1047    

24/09/2017

1872-ci ildə - Görkəmli  dövlət və elm xadimi, diplomat Adil xan Əbülfət ağa oğlu Ziyadxanov (1872-1954) Gəncə şəhərində anadan olmuşdur.  

1906-cı ildə - Azərbaycan Teatr Cəmiyyətinin üzvü, Azərbaycan SSR və Türkmənistan SSR-in Əməkdar artisti, opera müğənnisi Xanlar Məmməd oğlu Haqverdiyev (1906-1980) Ağdam rayonunun Seyidli kəndində, bəy ailəsində anadan olmuşdur. 

1913-cü ildə - Azərbaycanın Dövlət mükafatı laureatı, Milli teatr rəssamlığımızın inkişafında və formalaşmasında böyük xidmətlər göstərmiş Nüsrət Möhsün oğlu Fətullayev (1913-1987) Lənkəranda anadan olmuşdur. Milli Dram Teatrında əllidən çox tamaşanın rəssamı olmuşdur. 

1922-ci ildə - Rusiya Kommunist (bolşevik) Partiyasının Mərkəzi Komitəsi latın əlifbasının tətbiq olunması məsələsini müzakirə edərək, Azərbaycan MİK-in təşəbbüsünü qəbul etməyi qərara aldı. Geniş kütlələrin içərisində savadsızlığın tezliklə ləğv edilməsi və ana dilində çap və nəşr işlərinin asanlaşdırılması üçün latın şriftinin tətbiq edilməsinin əhəmiyyətini nəzərə alaraq, Azərbaycan SSR MİK 1923-cü ilin əvvəlində fəhlə fakültələri və II pillə məktəblərdə yeni əlifbanın tətbiqini qanuniləşdirdi, mayın 19-da isə Xalq Maarif Komissarlığı Bakı xalq təhsili şöbəsinə növbəti tədrisindən bütün məktəblərdə tədrisi yeni əlifbaya keçirməyi tövsiyə etdi. 1925-ci ilin martında IV Ümumazərbaycan Sovetlər qurultay yeni əlifbanı həyata keçirmək üçün bir sıra direktivlər qəbul etdi Qurultay bütün pillə məktəblərdə yeni Azərbaycan əlifbasına keçməyə icazə verdi, səkkiz il müddətində, yəni 1932/33-cü tədris ilinədək bütün I və II pillə məktəblərdə yeni əlifbaya keçilməsinin başa çatdırılmasını, yeni əlifbaya keçməyən qruplarda isə tədrisin həmin vaxtda köhnə əlifba ilə aparılmasını qərara aldı. 

1946-cı ildə - Müasir Azərbaycan ədəbiyyatının tanınmış simalarından biri, populyar şair Nüsrət Kəsəmənli (1946-2003 ) anadan olub.

1991-ci ildə - “Qızıl qələm” mükafatı laureatı, filologiya elmləri doktoru, professor Nurəddin Həsən oğlu Babayev (1921-1991) Bakıda vəfat etmiş, II Fəxri Xiyabanda dəfn edilmişdir. O, 1961-1981-ci illərdə SSRİ döyüş medalları və Azərbaycan Respublikası Ali Soveti Rəyasət Heyətinin Fəxri fərmanları ilə təltif edilmiş, 1982-ci ildə “Əməkdar incəsənət xadimi” fəxri adlarına layiq görülmüşdür. 

1993-cü ildə - MDB dövlət başçılarının Moskva sammitində Azərbaycan və Ermənistan prezidentləri Heydər Əliyev və Levon Ter-Petrosyan arasında ilk təkbətək danışıqlar keçirilib. Rusiya prezidenti Boris Yeltsinin vasitəçiliyi ilə baş tutan görüşdə cəbhə xəttində atəşkəs imkanları müzakirə olunub. Lakin erməni qüvvələri qısa fasilədən sonra, oktyabrın əvvəlində yenidən Qarabağın cənubunda - Cəbrayıl-Füzuli rayonları ərazisində işğalçılıq hücumlarını davam etdirib.

1997-ci ildə - Prezident Heydər Əliyev İtaliyaya ilk rəsmi səfərə gedib. Səfər gedişində Azərbaycan prezidenti İtaliya rəhbərliyi ilə danışıqlar aparıb, iki ölkə arasında sazişlər imzalanıb. Azərbaycan rəhbəri Vatikanda Papa II İohann Pavellə görüşüb.

1999-cu ildə - ABŞ dövlət katibi Madlen Olbrayt Azərbaycan prezidenti Heydər Əliyevə məktub göndərərək Qarabağ münaqişəsinin həlli üçün daha cəsarətli addımlar atmağı xahiş edib. Olbrayt eyni məzmunlu məktubu Ermənistan prezidentinə də göndərmişdi. Həmin dövrdə Ermənistan-Azərbaycan sülh danışıqlarının intensiv dövrü idi və noyabrda ATƏT-in İstanbul sammitində tərəflər arasında sülh razılaşmasının imzalanacağı gözlənilirdi. Lakin oktyabrın 27-də Ermənistan parlamentində baş verən olaylardan (baş nazir və spikerin qətlə yetirilməsi) sonra sülh prosesi dayandı.  

2009-cu ildə - Azərbaycanın Milli Qəhrəmanı Arif Vəliş oğlu Qubadov (1966-2009) uzun sürən xəstəlikdən sonra vəfat etmişdir.