"16 SENTYABR" TARIXIMIZDƏ
Ana səhifə > Xəbərlər > "16 Sentyabr" tariximizdə
927    
15/09/2017

1882-ci ildə - "Nobel qardaşları" şirkətinin Qara şəhərdəki neftayırma zavodunda fəhlələrin tətili baş verdi. Şirkətin idarə binasına tərəf hərəkət edən fəhlələr ay yarım ərzində müdiriyyət tərəfindən gecikdirilən əməkhaqqının təcili olaraq verilməsini tələb etdilər. Tələb yerinə yetirildi və fəhlələr işə başladılar. 

1893-cü ildə - Arxeoloq, tarix elmləri namizədi Saleh Mustafa oğlu Qazıyev (1893-1971)  Oğuz rayonunun Xaçmaz kəndində anadan olmuşdur. Sayı 20 mindən çox olan Mingəçevir abidələrinin ilk dəfə arxeoloji təsnifatını və səciyyəsini vermişdir. O 40-dan çox elmi əsərin və məqalənin müəllifidir.

1918-ci ildə - Azərbaycan Xalq Cümhuriyyəti hökuməti ilə Osmanlı hökuməti arasında ilk ticarət sazişi bağlanıb. Saziş Azərbaycandan Türkiyəyə neft, pambıq, yun və digər məhsulların ixracını nəzərdə tuturdu. Sazişin ilkin məbləği 3 mln. türk lirəsi həcmində nəzərdə tutulmuşdu. Həmin dövrdə xüsusilə neft təchizatında ciddi problemlərlə üzləşən Osmanlı dövləti üçün bu saziş olduqca mühüm idi. Türkiyə tərəfi öz növbəsində Azərbaycana texniki avadanlıq və silah göndərirdi.

1919-cu ildə - Azərbaycan Cümhuriyyəti parlamentinin qəbul etdiyi qanuna görə, xalq məktəbləri kitabxanalarına türk (Azərbaycan) dilində yeni kitablar almaq üçün dövlət xəzinəsindən Xalq Maarifi Nazirliyinin sərəncamına 1.000.000 manat vəsait ayrıldı.  

1920-ci ildə - Azərbaycan İnqilab Komitəsinin dekreti ilə bütün musiqi və not mağazaları milliləşdirildi 

1923-cü ildə - M.Ə.Rəsulzadənin 1923-cü ildə çapdan çıxan "Azərbaycan Cümhuriyyəti" kitabı barədə Stalin "R.Zadənin mürtəce kitabçası barədə" başlığı altında "Yol. Musabəyova, Mirzəyana, Axundova, Kirova və Orixelaşviliyə mənim məsləhətim" qeydi ilə məktub göndərmişdi. Q.Musabəyov dərhal inqilab muzeyinin rəhbərliyinə (Rotqauzerə) "Yol. Stalinin tezislərinə uyğun broşür (kitabça) tərtib etmək üçün" lazımi materialların ona təqdim cdilməsi göstərişini vermişdi.

1924-cü ildə - Arxeoloq, tarix elmləri namizədi, ictimai-siyasi və mədəniyyət xadimi, Azərbaycan SSR Ali Sovetinin deputatı və Rəyasət Heyətinin katibi, mədəniyyət nazirinin müavini, Respublika Mədəniyyət Fondu İdarə Heyətinin sədr müavini, Siyasi Maarif evinin müdiri olmuş Güllü Əbil qızı Əbilova (1924 - 1994) Bakının “Qara şəhər” adlandırılan bir guşəsində, adlı-sanlı neftçi ailəsində dünyaya göz açmışdır.

1926-cı ildə - Azərbaycanın tanınmış neftçisi Qaraş Əmirov (1926-1973) anadan olmuşdur.

1942-ci ildə - İ.V.Stalinin başçılığı ilə ölkədə bütün hakimiyyəti öz əlində cəmləşdirən Dövlət Müdafiə Komitəsi Mahaçqala, Dərbənd və Bakı ətrafında möhkəmləndirilmiş müdafiə sədlərinin yaradılması haqqında xüsusi qərar qəbul etdi.

1989-cu ildə - Erməni təxribatçıları Azərbaycana qarşı daha bir terror aktı həyata keçiriblər. Tbilisi-Bakı marşrutu ilə hərəkət edən sərnişin avtobusunun partladılması nəticəsində 5 nəfər həlak olub, 25 nəfər yaralanıb.