2844
10/09/2017 AMEA-nın Tarix İnstitutunun Qafqaz tarixi şöbəsinin nəzdində “Dərbənd tarixi” bölməsinin müdiri, tarix elmləri doktoru İkram Ağasiyev və tarix elmləri doktoru, professor Şirxan Səlimovun birgə redaktəsi ilə "Azərbaycan tarixi" dərsliyi işıq üzü görüb. Ali məktəblər üçün nəzərdə tutulan dərslik akademik R.Ə. Mehdiyevin redaktorluğu ilə 2011-ci ildə hazırlanmış Azərbaycan tarixinin konsepsiyası, “Azərbaycan tarixi” fənni üzrə bakalavr pilləsi üçün hazırlanmış proqram, Ali təhsilin təbiət və texniki ixtisaslar üçün “Azərbaycan tarixi” fənninin Dövlət standartları və proqramı əsasında tərtib edilmişdir. Dərslikdə qədim zamanlardan bu günümüzədək Azərbaycan torpaqlarında cərəyan edən tarixi və siyasi proseslər tədris planında mühazirə və məşğələ üçün müəyyən olunmuş mövzular üzrə ardıcıl olaraq əks olunmuşdur. Müəlliflər Azərbaycan tarix elminin ən son tədqiqatlarından, müxtəlif qaynaqlardan bəhrələnərək yeni-yeni tarixi faktlarlarla zəngin dərslik hazırlamışlar. “Azərbaycan tarixi” adlı dərslik ali məktəb müəllimləri, bakalavr və magistr pillələrində bütün ixtisaslar üzrə təhsil alan tələbələr üçün nəzərdə tutulmuşdur.