987    

17/09/2017

1048-ci ildə - Azərbaycan torpaqlarında təşəkkül tapmış Səlcuqilər dövlətinin ordusu Bizans, erməni və gürcü feodallarının birləşmiş qoşunlarını darmadağın edib. Bu qələbədən sonra Səlcuq dövlətinin əsasları daha da möhkəmləndi. Sultan Toğrul bəyin başçılıq etdiyi Səlcuqlar dövləti indiki İranın böyük hissəsini, indiki İraq ərazisi ələ keçirməklə böyük imperatorluq yaratdı.

1885-ci ildə - Dahi bəstəkar, musiqişünas alim, publisist, pedaqoq Üzeyir bəy Əbdülhüseyn oğlu Hacıbəyov (1885-1948) Şuşada anadan olub. Azərbaycanda ilk operanın, ilk müsiqi komediyanın (operettanın) müəllifi, Azərbaycan professional müsiqisinin banisi, Milli Konservatoriyanın qurucusudur. Böyük bəstəkarın doğum günü Milli musiqi günü kimi qeyd olunur.

1919-cu ildə - Azərbaycan hökuməti respublikada fəaliyyət göstərən bütün dövlət və ictimai mətbəələrin bütün avadanlıqları ilə birlikdə Xalq Maarif Komissarlığının sərəncamına verilməsi haqqında qərar qəbul etmişdir. 

1919-cu ildə - Azərbaycan Dövlət Bankının nizamnaməsi təsdiqləndi və sentyabrın 30-da onun təntənəli açılışı oldu. 

1925-ci ildə - Görkəmli tərcüməçi, dilçi alim, filologiya elmləri namizədi, antisovet "İldırım" təşkilatının qurucularından biri İsmixan Məmməd oğlu Rəhimov (1925-2004) Bakı şəhərində anadan olub.

1926-cı ildə - Azərbaycan Xalq Cümhuriyyəti Parlamentinin xüsusi qərarına əsasən, dövlət hesabına ali təhsil almaq üçün xaricə göndərilmiş tələbələrdən biri, Paris Sülh Konfransına (1919-1920) göndərilmiş Azərbaycan Hökuməti nümayəndə heyətinin katibi. Əlimərdan bəy Topçubaşovun oğlu Rəşid bəy Topçubaşov (1900-1926) gənc yaşda dünyasını dəyişdi. 

1971-ci ildə - Azərbaycanın Milli Qəhrəmanı Seymur Qəhrəman oğlu Məmmədov (1971-1992) Füzuli rayonunda dünyaya göz açmışdır.

1978-ci ildə - Azərbaycanın görkəmli teatr və kino rejissoru, aktyoru, Zaqafqaziyanın ilk SSRİ xalq artisti Adil Rza bəy oğlu İsgəndərov (1910-1978) Bakıda vəfat edib. 

1988-ci ildə - Böyük şair, XX əsr Azərbaycan poeziyasının görkəmli nümayəndəsi Məhəmmədhüseyn Şəhriyar (Seyid Məhəmmədhüseyn Behcəti Təbrizi) (1905-1988) Tehranda vəfat edib.

1988-ci ildə - Ermənilər Xocalıya hücum etdilər. Qanlı toqquşma baş verdi.

2002-ci ildə - Səngəçal terminalında Bakı-Tbilisi-Ceyhan neft kəmərinin təməlatma mərasimi keçirilib. Mərasimdə Azərbaycan, Türkiyə və Gürcüstan prezidentləri Heydər Əliyev, Əhməd Necdət Sezər və Eduard Şevardnadze, ABŞ-ın energetika naziri Spenser Abraham, BTC layihəsində yer alan şirkətlərin təmsilçiləri iştirak ediblər. Kəmərin Azərbaycan hissəsinin inşası 2005-ci ilin mayında, Gürcüstan hissəsi həmin ilin oktyabrında, Türkiyə hissəsi isə 2006-cı ilin əvvəlində başa çatdı, rəsmi açılışı 2006-cı ilin iyulunda gerçəkləşdi.

2006-cı ildə - Azərbaycan prezidenti İlham Əliyev Türkiyənin Antalya şəhərində keçirilən türk dövlət və toplumlarının X dostluq, qardaşlıq və əməkdaşlıq qurultayında iştirak edib.