966    

19/09/2017

1920-ci ildə - Azərbaycan hökuməti İtaliya, Gürcüstan, Ermənistan diplomatik nümayəndəliklərini və konsulluqlarını tanıdığını bəyan etmişdi. İngiltərənin Bakıdakı vitsekonsulu isə həbs edilmişdi. 

1920-ci ildə - Bakıda Azərbaycan mədəniyyət və maarif işçilərinin birinci qurultayı açıldı. Azərbaycan hökumətinin başçısı Nəriman Nərimanov qurultayda elan etmişdi: "Köhnə quruluşun ləğvi ilə məktəb də yeniləşməlidir. Tədris və tərbiyə üsullan yeni olmalıdır". 

1963-cü ildə - Azərbaycanın Milli Qəhrəmanı Aqil Sahib oğlu Quliyev (1963-1992) Qərbi Azərbaycanın Qarakilsə rayonunda doğulmuşdur.

1973-cü ildə - Azərbaycan Respublikasının Əməkdar incəsənət xadimi, Azərbaycan MEA-nın müxbir üzvü, Azərbaycan teatrşünaslıq elminin formalaşmasında müstəsna xidmətlər göstərən, bu elmin fundamental inkişaf proqramını müəyyənləşdirən alim-nəzəriyyəçi Cəfər Haşım oğlu Cəfərov (1914-1973) Bakıda vəfat etmişdir. I Fəxri Xiyabanda dəfn edilmişdir.

1992-ci ildə - Soçidə Rusiya müdafiə nazirinin vasitəçiliyi ilə Azərbaycan və Ermənistan müdafiə nazirlərinin görüşündə atəşkəsə dair razılıq əldə olunub. Tərəflər hərbi əməliyyatların iki ay ərzində dayandırılması barədə anlaşma imzalayıblar. Rusiyanın vasitəçiliyinin arxasında sonradan münaqişə bölgəsinə rus sülhməramlılarının yeridilməsi niyyəti də vardı. Lakin anlaşma erməni tərəfin günahı üzündən tezliklə pozuldu.

1992-ci ildə - Şərqşünas, ədəbiyyatşünas, tənqidçi, tərcüməçi, 1981-ci ildən Azərbaycan Yazıçılar Birliyinin üzvü, filologiya elmləri doktoru (1987) Aida Nəsir qızı İmanquliyeva (1939-1992) Bakıda vəfat etmişdir.

1995-ci ildə - Bəstəkar. SSRİ xalq artisti (1978), Azərbaycan musiqili komediyasının inkişafında mühüm xidmətləri olmuş Rauf Soltan oğlu Hacıyev (1922-1995) vəfat edib. 

1997-ci ildə - ATƏT-in Minsk qrupunun həmsədrləri (Rusiya, ABŞ və Fransadan olan nümayəndələr) Dağlıq Qarabağ münaqişəsinin "mərhələli həll" planı ilə regiona səfərə gəliblər. Plan münaqişənin ikimərhələli həllini əks etdirirdi: birinci mərhələdə Laçın istisna olmaqla, keçmiş Dağlıq Qarabağ Muxtar Vilayətindən kənarda yerləşən altı rayondan erməni silahlı qüvvələrinin çıxarılması, köçkünlərin öz torpaqlarına qaytarılması və münaqişə ərazisində kommunikasiya əlaqələrinin bərpa edilməsi, ikinci mərhələdə Laçın və Şuşanın, eləcə də Dağlıq Qarabağın statusunun müəyyən edilməsi nəzərdə tutulurdu. Plana razılıq verən Ermənistan prezidenti L.Ter-Petrosyan hakimiyyətdaxili çevriliş nəticəsində vəzifəsindən kənarlaşdırıldı.

2002-ci ildə - Azərbaycan Respublikasının Konstitusiyasına dəyişikliklər edilməsi ilə bağlı 24 avqust 2002-ci il tarixdə keçirilmiş referendumun yekun nəticələri mətbuatda dərc olunaraq qüvvəyə minib. MSK-nın yekun məlumatına görə, referendumda iştirak etmiş seçicilərin 96 faizi Konstitusiyaya dəyişikliklərin (24 maddə üzrə 39 dəyişiklik) lehinə səs vermişdi. Referendum aktına əsasən prokurorluğa qanunvericilik təşəbbüsü hüququ da verilmişdir.