət Mirzəağa qızı Orucova (1909-1983) Bakıda anadan olmuşdur. Lenin ordeni, Oktyabr İnqilabı, Qırmızı Əmək Bayrağı, “Şərəf nişanı” ordenləri və bir sıra medallarla təltif edilmişdir.

1918-ci ildə - Azərbaycan Xalq Cümhuriyyətinin qırmızı rəngli bayrağı səthində ağ aypara və səkkizguşəli ulduz təsvir olunan, bərabər endə mavi, qırmızı və yaşıl zolaqlar rəngində bayraqla əvəz edildi.  

1926-cı ildə - Ölkəmizdə ilk dəfə olaraq ürək çəpərinin anadangəlmə  qüsurlarının klinik xüsusiyyətlərini öyrənmiş, süni qan dövranı şəraitində cərrahi müalicəyə göstəriş və əks göstəriş kriteriyasını  müəyyənləşdirmiş, həmin qüsurların təsnifatını təklif etmiş həkim, pediatr Adilə Əvəz qızı Namazova Ağdam rayonunun Seyidli kəndində anadan olmuşdur. 1965-ci ildən tibb elmləri doktoru və Azərbaycan Tibb Universiteti 1-ci Uşaq xəstəlikləri kafedrasının müdiri, 1966-cı ildən professor, SSRİ Tibb EA müxbir üzvü (1971), Səhiyyə əlaçısı, Azərbaycan SSR Əməkdar elm xadimi (1981), Azərbaycanın Əməkdar həkimi, Azərbaycan SSR Dövlət mükafatı laureatı (1982), 1994-cü ildən Rusiya Tibb Elmləri Akademiyasının müxbir üzvü, Beynəlxalq Pediatrlar Assosiasiyasının üzvü, Türkdilli ölkələrin Mərkəzi Asiya Pediatrlar Assosiasiyasının (Beynəlxalq iştirakla) IV konqresinin prezidenti, Türkdilli  ölkələrin,  Mərkəzi  Asiya  Pediatrlar Assosiasiyasının vitse-prezidenti, Türkiyə “Pediatriya” jurnalının redaksiya kollegiya üzvü, Türkiyə Beynəlxalq Pediatiriya” jurnalının redaksiya kollegiya üzvüdür. 1996-cı ildə “Şöhrət” ordeni, medal və bir sıra fəxri fərmanla təltif olunmuşdur.

1942-ci ildə - SSRİ Dövlət Müdafiə Komitəsinin (sədr İ.Stalin) əmri ilə Azərbaycan SSR ərazisində hərbi vəziyyət elan edilib. Bu vaxt faşist Almaniyasının qoşun birləşmələri artıq Qafqaz dağlarında idi və Bakı üzərinə hava reydləri həyata keçirilirdi.

1989-cu ildə - Ədəbiyyat tarixçisi, tərcüməçi, publisist, professor İnayət Heydər oğlu Bəktaşi (1931-1989) Bakıda vəfat etmişdir. O, filologiya elmləri doktoru alimlik dərəcəsi verən müxtəlif ixtisaslaşdırılmış elmi şuraların üzvü idi. 

1991-ci ildə - Erməni silahlı dəstələri Dağlıq Qarabağın azərbaycanlı əhalisinə qarşı yeni terror aktları həyata keçiriblər. Ağdam-Xocavənd avtobusunun atəşə tutulması nəticəsində 5 nəfər qətlə yetirilib 34 nəfər yaralanıb. Ağdam-Qaradağlı marşrutu üzrə avtobusun gülləbaran edilməsi nəticəsində 8 azərbaycanlı həlak olmuş, 42 nəfər xəsarət almışdı.