1014
01/10/2017 1827-ci ildə - Rusiya qoşunları Qacarlarla müharibənin (1826-1828) gedişində İrəvan qalasını ələ keçiriblər. General Paskeviçin qoşunları bundan az öncə (20 sentyabr) bölgədəki əsas strateji məntəqə olan Sərdarabad qalasını işğal edəndən sonra İrəvanın müdafiə imkanları zəifləmişdi. İrəvanın ələ keçirilməsinə görə Rusiya çarı general Paskeviçə "Qraf Erivanski" titulu vermişdi. İrəvanın süqutu müharibənin müqəddəratını faktiki olaraq həll etdi.
1881-ci ildə - Salyanda məktəb nəzdində ilk məktəb-ictimaiyyət kitabxanası açılmışdı. Lakin camaatdan toplanan kitab və dövri mətbuat məktəb şagirdlərinin təlabatını qismən ödəmişdi. Burada toplanılan təcrübə müstəqil ictimai qiraətxananın açılmasında mühüm rol oynamışdı.
1897-ci ildə - XIX əsr Azərbaycanın görkəmli şairəsi, Mehdiqulu xan Cavanşirin qızı, İbrahimxəlil xanın nəvəsi Xurşidbanu Natəvan (1832-1897) vəfat etmişdir və Ağdamın "İmarət" qəbiristanlığında dəfn olunmuşdur.
1918-ci ildə - Azərbaycan Xalq Cümhuriyyətinin Nazirlər Şurası Bakı Dairə Məhkəməsinin tərkibində prokurorluq orqanlarının yaradılması barədə qərar qəbul edib. Prezident Heydər Əliyevin 17 iyul 1998-ci il tarixli sərəncamına əsasən, 1 oktyabr prokurorluq işçilərinin peşə bayramı günü kimi qeyd edilir.
1949-cu ildə - Çağdaş Azərbaycan poeziyasının görkəmli nümayəndələrindən biri, Vaqif Bayatlı Önər Cəbrayıl rayonunun Böyük Mərcanlı kəndində anadan olmuşdur. Görkəmli şair 1993-cü ildə Azərbaycan mətbuat fondunun Mirzə Cəlil mükafatına və Moskvanın “Molodaya qvardiya” nəşriyyatının kütləvi tirajla buraxdığı “Sıçrayış” kitabına görə Gürcüstan Nazirlər Sovetinin V.Mayakovski mükafatına layiq görülmüşdür.
1965-ci ildə - Şuşa xanəndəlik məktəbinin ən parlaq nümayəndəsi, Cabbar Qaryağdıoğlunun "Şərq musiqisinin incisi" adlandırdığı Seyid Şuşinski (1889-1965) vəfat etmişdir.
1969-cu ildə - Azərbaycanın Milli Qəhrəmanı Kazım Ərşad oğlu Məmmədov (1969-1991) Cəbrayıl rayonunun Böyük Mərcanlı kəndində dünyaya göz açmışdır.
1987-ci ildə - Milli teatr rəssamlığımızın inkişafında və formalaşmasında böyük xidmətlər göstərmiş Azərbaycan SSR xalq rəssamı, Azərbaycan SSR Dövlət mükafatı laureatı Nüsrət Möhsün oğlu Fətullayev (1913-1987) Bakıda vəfat etmişdir.
1992-ci ildə - BMT-nin Nyu-Yorkdakı iqamətgahında Azərbaycan Respublikasının nümayəndəliyi açılıb. Bunadək Azərbaycanın BMT-dəki nümayəndəliyi Türkiyənin təşkilatdakı nümayəndəliyində yerləşirdi.
1992-ci ildə - Azərbaycanın Milli Qəhrəmanları, Qarabağ müharibəsi iştirakçıları olan İlqar Sədi oğlu İsmayılov (1959-1992), Kərəm Ərşad oğlu Mirzəyev (1960-1992) və Əli Hüseyn oğlu Məmmədov (1955-1992) Laçın rayonunun Mazutlu kəndi yaxınlığında Qızartı yüksəkliyi uğrunda gedən döyüşdə şəhid oldu.
1993-cü ildə - Bu ildən etibarən hər il oktyabr ayının 1-i respublikamızda “Beynəlxalq Ahıllar Günü” kimi qeyd olunur.
1997-ci ildə - Azərbaycan Respublikası Dağlıq Qarabağ münaqişəsi ilə bağlı "mərhələli həll" təklifinin danışıqlara başlamaq üçün əsas kimi qəbul olunmasına razılığını bildirdi.
2001-ci ildə - Azərbaycan Televiziyasının birinci proqramı və dövlət radiosunun iki proqramı gündə 36 saat bütün dünyaya yayımlanmağa başladı. 12 ölkədə efirdə Azərbaycan dilində verilişlər səslənirdi.
2002-ci ilin oktyabrın 1-5-də -Bakıda Azərbaycan, Skandinaviya və Cənubi Amerika ölkələri musiqiçilərinin iştirak etdiyi I Beynəlxalq Milli Musiqi Festivalı keçirildi.