981    

25/09/2017

1618-ci ildə - Mərənddə Osmanlı paşası Xəlil paşa ilə Səfəvi hökmdarı Şah I Abbas arasında sülh müqaviləsi imzalandı. Sərab sülhünün şərtlərinə görə: Səfəvilər hər il 100 ipək, 100 yük də ipək parça və digər əşyalarla Osmanlılara xərac ödəcəyəcəkdilər; Səfəvilər Həzrəti Aişə və Xəlifələrə lənət oxunmayacaqdılar; Səfəvilər Şamxal və digər Dağıstan hakimlərinin torpaqlarına zərər vurulmayacaqdılar; Bağdad ilə Səfəvi hüdudu arasındakı Vəhmin, Dərnə və Dərtənk sancaqlarına əlavə edilən ərazilərə yenə Səfəvilər sahib olacaq. 

1808-ci ildə - Rus generalı Qudoviç irəvanlı Hüseyn xan başda olmaqla 4 min nəfərdən ibarət Qacar qoşununu məğlub etdi. Rus qoşunları İrəvana geri çəkilən Hüseyn xanı təqib edərək yolüstü Üçmüədzini ələ keçirtdi. Bu zaman general Nebolsin Naxçıvana doğru irəliləyərək, oktyabrın sonunda Qarababa kəndi yanında Qacar qoşunlarını dağıtdı və Naxçıvanı tutdu. Rus qoşunlarının birləşmiş qüvvələri İrəvanın mühasirəsinə başladı və mayın ortalarında qalaya hücuma keçdi. Lakin müvəffəqiyyətsizliyə uğrayıb geri çəkildi. Rus qoşunları Naxçıvanı da tərk etməyə məcbur oldular. Abbas Mirzə Naxçıvanı tutaraq, rus qoşunlarını təqib etməyə başladı. Qarababa kəndi rayonunda döyüş baş verdi, Qudoviç yenidən məğlubiyyətə uğradı. 1808-ci il kampaniyası uğursuz başa çatdı və Qudoviç istefaya getməyə məcbur oldu.

1906-cı ildə - Azərbaycan və Türkmənistan Respublikalarının əməkdar artisti, xanəndə Xanlar Məmməd oğlu Haqverdiyev (1906-1980) Ağdam rayonunun Seyidli kəndində bəy ailəsində anadan olmuşdur.

1918-ci ildə - Azərbaycanın bütün ərazisində Xalq Cümhuriyyəti hakimiyyətinin bərqərar olunması üçün hərbi əməliyyatları davam etdirən Nuru paşanın komandanlığı altındakı Qafqaz İslam Ordusu Qarabağda erməni-daşnak hərbi birləşmələrinə güclü zərbə endirərək Şuşa şəhərinə daxil olub. Əhali xilaskar ordunu böyük təntənə ilə qarşılayıb. Lakin tezliklə Osmanlının I Dünya müharibəsindəki məğlubiyyəti səbəbilə türk hərbi kontingenti Azərbaycanı tərk etməli oldu və bu zəfər yürüşü də yarımçıq qaldı.

1918-ci ildə - Sentyabrın 26-dan noyabrın 5-nə qədər Azərbaycan hökuməti ordu komandanlığının sərəncamına 11 milyon manat ayırdı.

1991-ci ildə - Erməni təxribatçıları azərbaycanlı əhaliyə qarşı növbəti terror aktı törədiblər. Yevlax-Laçın yolunda minik avtomaşınının partladılması nəticəsində 2 nəfər həlak olub, 4 nəfər yaralanıb.

2002-ci ildə - Avropa Şurası Parlament Assambleyasında (AŞPA) Ermənistanın Azərbaycana qarşı təcavüzü və apardığı işğalçılıq siyasətini nəzərə çatdıran ilk qətnamə qəbul olunub. Azərbaycanın AŞPA-dakı nümayəndə heyətinin rəhbəri İlham Əliyevin təşəbbüsü ilə Ermənistanın Avropa Şurası qarşısındakı öhdəlikləri ilə bağlı qətnaməyə bu ölkənin Azərbaycana qarşı təcavüzü və işğal olunmuş ərazilər haqqında bənd əlavə edilib.

2008-ci ildə - Nyu-Yorkda, BMT Baş Assambleyasının 63-cü sessiyası gedişində Azərbaycan, Türkiyə və Ermənistanın xarici işlər nazirləri arasında görüş keçirilib. Türkiyənin təşəbbüsü ilə gerçəkləşən görüşdə üçtərəfli formatda müzakirələrin davam etdirilməsi qərara alınıb.

2009-cu ildə - Azərbaycanın görkəmli dilşünas alimi, publisist, pedaqoq, 2001-ci ildən Azərbaycan Yazıçılar Birliyinin üzvü, Azərbaycan Milli Elmlər Akademiyasının müxbir üzvü (1983), filologiya elmləri doktoru, professor (1970), əməkdar elm xadimi (1981), Dövlət Mükafatı laureatı (1991) Afad Məhəmməd oğlu Qurbanov (1929-2009) vəfat etmişdir.

2009-cu ildə - Azərbaycanın Milli Qəhərmanı, polkovnik-leytenant Arif Vəliş Oğlu Qubadov (1966-2009) 43 yaşında Türkiyədə müalicə olunduğu Gülhanə Hərbi Tibb Akademiyasında vəfat etmişdir.