1003    

22/09/2017

1914-cü ildə - Əməkdar elm xadimi, 1968-ci ildən Azərbaycan EA-nın həqiqi üzvü Validə Xaspolad qızı Tutayuq (1914-1980) Şuşada doğulmuşdur. 

1928-ci ildə - Tanınmış opera müğənnisi, xalq artisti Firəngiz Yusif qızı Əhmədova (1928-2002) Bakıda anadan olub.

1929-cu ildə - 1958-ci ildən Azərbaycan Yazıçılar Birliyinin üzvü, 1986-cı ildə “Əməkdar incəsənət xadimi” fəxri adına layiq görülmüş yazıçı Əfqan Hacıağa oğlu Əsgərov keçmiş Əli Bayramlı (indiki Şirvan) rayonunun Qaradağlı kəndində anadan olmuşdur. 

1969-cu ildə - Şair, publisist, 20 Yanvar şəhidi Ülvi Yusif oğlu Bünyadzadə (1969-1990) Göyçə mahalının Basarkeçər rayonunun Kəsəmən kəndində, ziyalı ailəsində dünyaya göz açmışdır.

1989-cu ildə - Azərbaycan SSR Ali Soveti "Azərbaycan SSR-nin dövlət suverenliyi haqqında" Konstitusiya qanunu qəbul edib. Sənəddə ilk dəfə belə bir məqam əksini tapmışdı ki, ittifaq (SSRİ) səviyyəsində qəbul olunmuş qanunvericilik aktı Azərbaycanın suverenliyinə xələl gətirərsə, onun respublika ərazisində qüvvəsi dayandırılacaq. Lakin bu daha çox bəyannamə səciyyəli sənəd idi. Analoji aktlar SSRİ-nin digər subyektlərində də qəbul edilmişdi.

1991-ci ildə - Jeleznovodsk (Rusiya, Şimali Qafqaz) şəhərində Rusiya prezidenti B.Yeltsin və Qazaxıstan prezidenti N.Nazarbayevin vasitəçiliyi ilə Ermənistan və Azərbaycan rəhbərləri A.Mütəllibov və L.Ter-Petrosyan arasında görüş keçirilib. Görüşdə Dağlıq Qarabağın erməni və azərbaycanlı icmalarının nümayəndələri də iştirak edib. Görüş münaqişənin sülh yolu ilə həllinə dair bəyannamə imzalanıb. Bir neçə gün sonra erməni silahlı qüvvələri Dağlıq Qarabağın azərbaycanlı əhalisinə qarşı yeni hücumlara başladı.

1992-ci ildə - Azərbaycanla Vyetnam arasında diplomatik münasibətlər qurulub.

2002-ci ildə - Prezident Heydər Əliyevin Moskvaya səfəri gedişində Kremlin "Şərəf salonu"nda Rusiya ilə Azərbaycan arasında Xəzərin dibinin bölünməsinə dair saziş imzalanıb. Prezidentlər V.Putin və H.Əliyev tərəfindən imzalanan saziş Xəzərin sektoral bölgüsü istiqamətində mühüm hadisə idi. Daha öncə Rusiya ilə Qazaxıstan arasında analoji sənəd imzalanmışdı.  

2014-cü ildə - 25-dən artıq kitabın müəllifi, bir sıra əsərləri rus, ingilis, türk, bolqar, çin, yapon və başqa dillərə tərcümə olunmuş və həmin ölkələrin nəşriyyatlarında çapdan çıxmış Azərbaycanın Əməkdar mədəniyyət işçisi, yazıçı Ələviyyə Hənifə qızı Babayeva (1921-2014) vəfat etmişdir.