1104    

22/09/2017

1067-ci ildə - Bağdadda Nizamülmülkün bilavasitə təşəbbüsü ilə açılmış "Nizamiyyə" mədrəsəsi dövrün ən başlıca elm ocağı - "universiteti" hesab edilirdi. Mədrəsənin tikintisi başa çatan kimi Nizamülmülk bu dövrdə artıq dərin bilikli mötəbər bir alim kimi tanınan azərbaycanlı Xətib Təbrizini mədrəsə kitabxanasının müdiri, eyni zamanda, akademik İ.Y.Kraçkovskinin təbirincə desək, onun ədəbiyyat kafedrasının "professoru" təyin edir.

1905-ci ildə - Peterburqda keçirilən müşavirədə Bakı qarnizonu və polisinin gücləndirilməsi məsələsini qaldıran neft sənayeçiləri qradonaçalnikliyin yaradılması tələbini irəli sürərək, onun saxlanması xərclərinin xeyli hissəsini öz üzərlərinə götürməyə hazır olduqlarını nümayiş etdirirdilər. 

1918-ci ildə - Azərbaycan Xalq Cümhuriyyətinin hökuməti ölkənin milli valyutasının - manatın (Bakı bonları) çap olunması barədə qərar qəbul edib. Həmin vaxtadək dövriyyədə bir neçə pul vahidi - çar dövründən qalan rubl ("Nikolay rublu"), Rusiyanın "Müvəqqəti Hökuməti" tərəfindən buraxılmış rubl ("Kerenski rublu"), Tiflisdə Zaqafqaziya hökuməti tərəfindən buraxılan bonlar, eləcə də türk lirəsi işlənilirdi. Azərbaycan manatı türk lirəsinə 20:1 nisbətdə dövriyyəyə buraxılmışdı. Lakin manatın tədavülə buraxılmasından sonra digər valyutalar da dövriyyədə qaldı və bu, ölkənin maliyyə sistemində ciddi qarışıqlıq yaradırdı.

1920-ci ildə - Azərbaycanın bolşevik hökuməti (Müvəqqəti İnqilab Komitəsi) ölkə ərazisində müvəqqəti yerli hakimiyyət orqanlarının - yoxsul komitələrinin yaradılması barədə qərar qəbul edib. Bu qərar ölkədə hakimiyyətin xalqa məxsus olması illüziyasını yaratmaq niyyəti güdürdü. Yoxsul komitələri bir ilə yaxın fəaliyyət göstərdi və 1921-ci ildə I Ümumazərbaycan sovetlər qurultayından sonra yerlərdə fəhlə-kəndli sovetlərinə ilk seçkilər keçirildi.

1967-ci ildə - Azərbaycan Respublikası Dövlət Sərhəd Xidmətinin rəisi, general-polkovnik Elçin İsağa oğlu Quliyev Sumqayıt şəhərində anadan olmuşdur.

1990-ci ildə - SSRİ Ali Sovetinin Azərbaycandan seçilmiş deputatları ittifaq parlamentinə və SSRİ rəhbərliyinə müraciət qəbul edərək azərbaycanlı əhalinin Ermənistandan zorla deportasiyasına siyasi qiymət verməyi tələb ediblər. Bu zaman Ermənistan ərazisində (1991-ci ildə köçürülən Nüvədi kəndi istisna olmaqla) azərbaycanlı əhali qalmamışdı. SSRİ rəhbərliyi bu müraciətə laqeyd qaldı.